1 SAMWERI
Gûciarwa gwa Samweri
1
1 I kwarî na mûkûrû ûmwe wa Ramathaimu-Sofimu, wa kuuma nthîgûrû ya irîma ya Eburaimu eetagwa Erikana. Aarî mwana wa Njeroamu, Njeroamu mwana wa Eriu, Eriu mwana wa Tou, Tou mwana wa Subu Mûeburaimu. 2 Erikana aarî na eekûrû baîrî, ûmwe eetagwa Ana na ûra ûngî eetagwa Penina. Penina n'aarî na aana, îndî Ana ataarî nabo. 3 Wa kîra mwanka Erikana neetagia kuuma taûni yake akathi Siro kûgonga na kûrutîra Mwathani wa Njûûrî igongwana naara aana ba Eri baîrî, Obuni na Finiasi, baarî athînjîri ba Ngai. 4 Rîra ntugû ya kîgongwana yaakinyaga, Erikana aanenkagîra Penina na aana baake ba nthaka na ba aarî icuncî biao. 5 Îndî kîrî Ana aamûnenkagîra icuncî biîrî n'ûntû n'amwendeete mûno na kinya wegua Mwathani n'aamûtuîkithîîtie nthaata. 6 N'ûntû bwa bûra aarî nthaata mwîruue Penina aakaraga akîmûnyûrûntaga na akîmwîgwithagia naaî. 7 Ûûgû i bu waakarîkaga woora mwanka. Warîra Ana eetagia Nyomba ya Mwathani, mwîruue aakaraga akîmûnyûrûntaga agatua kûrîra na akaremwa i kûrîa. 8 Mûkûrû wake Erikana oona ûgu akamûûria, “Ana, I mbi ûkûrîrîra? I kî n'ûntû ûtakûrîa? I kî n'ûntû ûkuîte nkoro? Anga niû ntikûganîîte kinya nkûrûki ya nthaka îkûmi?”9 Ntugû îmwe bakûrîîkia kûrîa biakûrîa na kûnyua naagu Siro, Ana aûkîîra, aathi kûromba. Kagiita gaku, Eri mûthînjîri wa Ngai aakari gîtîîni gîake waagu mwîrîgaani wa Nyomba ya Mwathani. 10 Mwekûrû ûyu n'ainyîîrîkîîte mûno nkorooni, aaromba Mwathani akîrîraga arî na ûrûrû mûno. 11 Aathiîtîria Mwathani amwîra, “Mwathani wa Njûûrî, ûkeegua ûkoona kînyamaara gîakwa niû nkombo yaku ya mûka na ûndirikane na ûtiiriganîrua i niû, ûmpe kaana ga kaîyî, naani ngakanenkanîra kîrî Mwathani ûtûûro bwako bunthe na kîrunya gîtikaaringithîa kiongo giako n'wari.” 12 Wa bûra aathiîte mbere kûromba Mwathani, Eri n'waka araithîîrîîtie kanyua gaake. 13 Ana aarombaga na nkoro, n'wa mîromo yonyoonyaga na gûtirî kayû keeguîkaga. Eri aathûgaania mwekûrû ûyû natogooneete. 14 Eri amûûria, “N'ûgatogoona mwanka rî? Thiria ntogoona yaku.”
15 Ana amûcookeria amwîra, “T'ûgu, mwathi wakwa! Niû ndî mwekûrû ûrî na kînyamaara kiingî mûno, ntinyuîte ndibei kana ncoobi. Ga ngwîtûûraga nkoro yakwa kîrî Mwathani. 16 Ûtikaathûgaanie ndî mwekûrû wa ûtheri, i nkûrombaga Mwathani n'ûntû bwa kînyamaara kîînene na ûrûrû bwingî bûra ndî nabu nkorooni mwanka îîndî ûgu.” 17 Eri amwîra, “Îthi bwega, Ngai wa Isiraeri arookûnenkera bira wamûromba.” 18 Ana acookia auga, “I bwega n'ûntû bwa kûmbîgîîrua kîao.” Aumagarûka aathi aarîa biakûrîa na ûthiû bwake bûtaacooka gûkûnjara kaîrî.
19 Baûkîîra kûrîo rûûni rûkîîrî baagonga Mwathani rîru beenûka bwa kwao Rama. Erikana amaama na mwekûrû wake Ana na Mwathani amûririkana. 20 Mwankaani wooyu Ana aagîa nda aciara kaana ga kaîyî ageeta Samweri akiugaga, “N'ûntû i ndarakarombire kîrî Mwathani.”
21 Rîra kagiita gaakinyire kaîrî ka Erikana na mûciî wake gwîtia Siro kûrutîra Mwathani kîgongwana kîa wa kîra mwanka na kûûyûria mûthiîtio ûra aathiîtîîrie Mwathani, 22 Ana ataathi. Eerire mûkûrû wake ûûgû, “Woona mwana atiga gwonka i rîo nkaamwira Nyomba ya Mwathani agatûûre noogo ûtûûro bwake bunthe.” 23 Erikana amûcookeria amwîra, “Rûtha bûra ûkwona bûkîbua. Eteera mwanka mwana atige gwonka na Mwathani aroogûteethia kûûyûria mûthiîtio waku.” Kwoogu Ana ataathi Siro, aakarire mûciî agîonkagia mwana wake.
24 Mwana agûtiga gwonka, Ana aamûthûkiirie amwe na ncamba ya ng'ombe ya ûkûrû bwa mîanka îthatû, mûtûngi ûmwe wa mûtu na îthatwa rîa ndibei amwira Siro Nyomba ya Mwathani. 25 Bakûrîîkia kûthînja ncamba ya ng'ombe baareeta mwana kîrî Eri. 26 Ana eera Eri ata rî, “I mma mwathi wakwa, wa ta bûra ûtûûraga mwoyo mwathi waakwa, i niû mwekûrû ûra aarûngi aaga mbere yaku bantû aaga akîrombaga Mwathani. 27 I ndaarombire mwana ûyû na Mwathani ampa kîra ndamûrombire. 28 Na n'ûntû bwa ûgu îîndî, i nkûmûnenkanîra kîrî Mwathani ûtûûro bwake bunthe, atuîke wa Mwathani.” Nyuma ya ûgu bagongera Mwathani agu.