Athînjîri ba Ngai na Arawi
18
1 Musa aathi na mbere kwîra antû ba Isiraeri, “Athînjîri ba Ngai amwe na antû bonthe ba mwîrîga wa Rawi, bo batiigaîrwa nthîgûrû ta Aisiraeri bara bangî. Bo bakaarîîyaga rûgai rwao kuumania na igongwana bia kûbîîthua bira birutagîrwa Mwathani. 2 Batiîgua barî na nthîgûrû ta mîîrîga înu îîngî. Bakeerîgagîîra Mwathani. N'we rûgai rwao wa ta bûra aabeerire.3 “Icuncî bibi i bio rûgai rwa athînjîri ba Ngai rîra bwaruta kîgongwana gîa ncamba kana kîa ng'ondu; gîciri, nthea, na into bia nda. 4 Na bûcooke bûbaneenkere maciaro ma mbere ma irio, ndibei, maguta na ma guaya rîra bûkwenja ng'ondu. 5 N'ûntû Mwathani Ngai wenu aathuurire mwîrîga wa Rawi kuuma mîîrîgaani yenu yonthe bamûtûmîkagîra barî athînjîri rîonthe.
6 “Mûrawi nwa athaame kuuma taûni ya Isiraeri wa yonthe akathi gûtûûra bantû ara Mwathani athuurîîte, 7 na agatûmîkagîra Mwathani Ngai wake arî mûthînjîri wa Ngai ta Arawi bara bangî bara batûmîkaga oogo. 8 Akaagaagîrwa rûgai rûganeene na rwa athînjîri bara bangî wana kinya ûkeegua arî na mbia kuumania na ûtonga bwa mûciî wao.
9 “Rîra bûkaathûûngîra nthîgûrû îra Mwathani Ngai wenu akûbûnenkera, bûmenyeere bûtikaathiingate mîtugo îmîthûûku ya mîgongo îra îtuîre ku. 10 Gûtikaagîte nwa ûmwe wacienu akaaruta nthaka kana mwarî wake kîgongwana gîa kûbîîthia na mwanki. Bûtikaareke antû beenu bariingia kana baroga, bariingia mbûgû, kana bathi kwa agao, 11 kana baroga, kana baaria na irundu, kana baaria na nkoma cia booyûûe. 12 Mwathani Ngai wenu n'athwîre antû bara barûthaga mantû mama mathûûku ûgu, na i kîo gîtûmi akwîngatia mîgongo îra îrî mbere yenu. 13 Îtuîkaani baagîru mbere ya Mwathani Ngai wenu. 14 Mîgongo îra bûthiîte kûthûkia kaanya kaayo, n'îrûthaga mantû ma ûgao na kûringia mbûgû. Îndî biû, Mwathani Ngai wenu atikûbwîtîgîîria bûrûtha mantû ta mamu.
15 “Mwathani Ngai wenu agaûkîîria kîroria ta niû kuuma gatîgatîîni ga antû beenu ba Isiraeri na ibûbatîîrue kûmûthikîîria. 16 Bûbû i bu biû bwingwa bwaûriirie Mwathani Ngai wenu rîra bwethîranîîte kîrîmaani kîa Orebu. Bwereka Mwathani bwamwîra bûtikwenda kwîgua mûgambo wa Mwathani Ngai wenu kana bwona mwanki wake ûmûnene kaîrî, bûgîkuthûka gûkua.
17 “Rîru Mwathani ambîîra, ‘Bakuuga bwega. 18 Ngaûkîîria kîroria ta wou kuuma gatîgatîîni ga antû baao. Nkamwîraga bûra akaugaga na akeeraga antû mantû monthe mara nkaamwîraga. 19 Akaaragia bantû akwa na niû ningwa nkaanenkera muntû ûra atakîmwathîkîra îkaanûkia. 20 Îndî kîroria gîkaaya kwaria mantû mara ntakîîrîîte gîkiugaga i niû nkîîrîîte, kana gîkaaria mantû bantûûni a ngai ciingî, kîroria gîku i gîgaakua.’ 21 Nwa bwîbûûrie, ‘N'ata tûkaamenyaga wegua ûroria buumîîte kîrî Mwathani kana bûtiumîîte kîrî we?’ 22 Kîroria gîkaaya kûroria gîkiugaga kîrîroria riîtwani rîa Mwathani ûntû bûna bûgaakarîka, îndî ûntû bûra bûkarega gûkarîka, ûroria bûbu bûtiumîîte kîrî Mwathani. I kîroria gîku gîtuungîîte ûroria bwakîo na bûtibatîîrue kûmakua i bu.”