Saûrû aacinda njûûrî ya Aamoni
11
1 Mûnene Naasi Mûamoni n'etiirie na njûûrî yake yaakîîmba taûni ya Njabesi îra îrî gîteere kîa Ngiriandi. Rîra antû ba Njabesi boonire ûgu bamwîra, “Twaige kîrîîkanîro naawe na tûgakwathîkîra ûrî mûnene wetû.” 2 Mûnene Naasi abacookeria abeera, “Nkaiga kîrîîkanîro naabi bunka bwambe bwîtîgîîrie nkûûre wora ûmwe wa cienu riitho rîa ûrîo kaingo mbira Aisiraeri bonthe îgi.” 3 Akûrû ba Njabesi bamwîra ata rî, “Tûneenkere ntugû mûgwanja tûtûme atûmwa Isiraeri yonthe na wegua tûtiona wa gûtûteethia, tûkeenenkanîra kîrî woû.” 4 Rîra atûmwa baakinyire Ngibea ara Saûrû aatûûraga na beera antû mantû mamu monthe, antû bonthe baûka na mbu, baarîra mûno.5 Kagiitaani wa gaku i rîo Saûrû aayîîte athingatîîte ng'ombe ciumîîte mûndaani aûria, “N'ata gûkarire n'ûntû antû bakûrîra?” Nabo bamwîra ntûmwa ya antû ba Njabesi. 6 Rîra Saûrû eegiirue ntheto inu, aûyûrwa n'inya ya Kîrundu wa Ngai na anjîîria kuinaina n'ûrûme. 7 Aathûkia ncamba ciîrî acigiitanga tûcuncî tûcuncî aatûma akiama batuira nthîgûrû yonthe ya Isiraeri bakiugaga, “Ûûgû i bu gûgaakarîka kîrî ncamba cia muntû wonthe ûra atakîthiiyania na Saûrû na Samweri ndûani.” Antû bonthe baakuthûka Mwathani bauma bakari ta muntû ûmwe. 8 Rîra Saûrû aabatarîîre naagu Beseki, Aisiraeri baarî antû ngiri magana mathatû na arûme ba Njunda baarî ngiri mîrongo îthatû. 9 Beera akiama bara baayîîte ata rî, “Îraani antû ba Njabesi, ‘Rûû mûthenya gatî bûgaatuunyûkua.’ ” Rîra akiama babu beerire antû ba Njabesi ûgu baakena mûno. 10 I rîo antû ba Njabesi beerire antû ba Amoni ata rî, “Rûû tûkeenenkanîra kîrî biû bûtûrûthîre bûra bûkoona bûkîbua.”
11 Rûûni, Saûrû aabangania njûûrî yake ikundi bithatû. Baithûkîra Aamoni mbere kwereerûka babatemanga mwanka mûthenya gatî, bara baatîgarire baanyagaarua cwe na gûtirî we wathiyanagia na ûra ûngî.
12 Antû baûria Samweri, “I baaû bara baraugaga Saûrû atiûmba gûtwatha? Bareete aaga tûbaûrage.” 13 Îndî Saûrû auga, “Arî, gûtirî muntû ûkaûragwa îmunthî, n'ûntû îmunthî Mwathani agûtuunyûkia Isiraeri.” 14 Rîru Samweri eera antû ata rî, “Tûthiini Girigari tûkarikithie ûnene bûbû.” 15 Kwoogu antû bonthe baathi Girigari baatuîkithia Saûrû mûnene wao mbere ya Mwathani, baacooka baruta igongwana bia ngwatanîro. Saûrû amwe na Aisiraeri bonthe baakeneera mûno.