Kûtheria nthîgûrû n'ûntû bwa ûûragani
21
1 Musa aathi na mbere kwîra antû ba Isiraeri, “Gûkeethîrwa muntû akooneewa aûragîrîîtwe kîthakaani nthîgûrû îra Mwathani Ngai wenu akûbûnenkera, na bûtikûmenya n'û aûragîîte muntû ûyu, 2 rîru akûrû na agiiti magamba beenu bakaathi bathimithanie boone i taûni îrîkû îrî akubî na ara ntungu înu îrî. 3 Atongoria ba taûni înu bakaathuura moori îra îtaaro îrutithua ngûgî nwa îrîkû kana yogeerwa îcooki. 4 Bakaira moori înu bantû amwe ara ataaro arîmwa kana aandwa akubî na muuro ûtabweyaga rûûyî, bamiunîre nkigo agu kîbondeeni. 5 Rîru athînjîri ba Ngai ba mwîrîga wa Rawi bathûkie mwanya wao n'ûntû Mwathani Ngai wenu nabathuurîîte bamûtûmîkagîra na bathaarimanaga riîtwani rîa Mwathani. Na kinya bagatuuyaga magamba monthe, meegue marî ma wînyangia bwa into kana kûgurarua.6 “Rîru atongoria ba taûni înu îrî akubî na ara muntû ûyu aûragîîtwe eethîîrwe, bathambîre njara îgûrû ya moori îra yunirwe nkingo kîguuruuni, 7 bakiugaga, ‘Ti tiû tûûragîîte muntû ûyû na tûtoona akîûragwa. 8 Mwathani, rekera Isiraeri, antû baaku bara wakûûrire kuuma Miisiri. Tûrekere na ûtigaatûtarîre wîyia bwa kûûraga muntû atarî na mabîtia.’ Baarûtha ûgu bakaarekerwa mabîtia ma kûûraga muntû ûyu. 9 Bwarûtha ûgu bûkaathiria ûthûûku bwa gûtûûra nthakame ya muntû atarî na mabîtia gatîgatîîni keenu, n'ûntû bûkûrûtha bûra kûbatîîrue meethooni ma Mwathani.
Kûgûra aka bara mîgwate
10 “Nwa gûkarîke ûgu, rîra bwathi kûrua na anthû beenu, Mwathani akabaneenkanîra njaraani cienu na bûkagwata mîgwate. 11 Ûmwe wa cienu nwa oone mûka ûmûthongi gatîgatîîni ka mîgwate înu na ûkeenda kûmûgûra. 12 Gûgakarîka ûgu, nwa ûthûkie mûka ûyu ûkathi n'we mûciî waku. Eenje ntundu ciake, agiite nkunyû 13 na eekîre nguo mûkûrûkani na ira aagwatirwe nacio. Rîru akare mûciî gwaku îgiita rîa mweri ûmwe, akîrîraga n'ûntû bwa gîkuû kîa îthe na gina, nyuma ya ûgu rîru nwa ûmûgûre. 14 Îndî ûkaaya kûmûgûra na Nyumaani ûkeegua ûtigûkenua n'we, ûbatîîrue ûmûrekeeria athi bûra akwenda. Ûtibatîîrue ûmwendia kana ûmûtuîkithia nkombo, n'ûntû n'ûmwirîîte îgi.
Rûgai rwa kîîmbere kîa mwana wa muntû mûrûme
15 “Muntû akeegua arî na aka baîrî, ûkeegua eendeete ûmwe na ateendeete ûra ûngî na aka babu barî baîrî bakamûciarîra aana ba antû arûme, na ûkeegua gîtûra îria i kîa mûka ûra ateendeete, 16 rîra muntû ûyu akeegua akîgaîra aana baake rûgai atibatîîrue aneenkera mwana ûra mûniini rûgai rûra rûnene rwa gîtûra îria n'ûntû nwa mûka ûra eendeete. 17 Nwa mwanka etîgîîrie mwana wa mwekûrû ûyu ateendeete n'we gîtûra îria, na amûnenkere maita maîrî ma rûgai rwa mwana ûyu ûngî wa ta bûra kûbatîîrue kîîwatho, n'ûntû n'we kîonanîîria kîa inya yake na rûgai rwa kîîmbere i rwake.
Mantû meegiî mwana ûmûremu
18 “Muntû akeegua arî na nthaka îndemu, îkûûmia kîongo na îtakwathîkîra aciari baake wana bamûnenkera îkaanûkia, 19 îthe na gina wa nthaka înu bakaira nthaka înu kîrî akûrû ba taûni înu yake agu mwîrîgaani. 20 Beere akûrû babu ba taûni, ‘Nthaka îno yetû n'îndemu, n'îûmagia kîongo na îtitwathîkagîra. I muntû wa îtanûka na i mûreebi.’ 21 Rîru antû arûme ba taûni bonthe bakamûûraga na maiga. Bwarûtha ûgu, bûkaarutaruta ûthûûku buume gatîgatîîni keenu. Antû bonthe ba Isiraeri bakeegua bûra gwakarîka na bagîe na ûguaya.
Mawatho mwanya mwanya
22 “Muntû akaaya kûûragwa n'ûntû bwa meeyia mara arûthîîte na kiimba gîake gîgacuurua mûtîîni, 23 kiimba gîku gîtikaaraare mûtîîni. Bûbatîîrue gûkîthika ntugû wa înu, n'ûntû muntû wonthe ûra acuuragua mûtîîni n'ûmûrume i Ngai. Bûtikaagwatithie nthîgûrû yenu îra Mwathani Ngai wenu akûbûnenkera îrî rûgai rwa mwanya mûgiro.”