Taûni cia kwîbitha
19
1 Musa aathi na mbere kwîra antû ba Isiraeri, “Mwathani engeerie kûthiria mîgongo îra îtwîre nthîgûrû îra athiîte kûbûnenkera. Bûkaathi bûbatuunye nthîgûrû yao na bûtûûre taûni na mîciî yao. 2 Bûbatîîrue bwîthuurîra taûni ithatû nthîgûrû înu Mwathani athiîte kûbûnenkera ira antû bakaathiiyaga kwîbitha. 3 Thimaani na bûgaanie nthîgûrû înu Mwathani Ngai wenu akûbûnenkera rûrî rûgai rwenu, magucî mathatû, wa kîra kîgucî kîîgue kîrî na taûni îra muntû aûmba gûkinya kaingo muntû ûra akaûraganaga akaathiiyaga kwîbitha noogo.4 “Muntû akaaya kûûraga muntû atarî mûnthû wake atakwenda, nwa akuthûkîre noogo na akoonokia mwoyo wake. 5 T'endî antû baîrî bakathi kîthakaani gûtema mîtî, na ûmwe agîtema îthoka rîgaciingûka kuuma mûthambîcooni warîo rîkaûraga muntû ûyu ûngî, muntû ta ûyu nwa akuthûkîre taûni inu na akoonokia mwoyo wake. 6 Ûkeegua i taûni îmwe îrî oogo ya kwîbitha, rûgendo rwa kûthi noogo nwa rwîgue rûrî rûûnene mûno bûra muntû wa ba muntû ûra mûûrage, ûra abatîîrue kûrîia gîkuû kîa muntû wake, aûmba kûgwatagwata muntû ûra aûraganîîte na n'ûntû bwa mûthûûro akamûûraga mbere akinya taûni înu ya kwîbitha. Gûgakarîka ûgu, muntû ûra aûraganire mbere akaûragwa na atabatîîrue n'ûntû we aûraganire atakwenda na atibatîîrue aûragwa. 7 Gîku i kîo gîtûmi gîgûtûma mbwîra bwîthuurîre taûni ithatû cia kwîbitha.
8 “Rîra Mwathani Ngai wenu akaaramia mîanka yenu wa ta bûra eerire biûyûûyû bienu akaarûtha, na abûneenkere nthîgûrû yonthe îra augire akabaneenkera, 9 rîru nwa bwongeere taûni ciingî ithatû cia kwîbitha bunka wegua bûkaathîkîra mawatho mara nkûbûnenkera, namo i bwende Mwathani Ngai wenu na bûthiingate njîra ciake. 10 Bwarûtha ûgu bûkaarigîîria gîkuû kîa muntû atarî na mabîtia kîonekana nthîgûrû îra Mwathani Ngai wenu abûneenkereete îrî rûgai rwa mwanya, na bûgaatîîra gûtuîrwa îbîtia rîa kûûragana.
11 “Î gûgakarîka ata rî, muntû ameneete muntû ûra ûngî akamûkabîra, akamûûraga na akaugia akathi taûni îmwe ya kwîbitha. 12 Gûgakarîka ûgu, atongoria ba taûni îra muntû ûyu aûraganîîte aumîîte babatîîrie batûmana mûûragani ûyu acookua taûni yake na bamûneenkanîra kîrî muntû ûra abatîîrue arîia gîkuû kîa muntû wake aûragwa, amûûrage. 13 Bûtikeegîîrue mûûragani kîao, kaingo bûthiria mabîtia ma kûûraga antû batarî na mabîtia nthîgûrû ya Isiraeri kaingo mantû meenu makaathi bwega.
14 “Bûtikaathiiyangie mîanka îra yaigirwe i biûyûûyû bienu gatîgatî keenu na atûûri beenu, nthîgûrû îno Mwathani Ngai wenu akûbûnenkera îtuîka yenu.
15 “Ûkûûyî bwa muntû ûmwe ti bûganu bwa kûgiitîra îgamba muntû ûra athiitangwa akîîragwa n'abîtîîtie. Nwa mwanka kwîgue kûrî na ûkûûyî bwa antû baîrî kana bathatû kaingo îgamba rîru rîthikîîrua. 16 Muntû akaaya kûthûngîria ûra ûngî thîînaani na njîra ya kûruta ûkûûyî bwa ûrongo îgûrû rîake, 17 muntû ûyu agûtuîrîîrwa na ûyu agûtuuyanîîra babatîîrue bathi mbere ya Mwathani, kîrî athînjîri ba Ngai na agiiti magamba bara bakeegua barî ngûgîîni îgiita rîru. 18 Agiiti magamba bagaatuîria ntheto inu bwega. Na wegua muntû i ka agûtuuyagîîra muntû ûra ûngî, 19 muntû ûra agûtuuyanagîîra akaaneenkerwa îkaanûkia rîra muntû ûra agûtuuyagîîrwa akûûyaga kûneenkerwa. Bwarûtha ûgu bûkaathiria ûthûûku gatîgatîîni keenu. 20 Antû bonthe beegua bûra gwakarîka bakaagîa na ûguaya, na gûtirî we akeenda kûrûtha ûntû ta bûbu bûthûûku ûgu kaîrî. 21 Bûtikeegîîrue antû ba mûtheemba ta ûyu kîao. Ûra akaûragana n'we aûragwe, ûra agaatûrana riitho n'we atûrwe riitho, ûra agaakûûrana îgego n'we akûûrwe îgego, ûra akaagiitana njara n'we agiitwe njara, ûra akagiitana kûgûrû n'we agiitwe kûgûrû.”