Kwîngatia mûka na kûgûrana kaîrî
24
1 Musa aathi na mbere kuuga, “Nwa gûkarîke ûûgû, muntû mûrûme nwa agûre mûka îndî Nyumaani akamenya îgi rîna rîake, akamwandîkîra barûa ya kwonania akûmûcookia, na amwîngatie aume gwake. 2 Ûkeegua mûka ûyu akaathi agûrwe i muntû ûngî 3 na mûrûme ûyu ûngî n'we amwînûkie na njîra ya kûmwandîkîra baarûa ya kûmûcookia kana akue, 4 mûrûme ûra wa mbere atigûra mûka ûyu kaîrî, n'ûntû nagwatithîîtue mûgiro. Akamûgûra kaîrî Mwathani aathûûra. Bûtikeende kûreeta wîyia nthîgûrû îno Mwathani Ngai wenu akûbûnenkera rûrî rûgai rwa mwanya.Mawatho mwanya mwanya
5 “Muntû ûra agûreene warîo atibatîîrue athi kûrûa na njûûrî ya ndûa kana aneenkerwa ngûgî ciingî cia mwingî. Abatîîrue aneenkerwa mwanya wa mwanka ûmwe, kaingo akenanîîra na mwiki wake waimbia.
6 “Rîra wakoobithia muntû gîntû ûtikaathûkie iiga ria kûthia kana nthio n'ûntû bwa kûrûngamîîra îrandû rîru mwanka rîra agaakûrea, n'ûntû gûkû i kûrigîîria antû ba mûciî ûyu bathuuranîra irio biao bia kûrîa kaingo batûûra mwoyo. 7 Muntû ûra ataaga Mûisiraeri waciao na taka akamûtuîkithia nkombo kana akamwendia arî nkombo abatîîrue aûragwa. Nwa mwanka bûrûthe ûûgû kaingo bûrutaruta ûthûûku gatîgatîîni keenu.
8 “Rîra bwayua mûrimo ûmûthûûku wa gîkonde bûmenyeere bûrûthe wa bûra bungwa athînjîri ba Ngai, Arawi, bakaabwîra bûrûthe; bûthiingate mawatho mara mbûnenkereete. 9 Ririkanaani bûra Mwathani Ngai wenu aarûthîîre Miriamu njîraani rîra bwaumîîte Miisiri.
10 “Rîra wakoobithia mûtûûri waku gîntû, ûtikaathûngîre nyomba yake wîtia gîntû gîa kûrûngamîîra îrandû mwanka rîra agaakûrea, 11 woû weteere ome, n'we arî wengwa agakûreetera gîntû gîku. 12 Ûkeegua mûtûûri waku i nkea, ûtikaaraare na gîntû kîra ûmûtharîîte.a 13 Ûcookerie mwene nguo înu mbere riûa rîthûa kaingo oona nguo ya kwîguîka n'yo na akûthaarima. Na Mwathani Ngai wenu agaatara ûntû bûbu bûrî bwagîru.
14 “Bûtikainyîîrie aruti ngûgî nkîa, wîgue barî Aisiraeri bara bangî kana ageni bara batwîre taûni cienu. 15 Wa îra ntugû mbere riûa rîthûa ûbatîîrue ûbarîa mûcaara wa ntugû înu n'ûntû barî bata nau na i bacuîrîgîîrîîte. Warega kûbarea, bagaakayîra Mwathani n'ûntû bwa kûbainyîîria gwaku, na ûkeegua ûbîtîîtie.
16 “Aciari batibatîîrue baûragwa n'ûntû bwa meeyia ma aana baao, kana aana baûragwa n'ûntû bwa meeyia ma aciari baao. Wa muntû aûmba kûûragwa n'ûntû bwa meeyia maake. 17 Rûthagîraani ageni na twana tûkîa bûra kûbatîîrue bungwa, na bûtigeetîgîîrie nguo ya ntigwa îrî gîntû gîa kûrûngamîîra îrandû. 18 Rîonthe ririkanagaani bwarî nkombo Miisiri na Mwathani Ngai wenu abûkûûra kuuma noo. I kîo gîtûmi nkûbûnenkera yathana rîrî.
19 “Rîra ûgûketha irio biaku, ûkaaya kûriganîrua i mûrigo ûmwe mûndaani, ûtigaucookere. Tigîra ageni, twana tûkîa na ntigwa uu. Rîru Mwathani Ngai wenu agakûthaarima mantûûni monthe mara ûkaarûtha. 20 Rîra wathi mûndaani gûketha nceituuni kuuma mîceituuniini yaku, ûtigaacooke kûbaara ira ûkeegua itigeere. Ûtigarîrie nceituuni imwe ageni, twana tûkîa na ntigwa. 21 Woogu nwabu ûkaarûthaga rîra ûgûketha ncabiibû mûndaani waku wa mîcabiibû. Ûtikaaringe rûûa Warîîkia gûketha, ûtigarîrie ageni, twana tûkîa na ntigwa. 22 Ririkanaani bwarî nkombo nthîgûrû ya Miisiri. Na i kîo gîtûmi nkûbûnenkera yathana rîrî bûthingataga.”