Rwaria rwa Samweri rwa mûthia arî mûtongoria
12
1 Samweri aarîria Aisiraeri bonthe abeera, “I ndarathikîîrie mantû monthe mara bûrambîîraga na ndabûnenkera mûnene wa kûbwathaga. 2 Îîndî mûnene ûyu n'we ûkaabûtongoragia, niû ndî mûkûrû arî na mbuî, îndî aana baakwa barî amwe naabi. I mbûtongoreetie kuuma wîthî bwakwa mwanka îmunthî tûrî. 3 Îîndî i niû ûyû ndûngi aaga. Kûûyîîraani mbere ya Mwathani na mwîtûûrîrua maguta mûnene ûra athuurîîte bûnthiitange buuge, i ng'ombe yaaû kana n'îng'ooi rîaû ndaarothûkia? N'ûû ndeenia kana mbinyîîria? Kana n'ûû aaneenkera ngukumo kaingo aambitha meetho? Ûkeegua kûrî we, nkamûcookeria.” 4 Baacookia bauga, “Ûtaatwenia kana ûtuinyîîrîa. Ûtaathûkia nwa mbi kuuma kîrî n'wa ûmwe wetû.” 5 Samweri abeera, “Mwathani i mûnkûûyî, wana kinya mwîtûûrîrua maguta, mûnene ûra athuurîîte i mûkûûyî îmunthî, atî gûtirî gîntû ndaathûkia.” Nabo bauga, “Yîî i mûnkûûyî.”6 Rîru Samweri eera antû, “I Mwathani nwe wathuurire Musa na Arûni na aruta ba abaagu nthî ya Miisiri. 7 Rûngamaani mbûririkanie bûrî mbere ya Mwathani nkîbûtaragîîria mantû meega na ma inya mara Mwathani abûrûthîrîte biû na ba abaagu. 8 Nyuma ya îgiita rîîraaya Njakubu na mûciî wake bakûthi Miisiri, biûyûûyû bienu i biarîrîîre Mwathani. Mwathani aatûma Musa na Arûni babûruta noogo mwanka babûreeta aaga bûtûûra oogo. 9 Îndî i baariganîîrue i Mwathani Ngai wao, nwe abeeyana njaraani cia Sisera mûtongoria wa njûûrî ya Asori na njaraani cia Afirisiti na kinya cia mûnene wa Moabu na baarûa nabo. 10 I rîo baarîrîîre Mwathani bakiugaga, ‘Itwîyîîtie, twatiga kwathîkîra Mwathani twatua kwathîkagîra ngai cia Mbaari na Asitorethi. Twonokie tuume njaraani cia anthû beetû naati tûgakwathîkîra.’ 11 I rîo Mwathani aatûmire Njerubu-Mbaari, Mbaraki, Njebutha na Samweri babûtuunyûkia kuuma njaraani cia anthû beenu bara babûthiûrûkîrîîte mbarî cionthe na bwatûûra mayîîga. 12 Îndî rîra bwonire Naasi mûnene wa Aamoni akîîbîthîrania kûrûa naabi, bwambîîra i bûkwenda mûnene wa kûbwathaga wana wegua Mwathani Ngai wenu nwe aarî mûnene wenu. 13 Îîndî mûnene n'ûûyû, mûnene ûra bûrathuurire, ûra bûreendaga. Raithaani bwone, Mwathani narabûnenkeere mûnene. 14 Ûkeegua bûgaatîîya Mwathani Ngai wenu, bûmûrutîre ngûgî, bûmwathîkîre na bûthingate bwega maathana maake bwinthe amwe na mûnene wenu, i bwega! 15 Îndî ûkeegua bûtiathîkîra Mwathani, bûregane na maathana maake, akaabûrûtha wa ta bûra aarûthire ba abaagu bakûrega kûmwathîkîra. 16 Ta rûngamaani waagu bwone ûntû bûbû bûûnene Mwathani arî akubî kûrûtha mbere ya meetho meenu. 17 Gaka ti kagiita ga gûketha ngano? Ndîromba Mwathani areete mbura îrî nkwa, kaingo bûmenya i bûrûthîîte ûntû bûthûûku mbere ya Mwathani bwetia mûnene wa kûbwathaga.”
18 Samweri aromba Mwathani na ntugû wa înu Mwathani atûma mbura îrî nkwa. Antû bonthe baagwatwa n'ûguaya mûno n'ûntû bwa gûkuthûka Mwathani na Samweri. 19 Antû bonthe beera Samweri ata rî, “Tûrombere kîrî Mwathani Ngai waku tiû aruti ngûgî baaku. Giria tûkua n'ûntû tûkwongeera îgûrû rîa meeyia mara mangî wîyia bwa gwîtia mûnene.” 20 Samweri abacookeria abeera, “Menyaani bûmaka, wana wegua i bûrûthîîte meeyia mamu monthe, bûtikauthatîreeni Mwathani, îndî rutîraani Mwathani ngûgî na nkoro cienu cionthe. 21 Menya bûûya gûcookera mîbuanaano îtarî gîtûmi îra îtaûmba kûbûrûthîra n'wa ata, kana îbûtuunyûkia n'ûntû îtirî gîtûmi. 22 N'ûntû bwa riîtwa rîake rîînene, Mwathani atiitiganîria antû baake, gîtûmi Mwathani nakeneereete kûbûtuîkithia antû baake. 23 Antûûni aakwa ningwa Mwathani anteethie ntikaaye kwîyia n'ûntû bwa kûremwa i kûbûrombera na kûbûrutana njîra ira mbega na indûngaru. 24 Mantûûni monthe tîîyaani Mwathani, bûmûrutîre ngûgî na gwîtîgîka gwa nkoro cienu. Ririkanaani mantû maanene mara abûrûthîrîîte. 25 Îndî bwaremeera kûrûthaga mantû mathûûku, bûkaathirua bwinthe amwe na mûnene wenu.”