Mwathani eeta Samweri
3
1 Kwoogu mwana ûyu Samweri aarutîra Mwathani ngûgî agîteethagîîria Eri. Ntugûûni inu kiugo kîa Mwathani kîarî gîkûnyiia mûno na mantû ma kûgwûrirua manyiia kûri antû. 2 Eri n'aarî akwanjîîria kûûra meetho. Ûtugû bûmwe amaami kîmaamooni gîake kîra amaamaga, 3 na Samweri amaami Nyomba ya Mwathani ara Îthandûkû rîa Ngai rîarî, taa ya Ngai îtaarî îkwora. 4 Mwathani eetana, “Samweri!” Samweri eetîga auga, “Yîî ndî aaga!” 5 Aumbuthûka aathi kîrî Eri amwîra, “Nkûûya n'aata ûkuugaga?” Eri amûcookeria amwîra, “Îcooka ûkamaame ntiragwîta.” Samweri aacooka amaama. 6 Mwathani eetana rîa maîrî, “Samweri!” Samweri aûkîîra kaîrî aathi kîrî Eri amwîra, “Nkûûya, n'aata ûkuugaga?” Eri amûcookeria amwîra, “Itû mwan'wakwa ntiragwîta îcooka ûkamaame.” 7 Samweri ataarî akûmenyana na Mwathani na kiugo kîa Mwathani gîtaarî gikûgwûrwa kîrî we. 8 Mwathani eeta Samweri rîa mathatû, Samweri aûkîîra aathi kîrî Eri amwîra, “Nkûûya n'aata ûkuugaga?” Rîru i rîo Eri aaciûkîîrwe amenya i Mwathani agwîta mwana ûyû. 9 I rîo Eri eerire Samweri ata rî, “Îcooka ûkamaame na wegua ûgîîtwa kaîrî ûcookie uuge, ‘Aria naani Mwathani mûruti ngûgî waku n'akwîgua.’ ” Samweri acooka kîmaamo gîake aamaama. 10 Mwathani aaya aarûngama waagu rûteere wa ta mbereeni eetana, “Samweri! Samweri!” Samweri acookia auga, “Aria mûruti ngûgî waku n'akwîgua.”11 Mwathani eera Samweri ata rî, “Nkaarûtha ûntû Isiraeri bûra bûkaathandîkia matû ma muntû wonthe ûra ûkaabwîgua. 12 Ntugû înu nkaûyûria mantû monthe mara ndaaroaria n'ûntû bwa Eri na mûciî wake kuuma kîambîrîria mwanka mûthia. 13 N'ûntû i mwîrîîte, ngaakaanûkia mûciî wake tene na tene, n'ûntû bwa ûthûûku bûra aiyî. N'ûntû aana baake i beereteere kîrumi nwe ataabagiria. 14 Kwoogu i nthiîtîrîîtie mûciî wa Eri n'ûntû meeyia maao matirekereka wana kinya bakaandutîra kîgongwana kîa mûthemba ûrîkû rî kana rî.”
15 Samweri amaama mwanka rûûni rûkîîrî. Aûkîîra aarugûra mîrango ya Nyomba ya Mwathani wa ta wîthîre, îndî n'eegagua ûguaya bwa kwîra Eri mantû mara Mwathani aamwîrîîte. 16 Eri amwîta, “Samweri, mwan'wakwa.” Samweri amûcookeria amwîra, “Yîîî!” 17 Eri amûûria, “N'ata Mwathani arakwîrire? Mbîîra ûtakûmbitha gîntû, na wambitha Ngai arookûrûthîra mantû mamu monthe wambitha na kinya nkûrûki.” 18 Kwoogu Samweri eera Eri mantû monthe mara Mwathani aamwîrire atakûmwitha n'wa bûmwe. Eri akwîgua mantû mamu auga, “I Mwathani, na n'arûthe bûra akwona bûrî bwega.”
19 Samweri aakûra Mwathani arî amwe nwe. Na Mwathani ataareka ûntû bunthe bûra Samweri augaga bûûra mana. 20 Na Aisiraeri bonthe kuuma Ndani îra îrî mûthiani wa neegûrû mwanka Beeriseba îra îrî mûthiani wa naiti i baamenyîre ka mma Samweri i kîroria gîa gwîtîgîka kîa Mwathani. 21 Mwathani n'athiire na mbere kwîbonania kaîrî kîrî Samweri naagu Siro gûkûrûkîîra kiugo gîake.