Îthandûkû rîa Ngai nthîgûrû ya Afirisiti
5
1 Afirisiti bagûtaa îthandûkû rîa Ngai barîkamata kuuma Ebeneseri mwanka Asindondi. 2 Baathûkia îthandûkû rîru rîa Ngai barîthûngîria nyomba ya Ndagoni na barîaiga rûteere rwa mûbuanano wa Ndagoni. 3 Rîra antû ba Asindondi baûkîîre rûûni rûkîîrî beethîra Ndagoni n'îragwîre nthî na nda agu mbere ya îthandûkû rîa Mwathani. Booya Ndagoni bamîcookia ara yakaraga. 4 Kaîrî ntugû înu îîngî bagîûkîîra beethîra Ndagoni n'îragwîre nthîgûrû na nda kaîrî mbere ya îthandûkû rîa Mwathani, îndî beethîra kîongo kîayo na njara i biratuîkire biagwa mwîrîgaani mbureemuuni ya ruungu, îndî kîmwîrî gîku kîngî gîtaarî kîrebûku. 5 I kîo n'ûntû kinya îîndî athînjîri ba Ndagoni na antû bonthe bara bathûngagîra nyomba ya ngai înu Ndagoni ya Asindondi batakinyaga mbureemuuni înu ya ruungu.6 Mwathani ainyîîria antû ba Asindondi mûno na ba nteere ira imîthiûrûkîrîîte na inyamaara bia mîrimo ya kuuma miimba mwîrî. 7 Rîra antû ba Asindondi boonire bûra gûgûkarîka, bauga, “Îthandûkû rîrî rîa Ngai wa Isiraeri i riume aaga n'ûntû n'atûnyamaariirie mûno tiû twingwa na kinya ngai wetû Ndagoni.” 8 Beethîrania anene bonthe ba Afirisiti babaûria, “N'ata tûkûrûthana na îthandûkû rîrî rîa Ngai wa Isiraeri,” Nabo baacookia bauga, “Îthandûkû rîa Ngai wa Isiraeri i rîthaamue riirwe Ngathi.” Kwoogu rîathaamua kuuma Asindondi rîairwa Ngathi. 9 Bakûriira Ngathi, Mwathani aamakia antû ba taûni înu mûno, ainyîîria antû ba taûni înu mûno, ainyîîria antû baîthî na kinya akûrû na ndwari cia kuuma moote. 10 Kwoogu baathaamia îthandûkû rîa Ngai wa Isiraeri bariira Ekironi. Bagûkinya noogo antû ba Ekironi bauga mbu, “Bakûreeta îthandûkû rîa Ngai wa Isiraeri batûûragithia na antû beetû bonthe?” 11 Beethîrania anene bonthe ba Afirisiti. Bakûûya bauga, “Rutaani îthandûkû rîrî rîa Ngai wa Isiraeri aaga. Rîcookieni bantû aarîo oongwa, wegua t'ûgu rîgatûûraga twinthe na antû beetû.” N'ûntû Ngai n'abainyîîritie mûno na baamaka n'ûntû antû baingî mûno i baarî bagûkua. 12 Bara bataakua baumaga moote. Kwarî na kîrîro kîînene mûno taûni înu mwanka gîakinya îgûrû.