Mawatho ma Ngai mara maandîkîîtwe maigaani
27
1 Rîru Musa na atongoria bara bangî ba Isiraeri beera antû, “Bwathîkîre maathana monthe mara nkûbûnenkera îmunthî. 2 Rîra bûkaaringa muuro wa Njorondani bûthûûngîre nthîgûrû îra Mwathani Ngai wenu akûbûnenkera, bûrûngîke maiga maanene na bûmakaande na nkangû. 3 Rîru bûmaandîke biugo bionthe bia maathana mama, îîndî n'ûntû bweteerie kûringa Njorondani bûthûûngîre nthîgûrû îra Mwathani Ngai wenu akûbûnenkera, n'yo i nthîgûrû îra yûûyûrîîte îria na ûkî, wa ta bûra Mwathani Ngai wa biûyûûyû bienu aabwîrire. 4 Bwariinga muuro wa Njorondani bwînjîre maiga mamu kîrîmaani kîa Ebari na bûmakaande na nkangû wa ta bûra nkûbwîra îmunthî. 5 Rîru bwakîre Mwathani Ngai weenu kîthînjîro bûgîtûmagîra maiga matarî macae. Bûtigaacae maiga ma gwaka kîthînjîro gîku na into bia cuuma. 6 Bwakîre Mwathani Ngai weenu kîthînjîro na maiga matarî macae, na agu noogo bûkaarutagîra Mwathani Ngai weenu igongwana bia kûbîîthua. 7 Bûrutagîre biewa bia ûkiri oogo wanabio na bûkabirîîra agu na bûkeneere mbere ya Mwathani Ngai wenu. 8 Maigaani mamu makaande bwandîke bwega biugo bionthe bia watho bwa Ngai.”9 Rîru Musa na athînjîri ba Ngai ba mwîrîga wa Rawi beera antû ba Isiraeri, “Kiraani na bûthikîîrie antû ba Isiraeri! Îmunthî bûgûtuîka antû ba Mwathani Ngai wenu. 10 25 Kwoogu bwathîkîre Mwathani Ngai wenu, bûthiingate maathana na mawatho maake mara nkûbûnenkera îmunthî monthe.”
Irumi n'ûntû bwa kûrega kwathîka
11 Ntugû wa înu Musa eera antû ba Isiraeri, 12 “Bwariinga Njorondani antû ba mîîrîga ya Simioni, Rawi, Njunda, Isakaari, Njosebu na Benjameni i bo bakaarûngama kîrîmaani gîa Ngerisimu n'ûntû bwa kûthaarima antû. 13 Nabo antû ba mîîrîga ya Rubeni, Ngandi, Aseri, Seburuni, Ndani na Nabutarî barûngame kîrîmaani kîa Ebari n'ûntû bwa kûruma antû. 14 Arawi bakeera antû ba Isiraeri biugo bibi na inya:
15 ‘N'ûmûrume muntû ûra akaarûtha ngai ya ûrongo, ya iiga, mûtî kana cuuma, akamîgoongaga na witho; Mwathani nathwîre ûntû bûbu, n'ûntû îno i ngûgî ya njara cia mûbundi.’
Antû bonthe bacookie, ‘Aameni.’
16 ‘Nûmûrume muntû ûra akaarega gûtîîya îthe kana gina.’
Antû bonthe bacookie, ‘Aameni.’
17 ‘Nûmûrume muntû ûra aiyaga kîthaka kîa mûtûûri wake na njîra ya kûthiiyangia mwanka.’
Antû bonthe bacookie, ‘Aameni.’
18 ‘Nûmûrume muntû ûra akaabîtithia ntûngi njîra.’
Antû bonthe bacookie, ‘Aameni.’
19 ‘Nûmûrume muntû ûra agiragia ageni, twana tûkîa na ntigwa barûthîrwa bûra kûbatîîrue.’
Antû bonthe bacookie, ‘Aameni.’
20 ‘Muntû ûra aagagîra îthe gîtîîyo akamaama na mûk'wethe aroogwatwa i kîrumi.’
Antû bonthe bacookie, ‘Aameni.’
21 ‘Nûmûrume muntû ûra akaamaama na nyamû yonthe.’
Antû bonthe bacookie, ‘Aameni.’
22 ‘Nûmûrume muntû ûra akaamaama na mwaragina, eegue arî mwarî wa gina kana mwarî wa îthe.’
Antû bonthe bacookie, ‘Aameni.’
23 ‘Nûmûrume muntû mûrûme ûra akaamaama na mûthonuue.’
Antû bonthe bacookie, ‘Aameni.’
24 ‘Nûmûrume muntû ûra akaûraga ûra ûngî na witho.’
Antû bonthe bacookie, ‘Aameni.’
25 ‘Nûmûrume muntû ûra ageetîgîîria kûrîwa kaingo aûraga muntû atarî na mabîtia.’
Antû bonthe bacookie, ‘Aameni.’
26 ‘Nûmûrume muntû ûra ateetîgagîîria biugo bia watho bûbû na njîra ya kûbuathîkîra.’
Antû bonthe bacookie, ‘Aameni.’ ”