Gîkuû kîa mûnene Saûrû na aana baake
(1Karaaya 10:1-12)
31
1 Kagiitaani gaku Afirisiti i baarûaga na Aisiraeri. Aisiraeri beengatua baugia îndî baingî baao baûragîrwa kîrîmaani kîa Ngiriboa. 2 Afirisiti baarûmarûma Saûrû na aana baake mûno, na baûraga aana baake Njonathani, Abinandabu na Mariki-Sua. 3 Ndûa yaimba mûno akubî na Saûrû. Na ageri ba mîgwî bamûgwatagwata bamûguraria nainya mûno. 4 Rîru Saûrû eera mûkamati wake wa mathaga ma ndûa ata rî, “Kûûra rûûyiû rwaku ûûmunte nkue, giria aîyî baba baangwatagwata bambûraga na bancambia.” Îndî mûkamati ûyu wake wa mathaga ma ndûa n'arî na ûguaya mûno atikîûmba kûrûtha ûgu. Saûrû aathûkia rûûyiû rwake eegwîthia îgûrû rîaru. 5 Rîra mûkamati wa into biake bia ndûa oonire Saûrû agûkua wan'we eegwîthia îgûrû rîa rûûyiû rwake na baakuuyanîria. 6 Kwoogu Saûrû, aana baake bathatû, mûkamati wa mathaga maake ma ndûa, na njûûrî yake yonthe baakuuyanîîrie amwe ntugû wa înu. 7 Na rîra antû ba Isiraeri bara baarî kîbondeeni na bara baarî rûgongo rûra rûngî rwa Njorondani boonire njûûrî ya Isiraeri îkuthûkîîte na Saûrû na aana baake bagûkua, baatiganîria taûni ciao baakuthûka. Afirisiti baaya baatûûra ku.8 Rûûni Afirisiti bakûthi kûberenca bara baûragîîtwe, beethîra biimba bia Saûrû na aana baake bathatû baagwîte kîrîmaani kîa Ngiriboa. 9 Baagiita kîongo gîake na bamûruta mathaga maake monthe ma ndûa, baatûma atûmwa nthîgûrû yonthe ya Afirisiti kuugîîria ntheto îno mbega iromberooni bia ngai ciao cia mîbuanaano na kîrî antû baao. 10 Baiga mathaga maake ma ndûa nyomba ya ngai îra yîîtagwa Asitorethi; na boogeera mwîrî wake rûthingooni rwa Bethi-Sani.
11 Rîra antû ba Njabesi Ngiriandi beegiirue bûra Afirisiti baarûthîrîîte Saûrû, 12 ncamba ciao cia ndûa cionthe ciauma ciathi na ûtugû bwa Bethi-Seani baaruta mwîrî wa Saûrû na mîîrî ya aana baake kuuma rûthingooni rwa Bethi-Sani, baaya n'yo mwanka Njabesi na bamîbîîthia. 13 Baathûkia maîndî maao bamathika wagu Njabesi ruungu rwa mûtî wa mûgunye, na baatîîrîra kûrîa irio ntugû mûgwanja.