Ana aina rwîmbo rwa gûkumia Ngai
2
1 Ana aromba akiugaga,“Nkoro yakwa n'îgûkeneera Mwathani,
ara inya yakwa yuumaga,
kayû gaakwa i gaûkîîrîîte kîrî anthû baakwa
ndîgwîrua n'ûntû n'ûntetheetie.
2 Gûtirî we mûtheru ta Mwathani,
gûtirî ûngî ûkari ta we,
gûtirî rwara rûngî ta Ngai wetû.
3 Bûtikaaragie bûgîîkumagia,
biugo bia wîkumia bitikaume tûnyuani twenu,
n'ûntû Mwathani i Ngai ûra ûmenyaga mantû monthe,
na nathimaga ngûgî cietû.
4 Nta cia bara barî inya n'imbunaange,
îndî bara barî bionje i bagîîte inya.
5 Bara barabaaga îîndî i bakûrîmia boona gîakûrîa,
îndî bara baraari na yûûra îndî i babai.
Nthaata n'îraciarire twana mûgwanja,
îndî ûra araarî na twana tuingî atigîîtwe njara i ntheri.
6 Mwathani n'we ûûragaga kana agatûûria mwoyo,
n'we atûmaga antû beendama nthikoonia na n'we ariûkagia.
7 Mwathani n'we ûtûmaga muntû atuîka nkîa kana gîtonga,
n'we gwînîkaga muntû bwa nthî kana akamûûkîîria bwa îgûrû.
8 N'aûkagîîria nkîa kuuma tîîriini,
na agaûkîîria mûthîîni kuuma kîthûmbaani kîa muu,
agatûma bakaranîîra na atongoria,
na akabaa gîtî kîa ûnene na gîtîîyo.
Mîcingi ya nthîgûrû n'ya Mwathani,
îgûrû rîayo noogo aakîîte nthîgûrû.
9 N'amenyagîîra magûrû ma atheru baake,
îndî bara bathûûku bagaakirua mwinduuni,
n'ûntû muntû atiûmbanaga n'inya yake wengwa.
10 Anthû ba Mwathani bakaarebûrangwa marebûrû marebûrû,
akabagondokera ta nkwa kuuma îgûrû.
Mwathani akaagambithia nthîgûrû yonthe,
akaaneenkera mûnene wake inya,
na oongeere inya ya mwîtûûrîrua maguta wake.”
11 Rîru Erikana aacooka gwake Rama. Nako kaana gaku Samweri gaakara Siro gakîrutagîra Mwathani ngûgî karî ûrûngamîîriini bwa Eri mûthînjîri wa Ngai.
Ûthûûku bwa nthaka cia Eri
12 Aana ba Eri baarî antû baathûûku na bataatîîyaga Mwathani, 13 kana watho bwa athînjîri ba Ngai rîra bakûrutîra antû ngûgî. Warîra muntû aaruta kîgongwana, nyama ikîtherûkaga, nkombo ya mûthînjîri wa Ngai yayaga na mûmuunti ûrî na mpang'a ithatûb agwete na njara 14 agautombeka nyûngûûni na nyama ira mûmuunti ûyu akaamunta ikairîrwa mûthînjîri wa Ngai. Ûûgû i bu baarûthagîra Aisiraeri bonthe bara baathiyaga kûgongera Ngai naagu Siro. 15 Kaîrî mbere ya mathuunya matirabîîthua, nkombo ya mûthînjîri wa Ngai yaathiiyaga îkeera ûra ûkûruta kîgongwana ata rî, “Nenkera mûthînjîri wa Ngai nyama agookie atikwenda înduge.” 16 Na muntû ûyu akîîya kûmûcookeria akamwîra eteere aniini mathuunya maambe mabîe, rîru athûkie ira akwenda, aamûcookagîria akamwîra, “Arî, nenkera wendî kana nthûkie na taka.” 17 Kwoogu meeyia ma nthaka inu i maarî maingî mûno mbere ya Mwathani, n'ûntû itoonanagia gîtîîyo kîrî igongwana bia Mwathani.
18 Kwoogu Samweri aarutîra Mwathani ngûgî. Nwe aarî mwana eekagîra efondi yatumîîtwe na gatani. 19 Gina n'amûtumagîra kabuuti kaniini woora mwanka akamûretera rîra baayanagia na mwene n'ûntû bwa kûruta kîgongwana kîa wa kîra mwanka. 20 Nwe Eri akathaarima Erikana na mwekûrû wake akîbeeraga, “Mwathani aroobûnenkera aana bangî na mwekûrû ûyû bakathûkia kaanya ka ûyû bûnenkanîrîîte kîrî Mwathani.” 21 Mwathani eegua Ana kîao aagîa na nthaka ithatû na aarî baîrî. Îndî kaîyî gaku Samweri gaakûrîra Nyomba ya Mwathani naagu Siro.
22 Eri n'aarî agûkûra mûno. Eegua bunthe bûra aana baake baarûthaga Isiraeri yonthe na bûra baamaamaga na aka bara baarutaga ngûgî mwîrîgaani wa îrema rîa kûrîîkanaga, 23 abaûria, “I kî n'ûntû bûkûrûtha ûûgû? Woora muntû arîmbîîra mantû maathûûku mara bûkûrûtha. 24 Aana baakwa, n'ûntû mantû mama nkwîgua magîtaamba antûûni ba Mwathani ti mantû meega, tiganaani namo. 25 Muntû akabîtîria ûra ûngî, Ngai akamûgambithia. Îndî muntû akabîtîria Mwathani gûtirî we ûmûtheteera.” Îndî amwe na ûgu bataathikîîria îthe, n'ûntû Mwathani n'abangîîte kûbaûraga. 26 Kaana gaku Samweri gaakûra gakîendagwa i Mwathani na kinya antû.
Ûroria îgûrû rîa mûciî wa Eri
27 Ntugû îmwe mûruti ngûgî wa Ngai aaya kîrî Eri amûretera ntûmwa îno kuuma kîrî Mwathani, amwîra ata rî, “Rîra mûciî wa kîûyûûyû kîenu warî nkombo nthîgûrû ya Miisiri, bakîrutagîra Faraû ngûgî, nteebonaniirie bwega kîrî bo? 28 I ndaathuurire mûciî wake kuuma kîrî mîîrîga yonthe ya Isiraeri batuîka athînjîri baakwa, barutaga ngûgî kîthînjîrooni, babîîthagia macoco na bageekîra efondi mbere yakwa. Na ndaanenkera mîciî ya ûyûûgu icuncî bia igongwana bionthe bira birutagwa n'antû ba Isiraeri. 29 Îîndî i kî n'ûntû bûgûtanûkîra igongwana na biewa bira mbathanîîte? I kî n'ûntû bûgaatîîyaga aana beenu nkûrûki yakwa, bûkîrîîyaga icuncî bira biega bia igongwana bia antû baakwa Isiraeri bûkaanora?
30 “N'ûntû bwa ûgu, Mwathani Ngai wa Isiraeri ariuga ûûgû, ‘I mma i ndaugire ati mûciî gwaku na wa abaagu bagaantûmîkagîra tene na tene.’ Îndî îîndî Mwathani ariuga, ‘Ûntû bûbû bûtiîgua bûrî oogo kaîrî! N'ûntû ntîîyaga bonthe bara bantîîyaga na nkamena bara baamenaga. 31 Ntugû n'îyîîte îra nkaathiria rûciaro rwaku na rûrîîyo rwa abaagu warîra rwaganaanîria, na gûtikooro kwonara mûkûrû. 32 Ûkaathîîna na wîgue rûriitho n'ûntû bwa ithaarimo bira nkaathaarima nabio antû bara bangî ba Isiraeri. Na mûciî wenu gûtirî we akaarîîra ûkûrû. 33 Amwe na ûgu ngaatigaria muntû ûmwe wa rûrîîyo rwaku na akaandutîra ngûgî ta mûthînjîri îndî akaûra meetho na aage wîrîgîîro. Îndî antû babu bangî ba rûrîîyo rwaku bagaakuuyaga warîra baaganaanîria. 34 Kaingo ûmenya nkaarûtha mantû mama, gîkî i kîo kîonanîîria kîra ûkoona, aana baaku barî baîrî, Obuni na Finiasi bagaakua ntugû îmwe. 35 Nkeethuurîra muntû ûngî mwîtîgua na ûra akaambathîkîra atuîke mûthînjîrî wakwa. Ngeetîgîîria nciarwa ciake indutîra ngûgî ya ûthînjîri rîonthe na ateetheeria mwîtûûrîrua maguta wakwa. 36 Na ûra akeegua atigeere mûciî wenu, akaathiyaga kîrî mûthînjîrî ûyu wakwa enyiîtie na akamûrombaga mbia na karebûrû ka mûgaate na akamûromba amwîtîgîîrie ateetheerie ngûgîîni ya ûthînjîri kaingo oona gîntû gîa kûrîa.’ ”