Saûrû arûa na Aamareki na abaûmba
15
1 Samweri eera Saûrû, “I niû Mwathani aatûmire ngwîtûûrîria maguta ûtuîka mûnene wa antû baake ba Isiraeri, îîndî ta îgua ntûmwa ya Mwathani. 2 Mwathani wa Njûûrî ariuga ata rî, ‘Nkaanenkera Aamareki îkaanûkia n'ûntû bwa kûgiitîra Aisiraeri njîraani rîra baumîîte Miisiri. 3 Îîndî îthi ûûrage Aamareki na ûthirie into biao bionthe na ûtikaabatigarie. Ûûrage akûrû na eekûrû, twana na kinya tûgenke tûra tûgwonka, ûûrage ng'ombe na ng'ondu, nkamîîra na mang'ooi.’ ” 4 Kwoogu Saûrû eeta antû bantû eetagwa Teraimu, akûbatara, baarî acikaarî ngiri magana maîrî ba Isiraeri na ngiri îkûmi kuuma Njunda.5 Saûrû aathi taûni ya Amareki aagiitîra kîbondeeni. 6 Saûrû eera Akeni ata rî, “Umaani gatîgatî ka Aamareki giria mbûthiranîria amwe nabo, n'ûntû i bwegiirue Aisiraeri kîao rîra baumîîte Miisiri.” Kwoogu Akeni baumauma kîrî Aamareki. 7 Rîru Saûrû aithûkîra Aamareki kwanjîîria Abira mwanka Suri îra îrî rûteere rwa uumîîro bwa riûa bwa Miisiri. 8 Aagwata Agagi mûnene wa Aamareki arî mwoyo na aûraga antû babu bangî bonthe na rûûyiû. 9 Îndî Saûrû na antû baake baatigaria Agagi, na ng'ondu na ng'ombe ira nthongi na tûyaû tûra tûnoru, ntûrûme, into bionthe bira biarî biega bateendaga kûûraga. Îndi bionthe bira biarî biceng'u na bitaarî biega baûraga kûrû.
10 Rîru Mwathani eera Samweri ata rî, 11 “I nkwîrira i kî n'ûntû ntuîkithîîtie Saûrû mûnene, n'ûntû n'acookeete nyuma aatiga kûnthingata na atirarûtha bûra mmwathîîte.” Samweri eegua ainyîîrîka mûno na araara kûrîrîra Mwathani ûtugû bunthe. 12 Na Samweri aûkîîra rûkîîrî kaingo akomana na Saûrû, îndî eerwa Saûrû nathiire bwa taûni ya Karimeri kûrûngîka mûbuanano wake wa kûririkanagwa, na aacooka endama bwa Girigari. 13 Rira Samweri aakinyire, Saûrû aamûkeethiirie akîmwîraga, “Mwathani akûthaarime. I mbûyûrîîtie watho bwake.” 14 Samweri amûûria, “Abu î, i kî n'ûntû nkwîgua ng'ondu na ng'ombe ikîananîria?” 15 Saûrû amûcookeria amwîra, “N'acikaarî baratigariirie ng'ondu na ng'ombe imwe ira mbega cia Aamareki baaya nacio cia kûrutîra Mwathani Ngai waku kîgongwana, îndî itûthiriirie bira biingî bionthe.” 16 Samweri eera Saûrû, “Tatiga! Thikîîria nkwîre bûra Mwathani araambîîrire ûtugû.” Saûrû amûcookeria amwîra, “Ta mbîîra.”
17 Samweri amûcookeria amwîra, “Wana wegua n'webonaga ta ûrî ûmûniini Mwathani ataagûtûûrîîrie maguta watuîka mûtongoria wa mîîrîga yonthe ya Isiraeri? 18 Na aacooka agûtûma akwîra, ‘Îthi ûûrage Aamareki n'ûntû n'eeyia, ûrûe nabo mwanka ûbathirie kûrû.’ 19 I kî n'ûntû ûtiraathîkîra kayû ka Mwathani? I kî n'ûntû bûraugiirie gûtaa bwarûtha ûthûûku meethooni ma Mwathani?” 20 Saûrû amûcookeria amwîra ata rî, “I mbathîkîrîîte kayû ka Mwathani n'ûntû i ndarathiire ngûgîîni îra aranenkereete, i ndarathiriirie Aamareki kûrû na ndaaya na Agagi mûnene wao. 21 N'acikaarî barathûkiirie ng'ondu na ng'ombe ira baragwatire, ira mbega ciathûrîrîîtwe Mwathani, kaingo barutîra Mwathani Ngai waku kîgongwana naara Girigari.” 22 Samweri amûcookeria ata rî, “Ka Mwathani akenagîîra igongwana bia kûbîîthua na biewa bira biingî nkûrûki ya kwathîkîrwa? Kwathîka i kwega nkûrûki ya kîgongwana, na kwîgua i kwega nkûrûki ya maguta ma ntûrûme. 23 N'ûntû ûremu i ta wîyîa bwa ûrogi na kûrega kwathîka gûkari ta wîyîa bwa kûromba mûbuanaano. N'ûntû n'ûreganîîte na bûra Mwathani augîîte n'we n'akûregeete ta mûnene.”
24 I rîo Saûrû eerire Samweri, “Wabu i mbunîîte watho bwa Mwathani na mawatho maaku n'ûntû i ndarakuthûkire antû na ndabaathîkîra. 25 Itû ndakwereka, ndekera wîyia bwakwa na tûcookanie kaingo ngonga Mwathani.” 26 Îndî Samweri eera Saûrû, “Ntithiiyania naawe. N'ûreganîîte na watho bwa Mwathani na Mwathani akûrega ta ûrî mûnene wa Isiraeri.”
27 Samweri akiûndûka athi, Saûrû aagwata mûthia wa nguo yake îra ndaaya yatembûka. 28 Samweri amwîra, “Îmunthî, Mwathani agûtembûra ûnene bwa Isiraeri bwauma kîrî wou na abunenkera muntû ûngî ûra arî kaaba kîrî woû. 29 Ûra we n'we ûkumio bwa Isiraeri atiaria ûrongo, kana eerira n'ûntû ti muntû îndî akaagarûra mathûgaania maake.” 30 Saûrû acookia auga, “I mbîyîîtie îndî ngwatîra nthoni aaga mbere ya akûrû ba antû baakwa na Isiraeri, ûcookanie naani kaingo ngonga Mwathani Ngai waku.” 31 Samweri etîgîîria acookania na Saûrû, Saûrû aagonga Mwathani.
32 Rîru Samweri auga, “Reteeni Agagi mûnene wa Aamareki.” Agagi aaya agwîrîîtue akiugaga, “Na mma ûrûrû bwa gîkuû i bûûthiru.” 33 N'we Samweri amûcookeria amwîra, “Wa bûra rûûyiû rwaku rûtigîîte eekûrû batarî na aana, nwabu nyûkwe agûtigwa atarî.” Rîru Samweri aatemanga Agagi mbere ya Mwathani agu Girigari.