4
1 Ntheto ira ciagwûrîîrwe Samweri i ciamenyekire Isiraeri yonthe.Îthandûkû rîa Mwathani rîataîgwa n'Afirisiti
(Kagiitani gaku, Afirisiti mûkwîrî beethîrana bathi kûrûa na Aisiraeri.) Aisiraeri nabo bauma kaingo barûa nabo. Baamba marema maao bantû eetagwa Ebeneseri, na Afirisiti nabo baamba maao bantû eetagwa Afeki. 2 Afirisiti beebanga kûrûa na Aisiraeri, na bakûrûa Aisiraeri baaturwa n'Afirisiti, na ta antû ngiri inya ba njûûrî ya ndûa ya Aisiraeri baûragwa. 3 Rîra bara baatigarire baacookire kambîîni, atongoria ba Isiraeri baûrania ata rî, “I mbi yaatûma Mwathani areka tûturwa n'Afirisiti îmunthî? Tûthiini tûgîîre îthandûkû rîa kîrîîkanîro rîa Mwathani Mwene Inya kuuma Siro, na twarîkamata twathi narîo ndûani, Mwathani akaathiyania amwe naati na agatûtuunyûkia kûrî anthû beetû.” 4 Baatûma antû baathi Siro bagîîra îthandûkû ria maathana ma Mwathani wa Njûûrî ûra ûkaraga gatîgatî ka akerubi. Baaya narîo amwe na nthaka cia Eri ciîrî, Obuni na Finiasi.
5 Rîra îthandûkû rîa kîrîîkanîro rîa Mwathani rîakinyire kambîîni ya Aisiraeri, bonthe baaringire gîtuma bagîkururaga mwanka nthîgûrû yainaina. 6 Afirisiti bakwîgua gîtuma kambîîni ya Aibirania baûria, “Gwa! N'ata gûgûkarîka?” Rira Afirisiti baamenyire îthandûkû rîa Mwathani rîgûkinya kambîîni ya Aisiraeri, 7 baaguaya mûno bauga, “Bûbû bûtonwa kaîrî, ngai ikûûya kambîîni ya Aisiraeri. Kwoogu tûrî thîînaani îmbîî. 8 Ûi kîrî tiû! N'ûû ûgaatûteethia kîrî ngai ino irî na inya? Ino i ngai ira cianyamaaririe Amiisiri na inyamaara bia mîthemba yonthe naara rwanda. 9 Afirisiti, gîtaani inya na bûrûe ta antû arûme, wegua t'ûgu bûkaathagwa n'Aibirania ta bûra bwabaathaga.” 10 Afirisiti baarûa ndûa înu na baatura Aisiraeri baugia mwanka mîciî yao. I kwaûragirwe antû baingî mûno. Acikaarî ba Isiraeri bara baûragirwe baarî ngiri mîrongo îthatû bara baathiyaga ndûani na magûrû. 11 Baathûkia kinya Îthandûkû rîa Ngai na kinya aana ba Eri barî baîrî, Obuni na Finiasi, baûragwa.
Gûkua kwa Eri
12 Mûbenjameni ûmwe augia rwîro kuuma ara ndûa yaarûagîrwa acooka mwanka Siro ntugû weenu. N'ûntû bwa kîeba aatembûranga nguo ciake na eebaka mûthetu. 13 Rîra aakinyire Eri aakari wagu rûteere araithîîrîîtie njîra eteereete îthandûkû rîa Ngai ainyîîrîkîîte nkoro mûno. Muntû ûyu aathûngîra taûni akorokania ntheto cia ndûa kîrî antû bonthe. Na antû baarîra n'ûguaya. 14 Eri akwîgua kîrîro gîku aûria ata rî, “Kîrîro gîku kîonthe i kîa mbi?” Muntû ûra aaya na mpwî kîrî Eri amwîra bûra gwakarîkîîte. 15 Eri aarî na ûkûrû bwa mîanka mîrongo kenda na înaana na naarî akwanjîîria kûûra meetho. 16 Muntû ûyu amwîra, “I ka ndaamonyoka ndauma ndûani wa îmunthî rîrî.” Eri amûûria, “N'ata gûkarire, mwan'wakwa?” 17 Mûtûmwa ûyu amûcookeria amwîra, “Aisiraeri bakuugia baakuthûka Afirisiti na baûragwa mûno na kinya nthaka ciaku îrî ciîrî, Obuni na Finiasi, ikûûragwa na îthandûkû rîa Ngai rîataîgwa.” 18 Rîra muntû ûyu aagwetire îthandûkû ria Ngai, Eri autûkire kuuma gîtîîni aagwa na ngaragara waagu rûteere rwa mwîrîga. N'ûntû bwa bûra aarî ûmûkûrû na ûmûnoru aunîka nkingo na gûkua. Aatongoreetie Aisiraeri gwa kagiita ka mîanka mîrongo înna.
19 Mûkwa'mwana wa Eri ûra mwekûrû wa Finiasi n'arî na nda na kagiita gaake ga kuurûka i kaarî akubî. Îndî rîra egiirue îthandûkû rîa Ngai rîgûtaîgwa, mwene na îthe wa nthaka nabo i bakuire, aagwatwa n'ûrûrû bwa mwana na agîa na mwana. 20 Mbere atiranyaarûka eekûrû bara bamûteethagîîria bamwîra, “Tiga kûmaka, ûkûgîa na kaana ga kaîyî,” îndî ataatindanîra nabo kana abacookeria. 21 Eeta kaana gaku Ikabondi,a akiugaga, “Ûkumio bwa Ngai i bûraumire Isiraeri,” n'ûntû îthandûkû rîa Ngai i rîratairwe, mwene na îthe wa nthaka nabo i barakuire. 22 Rîru auga, “Ûkumio bwa Ngai i bûraumire Isiraeri n'ûntû îthandûkû rîa Ngai i rîratairwe.”