Pasaka
16
1 Musa aathi na mbere kwîra antû ba Isiraeri, “Tîîyaani Mwathani Ngai wenu na njîra ya gûkeneera kîatho gîa Pasaka mweri wa Abibu,a n'ûntû mweri ûyu nuu Mwathani aabûrutire kuuma Miisiri ûtugû. 2 Kîgongwana kîenu gîa Pasaka nwa kîîgue kîrî kîa ng'ondu kana kîa ng'ombe. Na kîbatîîrue kîrutîrwa bantû ara Mwathani Ngai wenu athuurîîte kûgongagîrwa. 3 Bûrîîyanagîrie kîgongwana gîku na mîgaate îtarî na ndawa ya kwimbithia, n'yo i mîgaate îra îbûririkanagia kînyamaara kîra bwonire Miisiri. Bûrîe mîgaate îtarî na ndawa ya kwimbithia îgiita rîa ntugû mûgwanja, ta bûra bwarûthaga rîra bwaumaga Miisiri na manduanga, kaingo bûririkanaga ntugû înu ûtûûro bwenu bunthe. 4 Gûtikeegue kûrî na ndawa ya kwimbithia nthîgûrû yenu îgiita rîa ntugû mûgwanja. Na nyama ira ciathîînjwa ûgoro bwa ntugû îmwe itikaagaigwe mwanka rûûni rûkîîrî. 5 Bûtibatîîrue kûrutîra kîgongwana gîa Pasaka ndeeni ya taûni ira Mwathani Ngai wenu akûbûnenkera. 6 Kîbatîîrue kîrutîrwa bantû ara Mwathani Ngai wenu akeegagua arî kaingo riîtwa rîake rîkumagîrua oogo. Agu noogo bûkaarutagîra kîgongwana gîa Pasaka, ûgoro, riûa rîkîthûa, thaa ta ira bwaumire Miisiri. 7 Bûkîruge na bûrîîre bantû ara Mwathani Ngai wenu akaathuura, na rûûni rûkîîrî bûcooke mîciî yenu. 8 Bûkaarîîyaga mîgaate îtarî na ndawa ya kwimbithia îgiita rîa ntugû ithanthatû. Ntugû ya mûgwanja antû babatîîrue barîîkana bantû amwe kûgonga Mwathani Ngai wenu. Bûtikaarute ngûgî ntugû înu.Kîatho kîa Maketha
9 “Bûtare biumia mûgwanja kwanjîîria maketha ma irio. 10 Rîru bûkûngwîre Kîatho kîa Maketha gîa gûtîîya Mwathani Ngai wenu. Bûmûreetere biewa bia kwîbendera kûringana na bûra abûthaarimîîte bûgana. 11 N'îgiita rîa gûkeneera mbere ya Mwathani Ngai wenu bantû ara athuurîîte agongagîrwa. Bûkeneere na nthaka na aarî beenu, aruti ngûgî beenu ba antû arûme na ba aka, Arawi bara barî taûni cienu, ageni, twana tûkîa, na ntigwa ira irî gatîgatîîni keenu. 12 Bûririkane bwarî nkombo nthîgûrû ya Miisiri. Kwoogu bûmenyeere, bwathîkîre mawatho mama.
Kîatho gîa tûganda
13 “Bûgaakenagîîra kîatho gîa tûganda îgiita rîa ntugû mûgwanja mûthiani wa maketha, nyuma ya irio biabûûrwa na ndibei yabibwa. 14 Bûgaakenagîîra kîatho gîkî na nthaka na aarî beenu, aruti ngûgî beenu ba antû arûme na ba aka, Arawi, ageni, twana tûkîa, na ntigwa ira irî taûniini cienu. 15 Bûkeneere kîatho gîkî ntugû mûgwanja bûgîtîîya Mwathani Ngai wenu bûrî bantû ara athuurîîte, n'ûntû i Mwathani Ngai wenu abûneenkagîra maketha maingî na akathaarima ngûgî cienu cionthe. Kîatho gîkî kîbatîîrue kîîgua kîrî gîkeno kîenu kîînene.
16 “Maita mathatû woora mwanka antû arûme ba Isiraeri bakaayaga mbere ya Mwathani Ngai wenu bantû ara Mwathani akaathuura. Biatho bibi nabio i, kîatho gîa Pasaka, kîatho kîa Maketha na kîatho gîa tûgaanda. Na woora muntû akaathiiyaga na kîewa kîa Mwathani. 17 Woora muntû akaarutaga kîewa kîringeene na bûra akûûmba, kûringana na bûra Mwathani Ngai wenu amûthaarimîîte bûgana.
18 “Ibûbatîîrue bûthuura agiiti ba magamba na anene ba kuuma mîîrîgaani yenu yonthe taûniini ira Mwathani Ngai wenu akûbûnenkera. Atongoria babu babatîîrue bagiitagîra antû magamba batakwendanîîra. 19 Atongoria babu batikaagiite magamba bûra gûtabatîîrue kana beendanîîra. Na batigeetîgîîrie ngukumo n'ûntû ngukumo n'îtûmaga muntû ûmûûgî atiga kwona ûmma na bara baagîru barega gûtuîrwa bûra kûbatîîrue. 20 Îgiita rîonthe bûgiitage magamba bûra kûbatîîrue kaingo bwîgwatîra na bûthi na mbere gûtûûra nthîgûrû îno Mwathani Ngai wenu akûbûnenkera. 21 Bûtikeenjîre gîtugî kîa mûbuanaano wa ngai îra îîtagwa Asera gîkaranîîra na kîthînjîro kîa Mwathani Ngai wenu. 22 Na bûtikaarûthe itugî bia maiga bia kûgongaga, n'ûntû Mwathani Ngai wenu n'abithwîre.”