1 Samweri 14

1 Ntugû îmwe Njonathani nthaka ya Saûrû yeera nthaka îra yamûkamatagîra mathaga ma ndûa ata rî, “Ta tûringanîrie bwa gakambî kara ga Afirisiti.” Îndî ateera îthe. 2 Saûrû aakaraga ome ya Ngibea nkona ya mûkûnkûmanga ûra warî Migironi. Aarî na antû ta magana mathanthatû. 3 Kîrî bo i kwarî na Aiya ûra aakamatîîte ebondi. Aarî mwana wa Aitubu mûruagina wa Ikabondi mwana wa Finiasi mwana wa Eri mûthînjîrî wa Mwathani naara Siro. Gûtirî we waiyî kana Njonathani n'arî akûthi. 4 Wa rûteere runthe rûra Njonathani eendaga kûgendeera akinyîîra gakambî gaku ga Afirisiti, i kwarî na rwara rwa iiga rwarûûngi. Rûmwe rwetagwa Bosesi na rûra rûngî rwetagwa Sene. 5 Rwara rûmwe rwarûûngi bwa îgûrû rwerekereete Mikimasi, na rûra rûngî bwa iti rwerekereete bwa Ngeba.

6 Njonathani eera nthaka îra yamûkamatagîra mathaga ma ndûa ata rî, “Ncû tûringanîrie tûthi gakambîîni ka aîyî baara, nwa kûûmbîke Mwathani akaruta ngûgî bantû eetû. Gûtirî kîo kîgiria Mwathani atûûmbanîra tûrî baingî kana tûrî baakai.” 7 Nthaka înu yamwîra, “Îrûtha bunthe bûra ûkûthûgaania, îthi mbere, ndî amwe naawe mantûûni monthe.” 8 I rîo Njonathani augire, “Îîndî tûrîringa rûgongo rûra kîrî antû arûme baara na tûtiîbitha kaingo batwona. 9 Bakaaya gûtwîra, ‘Eteeraani mwanka rîra tûkaaya kîrî biû,’ tûkaarûngama waagu tûrî na tûtiithi kîrî bo. 10 Îndî bakaaya gûtwîra, ‘Ncûûni aaga tûrî,’ tûkaathi mwanka oogo n'ûntû rûru rûkeegua rûrî rwano rwa kwonania Mwathani nabanenkanîrîîte njaraani cietû.” 11 Kwoogu antû babu barî baîrî beebonania kîrî Afirisiti. Afirisiti bauga, “Ta raithaani, Aibirania i bambîîrie kuuma mîrinyaani kûra bareebithîîte.” 12 Acikaarî bara baarî kambîîni ya Afirisiti banjîîria kûgondokera Njonathani na nthaka înu yaamûkamatagîra mathaga maake ma ndûa bakîbeeraga, “Wona bwakinya aaga tûrî tûkabwonia nkanga mbuute.” Njonathani eera nthaka înu, “Nthingata, Mwathani nanenkanîrîîte antû baba njaraani cia Aisiraeri.” 13 Njonathani aakura na maru na ûra aakamatîîte mathaga maake ma ndûa amuumîîte nyuma. Afirisiti baagwa mbere ya Njonathani n'we ûra aakamatîîte mathaga maake ma ndûa amuumîîte nyuma akîbaûragaga. 14 Yiithûka rîru rîa mbere Njonathani na mûkamati wake wa mathaga ma ndûa baûragire ta antû mîrongo îîrî kîeniini kîa ûraaya ta bwa mita mîrongo îthatû.

Isiraeri yacinda Afirisiti

15 Kîmako kîagwata njûûrî yonthe, bara baarî kambîîni na kîeniini na bara baarî tûkambîîni na ikundi bira biaithûkîîte, na nthîgûrû yongwa yainaina. Kîarî kîmako kîînene mûno.

16 Antû bara baarî amwe na Saûrû baraithîîrîîtie barî Ngibea nthîgûrû ya Benjameni boona mûnyaranyaro wa njûûrî ya Afirisiti wa bûra bakuugia mbarî înu na îra îîngî. 17 Saûrû eera njûûrî îra aarî n'yo, “Taraani antû tûmenye n'ûû ûthiire.” Bagûtara boona Njonathani na mûkamati wake wa mathaga ma ndûa i bo bataarî oogo. 18 Saûrû eera Aiya, “Reete îthandûkû rîa Ngai.” Kagiita gaku îthandûkû ria Ngai irîarî na Aisiraeri. 19 Rîra Saûrû aaragia na mûthînjîri wa Ngai, gîtuma kîra kîarî kambîîni ya Afirisiti kiaingîa mûno. I rîo Saûrû eerire mûthînjîri wa Ngai, “Gûtirî na kagiita ga kwaria na Ngai.” 20 Saûrû na njûûrî yake beethîranire baathi ndûani. Beethîra Afirisiti barigicanire mûno na bagîtemanganaga bongwa na mpiû. 21 Aibirania bara baarî rûteere rwa Afirisiti na baarî amwe nabo kambîîni baagarûka baagwatana na Aisiraeri bara baarî na Saûrû na Njonathani. 22 Wana Aisiraeri bara bangî beebithîîte nthîgûrû ya irîma ya Eburaimu bakwîgua Afirisiti i baanjîîrie kuugia rwîro, wanabo baaya banjîîria gûtura Afirisiti. 23 Baarûa ndûa mwanka mbere ya Bethi-Abeni. Kwoogu înu n'yo ntugû îra Mwathani aatuunyûkiirie Isiraeri.

Nyuma ya ndûa

24 Antû ba Isiraeri ibaathîînîîte mûno ntugû înu, n'ûntû Saûrû n'aabathiîtithîîtie bauga, “N'ûmûrume ûra akaarîa irio mbere ûgoro bûkinya mbere ntireerîîria anthû baakwa.” Kwoogu njûûrî yonthe îtaarûmîîte gantû ntugû înu.

25 Njûûrî yonthe yathûngîra mûthitûûni yethîra gûntû ûkî bwetîgangîîte nthîgûrû. 26 Wana kinya rîru baathûngîîre mûthitûûni beethîra ûkî bûbu bûgîîtîgaga, gûtirî we aabucama n'ûntû i baakuthûkaga muuma. 27 Îndî Njonathani we ateegîîtue îthe akîthiîtithia antû abakaania kûrîa nwa mbi. Aathûkia mûraagi ûra aarî nau aamunta îgwa arîrîa na eegua kaaba. 28 Mûcikaarî ûmwe amwîra, “Abaagu n'akaaniirie antû mûno na abathiîtithia akîbeeraga, ‘N'ûmûrume muntû ûra akaarîa nwa mbi îmunthî.’ I kîo n'ûntû ûkwona antû bainyîîrîkîîte ûûgû.” 29 Njonathani auga, “Baaba n'areeteere nthîgûrû thîîna, ta raitha wone nkûgîa kainya n'ûntû bwa gaûkî gaku ndaarûma. 30 N'ata bûkîbua bûgana antû baba bakîrîîre nwa bimwe bia bira bataire kuuma kwa anthû beetû, tûtikîûraga Afirisiti baingî nkûrûki?”

31 Ntugû înu Aisiraeri baatura Afirisiti kwanjîîria Mikimasi mwanka Aiyaroni, nabo tikûnoga baanogeete! 32 Baumpaga nyamû ira baataîte, ng'ondu, ng'ombe na tûyaû bakaûragîra nthîgûrû bakîrîyanagîria na nthakame. 33 I rîo muntû ûmwe eerire Saûrû, “Antû i bakwîyîria Mwathani n'ûntû i bakûrîa nyama irî na nthakame.” Saûrû abeera, “Bûkûrûtha mantû matarî meega, ingiritiani iiga rîînene bûrîreete aaga wa îîndî.” 34 Rîru abeera, “Îraani antû bonthe baandetere ng'ombe na ng'ondu ciao bathînjîre aaga barîe n'ûntû gûtirî gîtûmi gîa kûbîtîria Mwathani na njîra ya kûrîa nyama irî na nthakame.” Ûtugû bûbu woora muntû aareetaga Ng'ombe yake akamîthînjîra agu. 35 Kwoogu Saûrû aakîra Mwathani kîthînjîro agu. I rîo rîarî rîa mbere Saûrû kûrûtha ûntû ta bûbu.

36 Saûrû abeera ata rî, “Twîndameeni twîngane na Afirisiti îîndî ûtugû tûtae into biao kuuma îîndî ûtugû mwanka rûkîîrî na tûtigaatigarie n'wa ûmwe wao.” Nabo bamûcookeria bamwîra, “Rûtha bûra ûkwona bûkîbua.” Îndî mûthînjîri wa Ngai amwîra, “Tatiga twambe tûûrie Ngai ûntû bûbû.” 37 Saûrû aromba Ngai akîmûûragia ûûgû, “Mbîîndame nthingate Afirisiti? Ûkabaneenkanîra njaraani cia Aisiraeri?” Îndî Ngai ataamûcookeria ntugû înu. 38 I rîo Saûrû eetire atongoria bonthe ba acikaarî abeera, “Ncûûni aaga bwinthe twone i meeyia mabi marûthîkire îmunthî. 39 Na mma wa ta bûra Mwathani ûra aneenkagîra Isiraeri ûûmbani atûûraga mwoyo, wana wegua i mwana wakwa Njonathani ûrûthire mo abatîîrue gûkua.” Gûtirî muntû aamûcookeria. 40 Saûrû eera Aisiraeri bonthe ata rî, “Rûngamaani rûteere rûûra, naani na Njonathani mwan'wakwa tûrûngame rûteere rûrû rûngî.” Antû bonthe bamûcookeria bamwîra, “Rûtha bûra ûkwona bûkîbua.” 41 Rîru Saûrû aromba Mwathani akiugaga, “Mwathani Ngai wa Isiraeri i kî n'ûntû ûtiracookeria mûruti ngûgî waku îmunthî? Ûkeegua mabîtia maumanîîtie naani kana mwan'wakwa Njonathani, ncookeria na Urimu, îndî wegua n'antû ba Isiraeri, ncookeria na Thumimu.” Na Njonathani na Saûrû baagwîrwa i kuura na antû bara bangî baarekanwa nabo. 42 I rîo Saûrû aabeerire, “Îîndî tûgiitîreeni îgamba niû na mwana ûyû wakwa Njonathani.” Kuura yagwîra Njonathani. 43 Rîru Saûrû eera Njonathani, “Tambîîra bûra ûrûthire.” Njonathani amûcookeria amwîra, “I ncamire gaûkî kaniini na mûthia wa mûraagi ûra nkûrî nau, na kwoogu nwa mwanka nkue.”

44 Saûrû auga ata rî, “Ngai aroompa îkaanûkia kinya nkûrûki wegua Njonathani ûtiikua.” 45 Îndî antû beera Saûrû ata rî, “Njonathani atiikua n'ûntû n'we ûreteete Isiraeri ûûmbani bûbû bûnene ûûgû. Wa ta bûra Mwathani atûûraga mwoyo, wana rûtundu nwa rûmwe rwa kîongo gîake rûtiigwa nthîgûrû, n'ûntû arutîîte ngûgî înu agîteethagua i Ngai îmunthî.” Kwoogu antû baatuunyûkia Njonathani na ataûragwa. 46 Na Saûrû aatigana na kûthingata Afirisiti. Nabo baacooka bwa kwao.

Ûûmbani bwa Saûrû ndûani

47 Kuuma Saûrû agûtuîka mûnene wa Isiraeri, aarûire na anthû baao ba mbarî cionthe. Nabo baarî Amoabu, Aamoni, Aendomu, na kinya anene ba Soba na Afirisiti. Bara bonthe aarûaga nabo n'aabaturaga. 48 N'arî na ûûmbani bûûnene mûno kîrî Aamareki na n'aatunyûkagia Aisiraeri kîrî bara bonthe baataîte into biao.

49 Aana ba Saûrû baarî Njonathani, Isibi na Mariki-Sua. Na kîrî aarî baake ûra mûkûrû eetagwa Merabu na ûra mûniini eetagwa Mikari. 50 Mwekûrû wa Saûrû eetagwa Ainoamu mwarî wa Aimaasi. Mûtongoria wa njûûrî ya Saûrû eetagwa Abuneri mwana wa Neri. Neri aarî îthe mwanake wa Saûrû. 51 Kisi îthe wa Saûrû na Neri îthe wa Abuneri baarî aana ba Abieri.

52 Ntugû cionthe cia wathani bwa Saûrû i kwarûirwe ndûa imbîî mûno gatîgatî ga Aisiraeri na Afirisiti. N'ûntû bwa ûgu rionthe rîra Saûrû oonaga muntû ari na inya na ûmûng'eentu n'amûthûkagia akamûtuîkithia wa njûûrî yake.