Saûrû aarega kwathîkîra Mwathani
13
1 Saûrû aarî na ûkûrû bwa mîanka mîrongo îthatû rîra atuîkire mûnene wa Isiraeri na aathana mîanka mîrongo îna na îîrî.a2 Saûrû aathuura antû arûme ngiri îthatû ba Isiraeri. Aakaraga na antû ngiri ciîrî Mikimasi na nthîgûrû ya irîma ya Betheri. Ngiri îmwe baarî na Njonathani naara Ngibea ya Benjameni. Bara bangî abacookia wa muntû mûciî wake. 3 Njonathani aacinda Afirisiti bara baarî kambîîni îra yarî Ngeba na Afirisiti bara bangî beegua mantû mamu. Rîru Saûrû aariingithia rûgoci rwa mbu nthîgûrû yonthe ya Isiraeri akiugaga, “Yîî Aibirania bonthe ta îguani!” 4 Rîra Aisiraeri bonthe beegiirue ati Saûrû n'aracindire kambî yonthe ya Afirisiti ya Ngeba, na Aisiraeri ibaakarîîte ta gîntû gîkûnunka kîrî Afirisiti, antû bonthe beetwa beeringanîra na Saûrû Girigari.
5 Afirisiti beethîrana kaingo barûa na Aisiraeri. Baarî na nkaarî cia ndûa ngiri mîrongo îthatû na athiithia ba mbaraathi ngiri ithanthatû na acikaarî batatarîka ta mûthanga wa îria. Beetia baamba marema maao Mikimasi rûteere rwa umîîro bwa riûa bwa Bethi-Abeni. 6 Rîra antû ba Isiraeri boonire atî njûûrî yao n'yarî thîînaani n'ûntû njûûrî ya Afirisiti îkabakîria inya, bamwe beebitha makurunguuni, matîîni mara maumîîte mbacaacîîni cia maiga, mîrinyaani na kinya ithimaani. 7 Bara bangî baaringa muuro wa Njorondani baathi bwa nthîgûrû ya Ngandi na Ngiriandi.
Saûrû aarî Girigari na antû bonthe bara aarî nabo i baathetemaga n'ûguaya. 8 Saûrû eeteera ntugû mûgwanja wa bûra Samweri augîîte, îndî rîra Samweri aaregire kûûya Girigari, antû banjîîria kûnyagaara. 9 I rîo Saûrû augire, “Ndeteraani kîgongwana gîku gîa kûbîîthia na kîa thîîrî.” Bikûreetwa, aaruta kîgongwana gîa kûbîîthua. 10 Warîra aathiria kûruta kîgongwana gîku gîa kûbîîthia, Samweri aakinya, Saûrû amûthagaana amûkeethia. 11 Samweri amûûria, “N'ata warûtha?” Saûrû amûcookeria amwîra, “Rîra mbonire antû banjîîria kûnyagaara, naawe ûtirakinya mathaa mara ûraugîîte, na Afirisiti nabo ibaîthîranire Mikimasi, 12 mbonire Afirisiti bakaaya banjîîrie kûrwîra naani aaga Girigari na ntikûrî ngûceria kwendeerwa i Mwathani, kwoogu ndeebakîîria ndaaruta kîgongwana gîa kûbîîthia.” 13 Samweri eera Saûrû ata rî, “Ûkûrûtha ûntû bwa waa mûno n'ûntû ûtiramenyeera watho bûra Mwathani Ngai waku akwathîîte. Ûkeegua ûbumenyeere, agîtûûria ûnene bwaku Isiraeri mwanka gûtarî rîo. 14 Îndî îîndî ûnene bwaku bûtiitûûra. Mwathani n'aceriirie muntû ûngî ûra arûthaga bûra Mwathani akwenda na amûtuîkithia mûtongoria wa antû baake n'ûntû n'ûregire kûmenyeera watho bwake.”
15 Samweri auma Girigari aathi bwa Ngibea ya Benjameni. Saûrû agûtara antû bara aarî nabo, oona baarî ta antû magana mathanthatû. 16 Saûrû, nthaka yake Njonathani na antû bara baarî nabo baakaraga Ngebab ya Benjameni na Afirisiti nabo baambîîte marema maao Mikimasi. 17 Njûûrî cia Afirisiti ciauma kambîîni yao irî mbûûtû ithatû. Îmwe yatara bwa Obura nthîgûrû ya Suari. 18 Îra îîngî yaatara bwa Bethi-Oroni. Na ya ithatû yaatara bwa mwanka ûraithîîrîîtie kîbonde gia Seboimu ûkîonaga rwanda.
19 Kagiita gaka gûtikîoneka mûturi n'wa ûmwe Isiraeri yonthe, n'ûntû Afirisiti i baakuthûkaga batura matumo kana ndûûyiû. 20 Kwoogu Aisiraeri bonthe beendamaga kwa Afirisiti kûnoora cururu, tûthoka, mîraaû na tûyiû twa gûketha ngano. 21 Îrîi rîa kûnoora mûraaû na cururu rîarî pimuc îmwe na rîa kûnoora nthitangi na mathoka na rîa gûtura rwambo rîarî nucu pimu. 22 N'ûntû bwa ûgu, ntugû ya ndûa gûtirî mûcikaarî wa Isiraeri aarî na rûûyiû kana îtumo njaraani, tatiga Saûrû na nthaka yake Njonathani.
Njonathani aithûkîra Afirisiti
23 Afirisiti i baarî bagûtûma gîkundi kîa njûûrî baarûtha gakambî mwanyaani wa Mikimasi.