Aisiraeri baaromba beewa mûnene
8
1 Rîra Samweri aakûrire, aatuîkithiirie aana baake agiiti magamba ba Isiraeri. 2 Wa mbere eetagwa Njoeri na wa baîrî eetagwa Abiya. Bonthe baarî agiiti magamba ba Beeriseba. 3 Îndî aana baba baake bataathingata njîra cia îthe. Baaceriirie njîra ciao cia gwîtongia, baatua kûthûkia ngukumo na bakarega kûthingata ûmma bakîgambithania.4 Akûrû bonthe ba Isiraeri beethîrana baaya kîrî Samweri Rama. 5 Bamwîra, “Ta cûûba! Ûrî ûmûkûûrû, na aana baaku batikûthingata njîra ciaku. Îîndî tûthuurîre mûnene ûra agaatûtongoria na atûme tûkare ta mîgongo îra îîngî.” 6 Rîra baugire, “Tûnenkere mûnene wa gûtwathaga,” Samweri eegua ainyîîrîka mûno, na aaromba Mwathani. 7 Mwathani amûcookeria amwîra, “Thikîîria bûra antû babu bagûkwîra n'ûntû ti woû bakûrega, i niû baarega ntuîka mûnene wao. 8 Wa bûra baandûthîîre kuuma ntugû îra ndaabarutire Miisiri mwanka îmunthî i bandegeete na baatua kûgongaga ngai ciingî, na nwabu bagûkûrûtha wana woû. 9 Îîndî bathikîîrie na ûbakaanie nainya mûno ûkîboonagia bwega mantû mara mûnene akaabarûthîra wona abaatha.”
10 Samweri eera antû babu baamûrombaga mûnene mantû monthe mara Mwathani aamwîrîîte. 11 Abeera, “Mûnene ûra ûkaabwathaga ûkeegua akari ûûgû: Akaathûkia nthaka cienu acituîkithie acikaarî baake na bara bangî ba kûrutaga ngûgî nkaarîîni ciake cia ndûa, bara bangî bakûthiyaga na mbaraathi ciake, na bara bangî bakûthiyaga baugîîtie barî mbere ya nkaarî ciake cia ndûa. 12 Agaatuîkithia bamwe atongoria ba kwathaga njûûrî cia antû ngiri, na bara bangî mîrongo îtaano, bara bangî ba kûrîmaga, kwanda na gûkethaga mîndaani yake. Na bara bangî ba kûthondeka mathaga ma ndûa na into bia nkaarî cia ndûa. 13 Na aarî beenu nabo athûkie abatuîkithie ba kûmûrûthîra mîtaa, arugi baake na akandi ba mîgaate. 14 Na akaathûkia ithaka bienu bira biega, na mînda yenu ya mîcabiibû na ya mîceituuni aneenkere aruti ngûgî baake. 15 Akaathûkia gîcuncî gîa îkûmi kîa irio bienu na gîa ncabiibû cienu aneenkere atongoria baake na aruti ngûgî baake. 16 Akaathûkia nkombo cienu cia arûme na cia aka, na ng'ombea cienu ira mbega na mang'ooi ikamûrutagîre ngûgî. 17 Akaathûkia gicuncî gîa îkûmi kîa mbûri na ng'ondu cienu na bwinthe ûkeegua bûrî nkombo ciake. 18 Kagiita gaku bûkaarîra mûno n'ûntû bwa mûnene ûra bwîthuurîrîîte bwingwa îndî Mwathani atiîgua kîrîro kîenu.”
19 Amwe na ûgu antû baarega kûthikîîria Samweri. Bamwîra, “Ng'ong'o, tûrîenda mûnene wa gûtwathaga, 20 kaingo wana tiû tûkara ta mîgongo îra îîngî, twîgue tûrî na mûnene wetû wa gûtwathaga na kinya agatûtongoreeria ndûani.” 21 Samweri akwîgua bunthe bûra antû bauga, aaromba Mwathani akîmwîraga mantû mamu mongwa. 22 Mwathani eera Samweri, “Barûthîre bûra bakuuga, ûbathuurîre mûnene.” Rîru Samweri eera akûrû babu ba Isiraeri ata rî, “Wa muntû n'enûke bwa gwake.”