17
1 Musa aathi na mbere kwîra antû ba Isiraeri, “Bûtikaathînjîre Mwathani Ngai wenu ng'ombe kana ng'ondu îrî na koothûûku, n'ûntû Mwathani Ngai wenu atiikenua i kîo.2 “Rîmwe nwa kûgîe na muntû gatîgatîîni ga taûni ira Mwathani Ngai wenu akûbûnenkera akûrûtha ûthûûku mbere ya Mwathani Ngai wenu na kuuna maathana maake, 3 na njîra ya gûtûmîkîra ngai ciingî na kûgonga riûa, kana mweri, kana mainya mangî ma îgûrû. I mbûkaanîîtie ûntû ta bûbu mûno. 4 Bûkaaya kwîgua ûgu, bûtuîrie mantû mamu bwega. Na wabu wegua ûntû bûbu bûthûûkîîte ûgu i bûkarîkîîte nthîgûrû ya Isiraeri, 5 muntû ûyu arûthîîte ûgu abatîîrue aumagarua ome ya taûni aûragwa na maiga. 6 Îndî bûmenyeere bûtikaûrage muntû n'ûntû bwa ûkûûyî bwa muntû ûmwe. Nwa mwanka wîgue kûrî na ûkûûyî bwa antû baîrî kana bathatû. 7 Ankûûyî i bo bageraga maiga ma mbere, rîru antû babu bangî bakathiingatîîra. Bwarûtha ûgu bûkaathiria ûthûûku gatîgatî keenu.
8 “Rîmwe nwa kûgîe na îgamba rîûmo kûgiita, ta rîmwe nwa bûremwe i kûgiita wegua muntû arûthîîte îbîtia rîa kûûragana kana n'îbîtia rîa kûûragana atakwenda kana n'îbîtia rîîgiî kûguraria muntû mwîrî kana i rîa kwînyangia into. Magamba ta mamu mabatîîrue mairagwa bantû ara Mwathani athuurîîte agongagîrwa. 9 Agu noogo athînjîri ba Ngai ba kuuma mwîrîga wa Rawi na mûgiiti wa magamba ûra akeegua arî ngûgîîni îgiita rîru bakaathikîîria îgamba rîru, na batue bûra bakaarûtha. 10 Bûra bagaatuîra bantû ara Mwathani athuurîîte bûbatîîrue bûrûmîîrwa. Nwa mwanka bûrûthe wa bûra bakauga bungwa. 11 Baarîîkia gûtaûra watho na baagiita îgamba, îtua rîra bagaatua rîbatîîrue rîthingatwa. Bûtikaathûkîre kuuma kîrî bûra bakaabwîra bwathûkîra bwerekera bwa ûrîo kana bwa ûmotho. 12 Muntû ûra akaûmia kîongo aregane na îtua rîa mûgiiti wa magamba kana rîa mûthînjîri wa Ngai ûra atûmîkagîra Mwathani Ngai wenu, abatîîrue aûragwa. Ûthûûku ta bûbu ibûbatîîrue bûrutarutwa Isiraeri. 13 Rîra antû bonthe bakeegua ûgu bagaakuthûka, na batiûmia biongo.
14 “Îgiita rîtarî rîraaya bwengeerie gûkinya nthîgûrû îra Mwathani Ngai wenu akûbûnenkera, bwîgwatîre yoo na bûtûûre ku. Rîru nwa bwanjîîrie gwîciiria, ‘Wana tiû itûbatîîrue twîgua tûrî na mûnene ta mîgongo îra îtûthiûrûkîrîîte.’ 15 Gûkaaya gûkarîka ûgu, bûthuure mûnene ûra Mwathani Ngai wenu athuurîîte. Nwa mwanka bûthuure Mûisiraeri ûmwe wacienu atuîke mûnene wenu. Bûtikaathuure mûgeni. 16 Mûnene atibatîîrue eegua arî na mbaraathi inyingî cia ndûa na atibatîîrue atûma antû baake bathi Miisiri kûgûra mbaraathi, n'ûntû Mwathani augîîte, ‘Bûtigaacooke Miisiri kaîrî.’ 17 Mûnene atibatîîrue agûra eekûrû baingî n'ûntû nwa batûme akaumauma kîrî Mwathani. Na atibatîîrue eebaigîra ûtonga bwingî bwa thaabu na fetha.
18 “Na aanjîîria kwathana, abatîîrue akooberua îbuku rîrî rîa watho rîongwa rîra rîaigagwa n'Arawi. 19 Akarage na îbuku rîrî rîa watho na arîthoomage wa îra ntugû, ntugû cionthe ira agatûûra mwoyo kaingo amenya gûkuthûka Mwathani Ngai wake na njîra ya kwathîkîra maathana monthe ma watho bûbu na moorutani mama. 20 Kûthooma îbuku rîru gûgaatûma atikeebone taka arî mwega kîrî bara bangî na atiikararia mawatho ma Mwathani na njîra nwa îrîkû. Bûbu bûgaatûma aathana îgiita rîîraaya na rûrîîyo rwake rûkaatha Isiraeri nciarwa inyingî.”