Mawatho ma ndûa
20
1 Musa aathi na mbere kwîra antû ba Isiraeri, “Rîra bûkaathi kûrûa na anthû beenu na bwone nkaarî ciao cia ndûa na mbaraathi ciao irî inyingî nkûrûki ya cienu, na njûûrî yao îrî înene nkûrûki yenu, bûtikaabakuthûke, n'ûntû Mwathani Ngai wenu, ûra aabûrutire Miisiri akeegua arî amwe naabi. 2 Mbere bwanjîîria kûrûa mûthînjîri wa Ngai akaumîra mbere ya njûûrî na amîarîrie. 3 Akauga, ‘Thikîîriani biû antû ba Isiraeri. Bûkîthi kûrûa na anthû beenu îmunthî, bûtigaakuthûke. Bûtigaatemekie kana bwinaina n'ûntû bwao, 4 n'ûntû Mwathani Ngai wenu n'athiîte amwe naabi. Akabûrwîrîîra kuuma kîrî anthû beenu na akabûnenkera kûûmbana.’5 “Rîru atongoria ba njûûrî bakaarîria njûûrî bauge, ‘I ka kûrî muntû aakîîte nyomba înjerû atakûrî kûmîthaarimithia? Wegua kûrî we, n'enûke. Aûmba kûthi kûûragîrwa ndûani gûgatuîka i muntû ûngî n'we akaamîthaarimithia. 6 I ka kûrî muntû aandîîte mûnda wa mîcabiibû na atiraarî akûrûma maciaro ma mbere ma mûnda ûyu? Wegua kûrî we n'enûke. Aûmba kûthi kûûragîrwa ndûani, gûgatuîka i muntû ûngî akaarîa maciaro maau. 7 I ka kûrî muntû arakeethagia mwarî na atikûrî kûmûgûra? Wegua kûrî we, n'enûke. Aûmba kûthi kûûragîrwa ndûani gûgatuîka muntû ûngî n'we akaagûra mwarî ûyu.’ 8 Rîru atongoria babu ba njûûrî bakauga, ‘I ka kûrî we arî na ûguaya? Wegua kûrî we, n'enûke giria akaaya gûteereera muntû ûngî ûguaya.’ 9 Atongoria ba njûûrî baarîîkia kwarîria njûûrî, i rîo atongoria ba ikundi bia njûûrî bakaathuurwa.
10 “Rîra bwakinya akubî na taûni îra bûthiîte kûrûa n'yo, mbere bûneenkere antû baayo mwanya wa kwîneenkanîra kîrî biû na njîra ya ûkiri. 11 Ûkeegua bageetîgîîria bûra bûkwenda na babûrugûrîre mîîrîga yao, antû bonthe bara barî ndeeni ya taûni înu bagaatuîka nkombo cienu na babûrutagîre ngûgî cia taka. 12 Îndî wegua antû ba taûni înu bakeenda kûrûa na batiîtîgîîria kwîneenkanîra na njîra ya ûkiri, bûbatîîrue bwithûkîra taûni. 13 Na rîra Mwathani Ngai wenu akaamîneenkanîra kîrî biû, bûûrage antû arûme bonthe bara barî taûniini înu. 14 Îndî nwa bûthûkie aka bonthe, aana, nyamû cia ndîîthia na into biingî bîra birî taûniini înu. Nwa bûtûmîre into bia anthû beenu bira Mwathani Ngai wenu abûnenkera. 15 Ûgu i bu bûkaarûthîra taûni ira irî kûûraaya, na ti ira irî akubî na naara bûgaatûûra.
16 “Îndî bwataa taûni ira irî nthîgûrû îra Mwathani Ngai wenu akûbûnenkera, bûûrage into bionthe bira birî mwoyo. 17 Nwa mwanka bûthirie Aiti, Amori, Akanaani, Aperisi, Aibi, na Anjebusi kûrû, wa ta bûra Mwathani Ngai wenu abwathîîte. 18 Bûbaûrage giria bakaaya gûtûma bûbîtîria Mwathani, babûrutana kûrûthaga mantû monthe ma njici mara barûthaga bakîgonga ngai ciao.
19 “Rîra bwaithûkîra taûni, wana wegua ndûa îkaathi na mbere îgiita rîîraaya, bûtikaarîîke mîtî ya matunda ma kûrîîwa na mathoka. Nwa bûrîe maciaro maayo, îndî bûtikaamîrîîke. Mîtî t'antû bûmiithûkîra. 20 Îndî nwa bûrîîke mîtî îra bwiyî îtirî maciaro ma kûrîîwa, bûkamîtûmîra gûtuma ngaati na irîngo bia kûbûteetheeria guutûka rûthiingo kaingo bûûmba gûcinda taûni înu bûkûrûa n'yo.”