22
1 Ûkaaya kwona ncamba kana ng'ondu ya Mûisiraeri wacienu yûûrîîte, ûtigaakire woogu, nwa mwanka ûmûcookerie yoo. 2 Îndî ûkeegua mwene yoo atwîre kûûraaya kana ûkeegua ûtimwiyî, ûmîthûkie ûmiire gwaku mûciî. Rîra mwene akaaya akîmîceragia ûmûneenkere yoo. 3 Woogu i bu bûbatîîrue bûrûtha bwona îng'ooi, nguo kana gîntû kîngî kîonthe kîa Mûisiraeri wacienu kîûrîîte. Ûtikaarege kûmûteethia.4 Ûkaaya kwona ncamba kana îng'ooi rîa Mûisiraeri wacienu rîgwîte rûteere rwa njîra, ûtigaakire wa ûgu. Nwa mwanka ûmûteethie kûrîûkîîria.
5 Mûka atibatîîrue eekîra nguo cia muntû mûrûme, na muntû mûrûme atibatîîrue eekîra nguo cia mûka. Mwathani Ngai wenu n'athwîre antû bara barûthaga ûgu.
6 Ûkaaya kwona ntara ya nyoni nthîgûrû kana mûtîîni îrî na maunga kana makome na gina îmamamîrîte, ûtikaathûkie gina na maunga. 7 Nwa ûthûkie maunga, îndî ûrekie gina îthi, kaingo mantû maaku mabua na ûtûûra ntugû inyiingî.
8 Rîra ûgwaka nyomba yaimbia, wakage rûthiingo rûûgûrû rûthiûrûkîrîîtie mûthia wa rwembea. Kaingo muntû akaaya kwarûka kuuma rûûgûrû agakua, mûciî waku ûtakîîgua ûrî na mabîtia n'ûntû bwa gûtûûra nthakame.
9 Ûtikaande mbeû mîthemba îîrî mûndaani wa mîcabiibû. Ûkaaya kûrûtha ûgu ûtibatîîrue gûtûmîra ncabiibû kana imera bibu bingî bikauma mûndaani ûyu.
10 Ûtikooganîîrie ncamba ya ng'ombe na îng'ooi irîma na mûraaû amwe.
11 Ûtigeekîre nguo îtumîîtwe na guaya na gatani ciunganîîtue.
12 Bûrûthage mîcûrî mîthiani îrî îna ya tûbuuti twenu.
Mawatho îgûrû rîa ûmaramari
13 Muntû mûrûme nwa agûre mûka na nyuma ya kûmaama n'we, muntû ûyu akamûmena, 14 na akamûtuîrîîra na agatûma agîa riîtwa rîîthûûku akiugaga “I ndaagûrire mûka ûyû îndî ntoona bionanîîria bira bionanagîîria atî mûka ûyû ataamaamîîte na muntû mûrûme ûngî mbere mmûgûra.” 15 Muntû mûrûme akaaya kûrûtha ûgu, îthe na gina wa mwarî babatîîrue bairîra akûrû ba taûni înu agu mwîrîgaani gîntû kîra gîkwonanîîria atî mwarî ûyu wao ataamaamîîte na muntû mûrûme ûngî mbere agûrwa. 16 Îthe wa mwarî abeere, “Ndaanenkeere muntû ûyû mwar'wakwa amûgûra, na îîndî atikûmwenda. 17 N'akûmûtuîrîîra akiugaga n'amaamîîte na muntû mûrûme mbere bagûrana. Îndî gîkî i kîoneeria gîa kwonania mwarî wakwa ataamaamîîte na muntû mûrûme.” Rîru ataambûrûkie gîtaame gîku mbere ya akûrû babu ba taûni. 18 Nabo akûrû babu ba taûni bakaanenkera muntû mûrûme ûyu îkaanûkia. 19 Bakamûriinga baine ya fetha îgana rîmwe n'ûntû bwa kwira mwarî wa Isiraeri ûra ataaro amaama na muntû mûrûme ûngî îgi. Îthe wa mwarî n'we akaaneenkerwa îriî rîru. Mûka ûyu n'we agaatigwa arî mwekûrû wa muntû ûyu na atiûmba kûmwîngatia ûtûûrooni bwake bunthe.
20 Îndî ûkeegua wa bûra muntû ûyu araugaga n'ûmma na mûka ûyu atirî na gîa kwonania we ataamaamîîte na muntû mûrûme mbere agûrwa, 21 bakaira mwarî ûyu mwîrîgaani wa mûciî wa îthe, na antû arûme ba taûni înu bamûûrage na maiga. Akaarûthwa ûgu n'ûntû narûthîîte wîyia bwa îgi Isiraeri, aamaramara arî mûciî wa aciari baake. Kwoogu ûthûûku ta bûbu nwa mwanka bûrutarutwe gatîgatîîni keenu.
22 Muntû akeethîîrua akîthûûngîîra, we na mûka wa muntû ûyu bakûthûngagîîra n'we babatîîrue baûragwa. Bwarûtha ûgu bûkaarutaruta ûthûûku Isiraeri.
Mawatho îgûrû rîa kûgwatana kia inya
23 Muntû mûrûme akarîîkana na mwarî taûni, mwari ataamaama na muntû mûrûme ûngî na ûgûkeethua agûrwa i muntû ûngî, akamaama n'we, 24 bûbatîîrue buumagaria antû babu barî baîrî bûbaira mwîrîgaani wa taûni bûbaûraga na maiga. Mwarî arî na mabîtia n'ûntû bwa kûrega kuuga mbu atuunyûkua kinya ûkeegua n'aarî taûni. Muntû mûrûme n'we akaûragwa n'ûntû bwa gûkara na mwekûrû wa itha. Bwarûtha ûgu bûkaarutaruta ûthûûku gatîgatîîni keenu.
25 Îndî muntû akarîîkana na mwarî agûkeethua agûrwa kîthakaani, akamûgwata na taka, rîru muntû mûrûme n'we abatîîrue aûragwa arî wenka. 26 Bûtikaarûthe mwarî ûyu nwa ata n'ûntû gûtirî bu arûthîîte bwa gûtûma aûragwa. Îgamba rîa mwarî ûyu i ta rîa muntû ûra aumbuthûkagîrwa akûûragwa i muntû ûra ûngî, 27 n'ûntû muntû mûrûme ûyu agwatîîre mwarî ûyu ataamaamîîte na muntû mûrûme kîthakaani, wana ûkeegua mwarî augire mbu, atikîona muntû wa kûmûtuunyûkia.
28 Muntû mûrûme akaaya kwîthîîrua akîgwata mwarî ataamaama na muntûmûrûme na atagûkeethua i muntû ûngî, 29 abatîîrue arîa îthe wa mwarî ûyu fetha mîrongo îtaano. Rîru agûre mwarî ûyu n'ûntû n'amwirîîte îgi, na atiîtîgîîrua kûmûcookia.
30 Gûtikaagîte muntû akaamaama na mwekûrû wa îthe n'ûntû gûku i kwira îthe îgi.