Maruta ma maketha na gîcuncî gîa îkûmi
26
1 Musa aathi na mbere kuuga, “Rîra bûgaakinya nthîgûrû îra Mwathani Ngai wenu akûbûnenkera îrî rûgai rwa mwanya na bwegwatîra yo bwatûûra ku, 2 bwîkagîre maciaro ma mbere ma maketha kuuma nthîgûrû îra Mwathani Ngai wenu akûbûnenkera gîkabûûni, bûkareeta bantû ara Mwathani Ngai wenu akaathuura agongagîrwa. 3 Ûkaathi kîrî mûthînjîri wa Ngai ûra agûtûmîka îgiitaani rîru ûmwîre, ‘Gûkûrûkîîra biewa bibi i ngûkûûyîîra kîrî Mwathani Ngai waku i nthûngîrîîte nthîgûrû îra aathiîtiirie akaanenkera biûyûûyû bietû.’ 4 Rîru mûthînjîri wa Ngai akaathûkia gîkabû kuuma njaraani ciaku akîaigîîre nthî mbere ya kîthînjîro kîa Mwathani Ngai wenu. 5 Na uuge biugo bibi mbere ya Mwathani Ngai wenu, ‘Kîûyûûyû Njakubu aarî Mûaramu ûra ariûngariûngaga, ûra athiire gûtûûra Miisiri. Mûciî wake warî wa antû baakai, îndî arî Miisiri baatuîka mûgongo ûrî na inya na ûmwingî. 6 Rîra antû ba Miisiri baatwinyîîrie, batûnyamaaria na batûrutithia na taka ngûgî ya inya ya ûkombo, 7 i twarîrîîre Mwathani, Ngai wa biûyûûyû bietû. N'atwîgiirue na oona bûra twanyamaaragua, tûkiinyagîîrua na tûkarutithua ngûgî na taka. 8 Kwoogu Mwathani n'atwonokiirie kuuma Miisiri na inya yake îînene na kûûmbana kûûnene. N'aringire biama na magegania, na atûma mantû ma kûmakania makarîka. 9 Atûreeta aaga na atûnenkera nthîgûrû îno yûûyûrîîte îria na ûkî. 10 Na îndî, Mwathani, ngûkûreetera gîcuncî kîa mbere kîa maketha ma nthîgûrû îra Mwathani aaneenkereete.’ Rîru waigîîre gîkabû gîku mbere ya Mwathani Ngai weenu na wîndamîîre ûtiirithie ûthiû nthî mbere yake. 11 Nyuma ya ûgu ûthi ûgakeneere into biega bionthe bira Mwathani abûneenkereete amwe na mûciî waku. Bûririkane gwîtaga Arawi na ageni bara batwîre gatîgatîîni keenu gûkeneeraani kwenu.12 “Wa kîra nyuma ya mîanka îthatû bûrutage icuncî bîa îkûmi bia mwanya bia irio bienu. Icuncî bibu bûkaaneenkagîra Arawi, ageni, twana tûkîa na ntigwa, kaingo woora muntû eegua arî na biakûrîa biiganu bia kûrîa na kûbaa. 13 Rîru bwîre Mwathani Ngai wenu, ‘Nkûthûkia kîewa kîra kîtheru kuuma nyomba yakwa ndaanenkera Arawi, ageni, twana tûkîa na ntigwa, wa ta bûra ûûmbîîrîîte ntirauna kana ndiganîrua i yathana rîaku nwa rîrîkû. 14 Ntaaruta gacuncî gakîo nkîrîra ndî mûkuîre, ntaagîtongithia ndî na mûgiro, na ntaaruta gacuncî gakîo nenkera antû bakuû. I mbathîkîrîîte Mwathani Ngai wakwa na ndarûtha mantû monthe mara wambîîrire. 15 Raithîîria nthî ûrî ûtûûrooni bwaku gûku kûtheru îgûrû, ûthaarime antû baaku ba Isiraeri na nthîgûrû îra watûneenkeere îra yûûyûrîîte îria na ûkî, wa ta bûra wathiîtîîrie biûyûûyû bietû.’
Antû ba Mwathani
16 “Îmunthî Mwathani Ngai wenu arîbwîra bwathîkagîre mawatho na watho bwake. Nwa mwanka bwîneenkanîre kûrû kûmaathîkîra na nkoro cienu na ûtûûro bwenu na inya yenu. 17 Îmunthî bûkuumbûra Mwathani n'we Ngai wenu. Na bwarîîkanîra kûthingata njîra ciake, kwathîkîra watho na maathana maake, na kûrûtha mantû monthe mara akaabwîra. 18 Îmunthî Mwathani n'we n'augire bûrî antû baake bongwa bara eendeete mûno, wa ta bûra eeranîîte naabi, na ibûbatîîrue bwathîkîra maathana maake. 19 Wona bwarûtha ûgu, akabûtuîkithia mûgongo ûmûnene nkûrûki ya mîgongo îra îngî yonthe, îra aûmbire na bûgaatuîka antû bara baathûrîrîîtwe Mwathani Ngai wenu wa ta bûra augire.”