Afirisiti baacookia îthandûkû rîa Mwathani
6
1 Îthandûkû rîa Mwathani rîakarîîte nthîgûrû ya Afirisiti mîeri mûgwanja. 2 Rîru Afirisiti beeta athînjîri na aringia babaûria, “N'ata tûkûrûthana na îthandûkû rîrî rîa Mwathani. Twîreeni bûra tûkarîcookangia naara rîaumire?”3 Nabo babacookeria babeera, “Bûgîcookia îthandûkû rîa Ngai wa Isiraeri, bûtikarîcookie njara i ntheri, îndî bûtûmane kinya na kîgongwana n'ûntû bwa îbîtia. Rîru bûkoorua na i rîo bûkamenya kîra kîratûmîîte Ngai abwinyîîria na inya ûgu.” 4 Antû baûria, “I kîgongwana kîbi n'ûntû bwa îbîtia, tûûmba gûtûmana kîrî we?” Babacookeria babeera, “I mîbuanaano îtaano ya moote na îtaano ya mbea îrûthîîtwe na thaabu wa bûra anene ba Afirisiti bagana n'ûntû kînyamaara kîra bûrî nakîo bwinthe amwe na anene beenu i kîmwe. 5 Nwa mwanka bûrûthe mîbuanaano ya moote na ya mbea, ira irathûûkagia nthîgûrû yenu, na bûcooke bûtîîye Ngai wa Isiraeri, kwaûmbîka akathiria inyamaara bira abûretereete biû, ngai cienu na nthîgûrû yenu. 6 I kî n'ûntû bûkûûmia nkoro cienu ta bûra Faraû na antû ba Miisiri baarûthîre, baatûma Ngai abainyîîria na barekeeria aana ba Isiraeri bathi? 7 Îîndî rûthaani nkaarî ya ng'ombe yaimbia bûcooke bûthûkie ng'ombe ciîrî cia nka iciere na iteekîrwa îcoki kaîrî bwithaîkîîre nkaarîîni înu îndî bûcookie tûyaû kiugûûni. 8 Rîru bûthûkie îthandûkû rîa Mwathani bûrîrîîkîîre nkaarîîni. Rûteere rwarîo bwaige kathandûkû kara karî na into bia thaabu bira birutîîtwe birî kîewa gîa kûrekerwa kwa meeyia rîru bûrekeerie ng'ombe na nkaarî îthi. 9 Bûraithîîrie bwega, bûkoona rîîtîîtie rîerekera bwa nthîgûrû yarîo, bwa Bethi-Semesi bûmenye i Mwathani wa Isiraeri ûtûnyamaarîîtie ûgu, îndî rîkarega kûthi bu tûkamenya ti inya yake îratûriingire, îndî i thîîna îratuumîîre woogu.”
10 Baarûtha wa bûra beerîîtwe, baathûkia ng'ombe ciîrî igwonkia baciogeera nkaarîîni înu ya ng'ombe îndî baacookia tûyaû kiugûûni. 11 Baatwethia îthandûkû rîa Mwathani amwe na kathandûkû kara kaarî na mîbuanaano ya moote na mbea cia thaabu. 12 Ng'ombe inu ciakururia nkaarî cierekerete bwa Bethi-Semesi. Ciagwata njîra înu nene ciathi ikîanagia, itaathûkîra bwa ûrîo kana bwa ûmotho. Anene ba Afirisiti baithingata mwanka mwankaani wa Bethi-Semesi.
13 Kagiitaani gaku antû ba Bethi-Semesi i baakethaga ngano naagu kîbondeeni. Rîra baayiûkiirie meetho boona îthandûkû baagwîrua mûno. 14 Nkaarî înu ya ng'ombe yaathûkîra mûndaani wa muntû wetagwa Njosua wa naagu Bethi-Semesi na yarûngama rûteere rwa iiga rîînene. Antû baagiitanga mîtî îra yarûthîîte nkaarî yauma nkû na baathînja ng'ombe inu ciatuîka kîgongwana gîa kûbîîthia kîrî Mwathani. 15 Arawi nabo baakinyûkia îthandûkû rîa Mwathani kuuma nkaarîîni amwe na kathandûkû kara kangî kaarî na into bibu bia thaabu bacitûûgîîria iigaani rîru rînene. Ntugû wa înu antû ba Bethi-Semesi baarutîra Mwathani igongwana bia kûbîîthia na biewa biingî. 16 Na rîra anene bara bataano ba Afirisiti bonire ûgu bacoka Ekironi ntugû wa înu.
17 Mîbuanaano înu yarî ya moote mara ma thaabu Afirisiti baatûmîîte kîrî Mwathani kîrî kîewa gîa kûrekerwa kwa meeyia, wa ûmwe kîrî wa kîra taûni: Asindondi, Gasa, Asikeroni, Ngathi na Ekironi. 18 Nacio mbea cia thaabu ira ciarutîîtwe mûtari wacio waganeene na taûni ira mbirigîre na ntûûra itarî mbirigîre ira icithiûrûkîrîîte ira anene bara bataano barûngamîîrîte. Iiga rîru rînene ara îthandûkû rîa Mwathani rîatûûgîîrue rîrî oogo wana îmunthî, rîrî ûkûûyî bwa bûra gwakarîkire ntugû înu mûndaani wa Njosua naagu Bethi-Semesi.
19 Ngai aûraga antû ta mîrongo mûgwanja ba Bethi-Semesi n'ûntû bwa gûcûûbîîria îthandûkûûni rîa Mwathani. Na antû baagwatwa i kîeba n'ûntû bwa ndingo îînene îra Mwathani aabaringire. 20 Antû ba Bethi-Semesi baambîîria kwîrana ata rî, “N'ûû aûmba kûrûngama mbere ya Mwathani Ngai ûyû mûtheru? Îthandûkû rîrî rîa Mwathani tûkaariira kû tûrîrutarute aaga?” 21 Kwoogu baatûma atûmwa kûri antû ba Kiriathi-Njearimu bakiugaga ata rî, “Afirisiti bakûreeta îthandûkû rîa Mwathani, îndamaani bûrîîyîre bûthi narîo naagu kwenu.”