Mawatho meegiî kûgonga
23
1 Musa aathi na mbere kwîra antû ba Isiraeri, “Muntû mûrûme ûmûkabe kana ûra mûgiite gîcuncî gîake kîa ûntû ûrûme atiîtîgîîrîîtue ngwatanîrooni ya antû ba Mwathani.2 “Muntû ûra acîarîîtwe n'aciari batagûreene kinya rûrîîyo rwake mwanka rûciaro rwa îkûmi atiîtîgîîrîîtue ngwatanîrooni ya antû ba Mwathani.
3 “Gûtirî Mûamoni kana Mûmoabu, kana rûrîîyo rwao mwanka rûciaro rwa îkûmi, ageetîgîîrua ngwatanîrooni ya antû ba Mwathani kinya rî. 4 Mîgongo îno n'îaregire kûbûgwata ûgeni na irio na rûûyî rîra bwaumîîte Miisiri. Bo wana i ka baakomborire Mbaraamu mwana wa Mbeori, wa kuuma taûni yetagwa Pethori naagu Mesopotamia, abûruma. 5 Îndî Mwathani Ngai wenu ataathikîîria Mbaraamu. Mwathani Ngai wenu aagarûrire kîrumi gîatuîka kîthaarimo n'ûntû n'abwendeete. 6 Kuuma bûgaatûûra, bûtigateetheerie Aamoni kana Amoabu na njîra nwa îrîkû kwîgua barî na ûkiri na gûtûûra bwega.
7 “Bûtikaamene antû ba Endomu n'ûntû n'antû ba mûciî wenu. Na bûtikaamene antû ba Miisiri n'ûntû i bwatwîre nthîgûrû yao. 8 Rûciaro rwa ithatû rwa antû ba Miisiri nwa rwîtîgîîrue ngwatanîrooni ya antû ba Mwathani.
Mantû mara maûmba kûreeta mûgiro kambîîni
9 “Rîra bwathi kûrûa na anthû beenu, bwîmenyeere bûtikaaringithie gîntû kîûmba kûbûgwatithia mûgiro.
10 “Muntû mûrûme ûra akaagîa mûgiro n'ûntû bwa gwîtûûra mbeû ya muntû mûrûme akîroota, abatîîrue aumagara ome ya kambî akara noogo ntugû yonthe. 11 Ûgoro bwakinya muntû ûyu athi athambe na rûûyî na acooke kambîîni rîra riûa rîathoa.
12 “Bûtige bantû amwe ome ya kambî ara bûkaathiiyaga gwîteethia. 13 Kûrî into bienu bwîgue bûrî na gîntû kîûmba kwînja nthîgûrû. Rîra muntû eegua kûthi gwîteethia akeenjaga mûrinya agakomara oogo ageeteethia. Na arîîkia gwîteethia akathika mûrinya ûyu. 14 Kambî îbatîîrue gûkaraga îrî întheru n'ûntû Mwathani Ngai wenu n'athiûrûkaga ku akîbûmenyagîîra na akabûcindîra anthû beenu. Atibatîîrue oona gîntû kîa îgi gatîgatîîni keenu, n'ûntû aûmba kûbûtiganîria.
Mawatho mwanya mwanya
15 “Nkombo îkaaya gûkuthûka mwene îkaaya gwaku kwîbitha, ûtikaamîkaîrîîrie gûcooka kwa mwene. 16 Nwa îkare naabi, gatîgatîîni keenu bantû wa ara îkeenda, taûni wa îra îkaathuura gûkara na bûtikamiinyîîrie.
17 “Gûtikaagîte mûka kana muntû mûrûme Mûisiraeri agaatuîka îrwaya ria kîrombero. 18 Bûtikaareete mûcaara wa îrwaya kana îrîi rîa gûkomborithania kurû.a Nyomba ya Mwathani Ngai weenu kîrî kîewa gîa kûûyûria mûthiîtio, n'ûntû Mwathani n'athwîre mantû mamu mûno.
19 “Ûtigaakoobithie Mûisiraeri wacienu gîntû kaingo akûrea na baita, wîgue i mbeca, irio kana gîntû kîngî kîûmba gûkoobithanua na baita. 20 Nwa bûkoobithie ageni na baita îndî bûtikaarûthîre antû beenu ba Isiraeri ûgu, kaingo Mwathani Ngai wenu athaarima mantû monthe mara bûkaarûtha nthîgûrû îra bûthiîte kûthûngîra na bwîgwatîra.
21 “Rîra wathiîtia kûrûtha ûntû mbere ya Mwathani, ûrûthe ûgu ûthiîtiirie kûrûtha na mpwî. Warega kûrûtha ûgu Mwathani Ngai weenu agakûrandûka mûthiîtio ûyu na ûkeegua ûrî na meeyia. 22 Îndî ti meeyia rîra warega kûthiîtia mbere ya Mwathani. 23 Îndî wathiîtia na kwîbendera mbere ya Mwathani Ngai waku, ûmenyeere ûûyûrie mûthiîtio waku, ûra wathiîtiirie na kanyua gaaku wengwa.