1 Samweri 9

Saûrû aakomana na Samweri

1 Kwarî na mûkûrû ûmwe wa mwîrîga wa Benjameni eetagwa Kisi aarî gîtonga. Kisi aarî mwana wa Abieri, Abieri aarî mwana wa Serori, aarî mwana wa Bekorathi, Bekorathi nwe aarî mwana wa Afiya. 2 Kisi aarî na nthaka yeetagwa Saûrû. Yaarî nthaka înthongi na întambûrûku. Gûtoonekanaga nthaka îîngî înthongi ta înu Isiraeri yonthe, kuuma iturooni biake gwîtia bwa îgûrû n'we aarî ûmûraaya kîrî antû bara bangî bonthe.

3 Îgiita rîmwe mang'ooi mamwe ma Kisi îthe wa Saûrû imaûrire. Eeta nthaka yake Saûrû amîîra ata rî, “Thûkia mûruti ngûgî ûmwe bûthi n'we bûgacerie mang'ooi.” 4 Baakûrûkîîra nthîgûrû ya irîma ya Eburaimu, baagiitîîra gîteere gîa Sarisa, îndî bataamoona. Baathi bwa gîteere gîa Saarimu, îndî mataarî noogo. Baathi bwa nthîgûrû ya Benjameni na bataamoona. 5 Rîra baakinyire gîteere gîa Subu, Saûrû eera mûruti ngûgî ûra baarî n'we ata rî, “Tûcooke n'ûntû baaba aûmba gûtiga kûmakîra mang'ooi agacooka gûtûmakîra.” 6 Îndî amwîra, “Kûrî na mûruti ngûgî wa Ngai taûni îno, i muntû ûrî gîtîîyo, bûra bunthe augaga i bûûyûraga. Tûthi kîrî we atwîre njîra îra tûkûthi.” 7 Saûrû amûcookeria amwîra, “Îîndî twathi î, i mbi tûkaamwirîra? N'ûntû irio bira tûkûrî nabio mboorooni i bithirire, tûtiona gîa kwirîra mûruti ngûgî wa Ngai!” 8 Mûruti ngûgî ûyu kaîrî aacookeria Saûrû amwîra, “Ndî na robo sekeri ya fetha, nkamûnenkera na agatwîra njîra îra tûkaathi.” 9 (Kagiitaani gaku, nthîgûrû ya Isiraeri rîra muntû athiiyaga kûûria mantû kîrî Ngai, augaga ata rî, ncû tûthi kîrî muntû ûra wonaga mantû, muntû ûra wîtagwa kîroria îîndî ûgu, n'we wetagwa muntû ûra wonaga.) 10 Saûrû eera mûruti ngûgî ûyu wake, “Ûkuuga bwega, tûthi.” Kwoogu baathi taûni naara mûruti ngûgî ûyu wa Ngai aarî.

11 Wa beetîîtie kîrîma bathiîte bwa taûni, baakomana na aarî baumagarûkîîte gûtaa rûûyî babaûria, “Muntû ûra wonaga mantû î, arî aaga?” 12 Aarî babu babacookeria babeera, “Yîî arî ku, arî waagu mbere yenu. Îîndî angoangaani n'îndî aaya taûni, n'ûntû îmunthî antû i bakûruta kîgongwana bantû ara aûkîîru. 13 Wona bwathûngîra taûni bûkamwona mbere atirathi bantû ara aûkîîru kûrîa n'ûntû antû batiirîa mbere atirakinya athaarima kîgongwana. Aarîîkia kûthaarima kîgongwana, bara beetîîtwe i rîo barîîyaga. Îthiiyangaani na mpwî bûmwone wa îîndî.” 14 Saûrû na mûruti ngûgî wake beetia bwa taûni. Warîra bakîthûngîra mwîrîgaani baakomana na Samweri aumagarûkîîte athiîte bantû ara aûkîîru.

15 Îgorooni mbere Saûrû aaya, Mwathani n'arî akûgwûrîra Samweri amwîra, 16 “Rûû thaa ta ino ngagûtûmîra muntû kuuma nthîgûrû ya Benjameni kaingo ûmwîtûûrîria maguta atuîka mûtongoria wa antû baakwa Isiraeri. N'we akoonokia antû baakwa kuuma njaraani cia Afirisiti, n'ûntû i mboneete kînyamaara kîra antû baakwa barî nakîo na kinya kîrîro kîao igînkinyîrîîte.”

17 Rîra Samweri oonire Saûrû, Mwathani amûririkania amwîra, “N'ûyû muntû ûra ndarakwîraga mantû maake, ûyû n'we ûkaatha antû baakwa.” 18 Saûrû akomana na Samweri waagu mwîrîgaani amûûria, “Ntigûkûûria bai, i nakû nyomba ya muntû ûra wonaga mantû îrî?” 19 Samweri amûcookeria amwîra, “I niûgû mbonaga mantû. Kûrûka ûthiiyage ûrî mbere naara bantû ara aûkîîru n'ûntû îmunthî bûkaarîyanîra naani, na rûû rûkîîrî i rîo ûkeenûka ndaarîîkia gûkwîra mantû monthe mara marî nkorooni yaku. 20 Mang'ooi meenu mara maraûrîîte ntugû ithatû nthiru na ûtamathûganîria kaîrî, i maroonarire. N'ûû we Aisiraeri bonthe beerîgagîîra? Anga ti woû na mûciî wa abaagu unthe?” 21 Saûrû amûcookeria amwîra, “Niû ndî wa mwîrîga wa Benjameni, kamwîrîga kara kaniini kîrî mîîrîga yonthe ya Isiraeri, na mûciî wetû nuu wa nthî buru kîrî mîciî yonthe ya mwîrîga wetû. I kî îîndî n'ûntû wambîîra ûûgû?”

22 Rîru Samweri aathûkia Saûrû na mûruti ngûgî wake abaira kanyomba ka ageni bantû ara aûkîîru. Abeera bakare mbere rûteere rûra rwakari antû bara baarî beete. Baarî antû ta mîrongo îthatû. 23 Samweri eera mûrugi, “Reete nyama îra mbûnenkeere ndabwîra bûmîaige mwanya.” 24 Mûrugi aathûkia kûgûrû na ara aareeta mbere ya Saûrû. Samweri amwîra, “Bibi i bio ûkwaigîrîtwe. Îrîa n'ûntû wanenkerwa kagiita gaka, kaingo ûrîîyanîra na ageni.” Kwoogu Saûrû arîîyanîra na Samweri ntugû înu. 25 Rîra baumire bantû ara aûkîîru beendama bwa taûni, Samweri baaranîria na Saûrû barî rûûgûrû rwa nyomba.

Samweri aatûûrîria Saûrû maguta atuîka mûnene

26 Bagûûkîîra rûkîîrî mûno, Saûrû arî rûûgûrû rwa nyomba, Samweri amwîta amwîra, “Îîbîthîranie kaingo nkuumagaria.” Rîra Saûrû eebîthîraniirie, baumagarûkania na Samweri.

27 Wa beendamîîte, rîra baakinyire mûthiani wa taûni, Samweri eera Saûrû, “Îra mûruti ngûgî waku athiiyage arî mbere yetû.” Akûthiiyanga amwîra, “Ta tûrûngame aaga kagiita gaakai nkûnenkere ntûmwa ya Mwathani.”