7
1 Kwoogu antû ba Kiriathi-Njearimu baayîra îthandûkû rîa Mwathani bariira nyomba ya Abinandabu îra yarî karîmaani, baacooka baathûra mwana wake Eriasari kaingo arîkaragia.Samweri atuîka mûgiiti magamba wa Isiraeri
2 Îthandûkû irîakarire Kiriathi-Njearimu îgiita rîîraaya, ta mîanka mîrongo îîrî. Antû bonthe ba Isiraeri baarîrîra Mwathani. 3 Samweri eera antû bonthe ba Isiraeri ata rî, “Ûkaaya kwîgua bûgacookera Mwathani bûrî na ûmma nkorooni cienu, na bûgatiganîria ngai cia ûrongo na mîbuanaano ya Asitorethi, na bwerekeerie nkoro cienu kîrî Mwathani na bûmwathîkîre arî wenka, n'we akabûtuunyûkia njaraani cia Afirisiti.” 4 Kwoogu Aisiraeri baatiganîria ngai cionthe cia mîbuanaano ya Mbaari na Asitorethi batua kûgongaga Mwathani wenka.
5 Rîru Samweri abeera, “Aisiraeri bonthe îthîranaani Misipa mbûrombere kîrî Mwathani.” 6 Aisiraeri beethîrana Misipa, bataa rûûyî bagîtûûraga mbere ya Mwathani kîrî kîgongwana. Baatîîrîra kûrîa biakûrîa ntugû înu bakiugaga, “I twîyîrîîtie Mwathani.” Na Samweri nwe aarî mûtongoria wa Aisiraeri barî Misipa.
7 Rîra Afirisiti beegiirue Aisiraeri ibakomanîîte Misipa, anene ba Afirisiti beetia baathi kûrûa nabo. Aisiraeri bakwîgua njûûrî ya Afirisiti n'îyîîte kûrûa nabo baamaka mûno. 8 Antû ba Isiraeri beera Samweri ata rî, “Menya ûtiga gûtûrombera kîrî Mwathani Ngai wetû kaingo atûtuunyûkia kuuma njaraani cia Afirisiti.” 9 Samweri aathûkia kagondu gagwonka aarutîra Mwathani kîgongwana gîa kûbîîthia kaûmbeene. Aaromba Mwathani n'ûntû bwa Isiraeri na Mwathani amwîgua. 10 Samweri akîrutaga kîgongwana gîku gîa kûbîîthia, Afirisiti baayanga akubî barûa nabo. Îndî Mwathani aagondoka nainya ta nkwa kuuma îgûrû mwanka baarigicana, nabo baanyagaarua n'Aisiraeri. 11 Aisiraeri baumania na Afirisiti, beengana nabo, babaûraga kwanjîîria agu Misipa kûthi mwanka mbere ya Bethi-Kari.
12 Samweri aathûkia iiga arîînjîra gatîgatî ka Misipa na Seni, arîîta “Ebeneseri,a” n'ûntû augire, “Mwanka agu îîndî Mwathani agûtûteethia.” 13 Afirisiti bakûûmbwa n'Aisiraeri, Mwathani n'arigîîrie Afirisiti batikaithûkîre Isiraeri ûtongoriani bunthe bwa Samweri. 14 Taûni ira Afirisiti baataîte kuuma kîrî Aisiraeri ciacookua, kuuma Ekironi, mwanka Ngathi, na kinya nthîgûrû yonthe îra Afirisiti baathûkîîtie kuuma kîrî Aisiraeri yacookua. I kwagîîre kinya na ûkiri gatîgatî ka Aisiraeri na Aamori.