1 Samweri 10

1 Samweri aathûkia nthaguta ya maguta amûtûûrîria kîongo, aacooka amûcunca akiugaga, “Ndîrûtha ûûgû n'ûntû Mwathani nakûthuurîîte [ûtuîka mûtongoria wa antû baake Isiraeri. Ûkaathaga antû ba Mwathani na ûbatuunyûkie kuuma njaraani cia anthû baao bara babathiûrûkîîrîîte.] Na rûrû rûkeegua rûrî rwano rwa kwonania Mwathani nagûtûûrîrîîtie maguta ûtongoria antû baake. 2 Wona wauma aaga kîrî niû îmunthî, ûkeethîra antû arûme baîrî agu Serisa agu nthikooni ya Raeri mwankaani wa Benjameni nabo bakwîre ata rî, ‘Mang'ooi mara bûrathiîte gûceria imaroonekire, na abaagu naratigire kûmamakîra, kîra akûmakîra i biû, n'ûntû arîûria, “N'ata nkaarûtha n'ûntû bwa mwana ûyu wakwa?” ’ 3 Kuuma agu ûthi mbere mwanka ûkinye mûpuruuni wa Tabori, ûkomane na antû arûme bathatû bathiîte kûruta kîgongwana kîrî Mwathani naagu Betheri. Ûmwe wao akamatîîte tûbûri tûthatû, ûra ûngî akamatîîte mîgaate îthatû, na ûyu ûngî îthatwa rîa ndibei. 4 Bagagûkeethia na bakûrûmie mîgaate îîrî na ûtikaarege. 5 Wauma agu na wakinya Ngibea ya Ngai ara kûrî na kambî ya Afirisiti, waagu ûgîkûrûka taûni ûgaakomana na gîkundi kîa iroria biumîîte bantû ara aûkîîru barî na wandîndî cia ndigi inyingî, tamburini, mîtûûrirû na inanda bikîringagwa mbere yao, bakeegua bakîgoyagia na bagîkururaga. 6 Kîrundu wa Mwathani agakûûyûrîa inya na ûkaagoyia na ûkurure wa tabo na ûkaagarûka ûtuîke muntû ûngî. 7 Rîra bionanîîria bibi bikaûyûra, rûtha wa bûra nkoro yaku îkoona bûkîbua n'ûntû Ngai arî amwe naawe. 8 Ûcooke wîndame bwa Girigari mbere yakwa, n'ûntû nyuma ya ntugû mûgwanja nkeendama kaingo nduta kîgongwana gîa kûbîîthia na gîa ûkiri, îndî nwa mwanka gweteere ntugû mûgwanja mwanka rîra nkaaya gûkwonia bûra ûkaarûtha.”

9 Rîra aagarûkire bagîtigana na Samweri, Ngai agarûra nkoro ya Saûrû na mantû mara monthe Samweri amwîrire maûyûra ntugû wenu. 10 Rîra baakinyire Ngibea aathagaanwa i gîkundi kîa iroria, aûyûrwa i Kîrundu wa Ngai na aagoyia agîkururaga amwe nabo. 11 Rira bara baamwiyî agu mbereeni boonire akîgoyia agîkururaga amwe na iroria baûrania ata rî, “N'ata mwana wa Kisi arakarire? Saûrû naratuîkire ûmwe wa iroria?” 12 Muntû ûmwe wa ntûûra înu abacookeria abaûria, “Îthe wao n'ûû?” Yatuîka njuno ya kwaragua n'antû, “Saûrû naratuîkire ûmwe wa iroria?” 13 Rîra Saûrû arîîkiirie kûgoyia na gûkurura eetia bwa bantû ara aûkîîru.

14 Rîru îthe mwanake aûria Saûrû na mûruti ngûgî wake, “Bai! N'ata bwathiire?” Saûrû amûcookeria amwîra, “Twathiire gûceria mang'ooi, na makûûra twathi kîrî Samweri.” 15 Îthe mwanake amwîra, “Ta mbîîra bûra Samweri arabwîrire.” 16 Saûrû eera îthe mwanake, “Aratwîrire bwega mang'ooi i maroonarire.” Îndî ataamwîra bûra Samweri aamwîrîîte îgûrû rîa kûthuurwa mûnene.

17 Rîru Samweri eethîrania antû ba Isiraeri mbere ya Mwathani naara Misipa 18 na abeera, “Ûûgû i bu Mwathani Ngai wa Isiraeri akuuga, ‘I niû ndaarutire Isiraeri Miisiri, na ndaboonokia kuuma njaraani cia Amiisiri na kuuma njaraani cia moonene monthe mara maabwinyagîîria.’ 19 Îndî îmunthî bûkûregana na Mwathani weenu ûra ûbûtuunyûkagia kuuma inyamaraani bienu na mantûûni monthe mara mabûritûagîra na bwauga, ‘Ng'ong'o, tûrîenda mûnene wa gûtwathaga.’ Kwoogu îîndî îîbangeeni mbere ya Mwathani, wa antû na mwîrîga wao na mûciî wao.”

20 Samweri areeta mîîrîga yonthe ya Isiraeri aakubî, na mwîrîga wa Benjameni wathuurwa. 21 Aareeta mwîrîga wa Benjameni aakubî mûciî kwa mûciî, na mûciî wa Amatiri wathuurwa. Mûthia buru aareeta mûciî wa Amatiri aakubî muntû ûmwe kwa ûmwe, Saûrû mwana wa Kisi aathuurwa. Bamûceria mûno îndî bataamwona. 22 Kwoogu baaromba Mwathani kaîrî bakîmûûragia, “Muntû ûyû atiraaya aaga na îîndî?” Mwathani abacookeria abeera, “Yîî naayire na eebithîîte naara mîrigo yaigîîtwe.” 23 Antû baugia rwîro bamûgîîra noogo bamûrûngîka gatîgatî kaao. Arî gatîgatî kaao n'we aarî ûmûraaya kîrî antû bara bangî bonthe, ûra aarî mûraaya mûno kîrî bo, aamwankaga gîturo. 24 Samweri eera antû bonthe, “Bûkwona ûra Mwathani athuurîîte? Gûtirî we ûbuaneene n'we gatîgatî keenu.” Antû bonthe bauganîîria na kayû kaanene, “Mûnene arootûûra!”

25 Kagiitaani gaku Samweri aamenyithia antû mawatho na ngûgî îra mûnene akaarutaga na mantû mara akeendaga. Akûrîîkia amaandîka îbukuuni na arîaiga mbere ya Mwathani. Aacooka eera antû beenûke wa muntû mûciî wake. 26 Na kinya Saûrû eenûka gwake Ngibea athiyanîîtie na gîkundi kîa nthaka irî na inya ira Mwathani aaringithîîtie nkoro. 27 Îndî i kwarî na gîkundi kîa maruruuthi kîanung'unaga gîkîûragia, “Muntû ûyû aûmba gûtûteethia ata?” Baabûthîîria Saûrû mûno na baarega kûmwaa biewa. Îndî ataabagweta.