25
1 Musa aathi na mbere na kûbeera, “Î gûgakarîka ata rî, antû baîrî barî na îgamba bakairna kootiini, na mûgiiti wa magamba akauga ûmwe arî ûmmani na ûra ûngî arî na mabîtia, 2 ûkeegua muntû ûra arî na mabîtia aatuîrwa kûringwa ibooko, mûgiiti wa magamba akauga muntû amaame nthî na ariingwe ibooko wagu wagu. Ibooko bira muntû akaaringwa bikaaringana na n'îbîtia rîgana ata muntû arûthîîte. 3 Muntû nwa aringwe ibooko îndî ti nkûrûki ya mîrongo înna. N'ûntû nkûrûki ya mîrongo îna i kwira mûruanyûkwe îgi mbere ya mwingî.4 “Ûtikaathaîke ng'ombe mûcomo rîra ûkûmîtûmîra kûbûûra ngano.
Mawatho îgûrû rîa kûgaa ntigwa ya mûruanyûkwe
5 “Ûkeegua muntû na aruagina i batwîre bantû amwe, na ûmwe wao akue mbere agea na mwana wa muntû mûrûme, mûka wake atibatîîrue athi kûgûrwa mûciî ûngî. I ngûgî ya mûruagina ûyu aatigwa kûthûkia mûka ûyu na amûrûthîre bûra mûruagina wa mwene abatîîrue arûtha. 6 Mwana wa mbere muntû mûrûme ûra muntû ûyu bakaagea n'we na mûka ûyu wa mûruagina agaatarwa arî nthaka ya mûruagina kaingo riîtwa rîa muntû ûyu mûkuû rîtikaariganîrie Isiraeri. 7 Îndî mûruagina wa muntû ûyu mûkuû akarega kûgûra mwekûrû ûyu ntigwa, mûka ûyu abatîîrue athi mwîrîgaani wa taûni eere akûrû, ‘Mûruagina wa mûkûrû akûrega kûruta ngûgî yake, akûrega gûteetheeria mûruagina agea na rûciaro gatîgatîîni ga antû ba Isiraeri.’ 8 Rîru atongoria ba taûni bageeta muntû ûyu bagerie kwaria n'we. Gwatuîka nwa akûrega kûmûthûkia, 9 mwekûrû ûyu ntigwa wa mûruagina akaathi kîrî mûruagina ûyu wa mwene mbere ya akûrû ba taûni, amûrute kîraatû kîmwe, amûtuîre mata ûthiû auge, ‘Ûgu i bu muntû ûra aregaga gûteetheeria mûruagina kûgîa na mbeû arûthagwa.’ 10 Na kinya Nyumaani mûciî wake Isiraeri ûgeetagwa ‘Mûciî wa muntû ûra aarutirwe kîraatû.’
Mawatho mwanya mwanya
11 “Ûkeegua kûrî na antû arûme baîrî ba Isiraeri bakûrûa na mwekûrû wa ûmwe wao akîgeria gûtuunyûkia mûkûrû wake akagwata mîrigi ya muntû mûrûme ûyu bakûrûa na mwene, 12 mûka ûyu abatîîrue agiitwa njara atakwîguîrwa kîao.
13 “Bûtikeegue bûrî na ithimi bia mîthemba îîrî kîîrito na kîûthû mûbukooni waku. 14 Bûtikeegue bûrî na ithimi biîrî nyomba yenu, kîînene na kîniini. 15 Yîî, tûmagîraani kiro na mîkebe îra ya mma, kaingo bûtûûra îgiita rîîraaya nthîgûrû îno Mwathani Ngai wenu akûbûnenkera. 16 N'ûntû Mwathani Ngai wenu n'athwîre antû bara beenanagia bagîtûmagîra ithimi bia ûrongo.
Watho bwa kûûraga Aamareki
17 “Bûtikaariganîrue bûra Aamareki baabûrûthire rîra bwaumîîte Miisiri. 18 Baabwithûkîîre rîra bwarî baatuuru na baanogu, baûraga antû bonthe bara baarigîîtie, beekururîîtie nyuma. Bataakuthûka Ngai. 19 Kwoogu, rîra Mwathani Ngai wenu akaabûnenkera kûnogoka kûrî anthû beenu bara barî nteere cienu nthîgûrû îra akûbûnenkera îrî rûgai rwa mwanya, bûthirie Aamareki cwe bûra batakîririkanwa kaîrî. Bûtikaariganîrue n'ûgu.”