Mwanka wa mûgwanja
15
1 Musa aathi na mbere kwîra antû ba Isiraeri, “Mûthiani wa wora mwanka wa mûgwanja bûkaarekanagîra marandû mara bûkoobithanîîtie. 2 Ûûgû i bu bûkaarûthaga. Muntû ûra ûkeegua akoobithîîtie Mûisiraeri waciao mbia, akamûrekera îrandû rîru. Atibatîîrue araandûka mûtûûri wake, kana mûruagina kana Mûisiraeri waciao, n'ûntû i mwanka ûra Mwathani augîîte marandû marekanîrwe. 3 Nwa bûraandûke ageni. Îndî bûtikaarandûke kîra bûkobithîîtie antû beenu.4 “Wana gûkari ûgu, Mwathani akabûthaarimîra nthîgûrû îra akûbûnenkera na gûtirî nwa ûmwe wenu akeegua arî nkîa, 5 bunka bwathîkîra Mwathani Ngai wenu na mma na bwathiingata na wîru maathana mama nkûbûnenkera îmunthî. 6 N'ûntû Mwathani Ngai wenu akabûthaarima wa ta bûra augire. Na bûgaakobithagia mîgongo îmiingi, îndî bûtikooba. Bûkaatha mîgongo îmiingî, îndî gûtirî mûgongo ûkaabwatha.
7 “Ûkeegua kûrî na ûmwe wa ndûgû cienu atarî gîntû, atwîre taûniini cienu nthîgûrû îra Mwathani Ngai wenu akûbûnenkera, bûtigaakûûne bûrega kûmûteethia. 8 Îndî bûbatîîrue bwîgua bûrî antû bakwenda gûteethia, na bûmûkoobithagia kîra kîonthe abatîîrue i kîo. 9 Bûmenyeere bûtikaaye gûkûûna buuga bûtikoobithania n'ûntû mwanka wa gûcookanîîrua ûrî akubî. Wona bwarega gûkoobithia muntû atarî na gîntû n'we muntû ûyu arîrîre Mwathani, woû ûkeegua ûbîtîîtie. 10 Neenkanagîra ûtagûtara na nkoro întheru kîrî muntû ta ûyu na Mwathani Ngai wenu akabûthaarima mantûûni monthe mara bûkûrûtha. 11 Gûtirî rîo nkîa ikaathira gatîgatîîni keenu, kwoogu inkûbûkinyîîria bûteethagie antû beenu, bara nkîa na barî na ûbatu.
Kûrekeerua gwa nkombo
12 “Mûibirania wacienu akaaya kwîbendia kîrî woû na agagûtûmîkîra mîanka îthanthatû, n'ûbatîîrue ûmûrekeeria mwankaani wa mûgwanja. 13 Na wamûrekeeria ûtikaamûrekeerie athi maara mpî. 14 Mûneenkere into ûkîîbendagîra kuuma kîrî ng'ondu ciaku, kuuma kîrî irio biaku na kuuma kîrî ndibei yaku. Ûmûrûmie into kûringana na bûra Mwathani akûthaarimîîte. 15 Ririkanaani wana biû bwarî nkombo Miisiri, na Mwathani Ngai wenu abûkûûra. I kîo gîgûtûma mbûnenkera yathana rîrî.
16 “Îndî nkombo yaku îkauga, ‘Ntiuma gwaku,’ n'ûntû n'akwendeete na n'endeete mûciî waku na i bûkaranagia n'we bwega. 17 Gûgakarîka ûgu, ûkaathûkia wire nkombo înu mwîrangooni wa nyomba ûmîtûre gûtû na mûkua, mûkua ûkiungurukanaga ûkamunta mûrango. Nyuma ya ûgu agaatuîka nkombo yaku ûtûûrooni bwa yo bunthe.
“Wa ûgu nwabu ûbatîîrue ûrûtha na nkombo ya mûka.
18 “Bûtikaathûkie bûrî ûntû bûbûûmo rîra ûkûrekeeria nkombo yaku, bûkîririkanaga îgiitaani rîa mîanka îthanthatû nîkûrutîrîte ngûgî na nucu ya îrîi rîa mwandîkwa. Na Mwathani Ngai wenu akabûthaarima mantûûni meenu monthe.
Biîmbere bia nyamû
19 “Itûra îria bionthe bia ndûme bia ng'ombe na ng'ondu cienu bibatîîrue kwathûrîrwa Mwathani Ngai wenu. Bûtikaarute ngûgî na itûra îria bia ng'ombe na bûtikeenje guaya ya itûra îria bia ng'ondu. 20 Biû na mîciî yenu bûbatîîrue bûrîîra itûra îria bia nyamû cia ndîîthia wora mwanka mbere ya Mwathani bantû ara Mwathani akaathuura. 21 Îndî gîtûra îria gîku kîrî na koothûûku, ta îndî ûkeegua îkîthuaga, îrî ntûngi, kana îrî na wonje bûngî bûûthûûku, înu îtikaarutîrwe Mwathani Ngai wenu. 22 Nyamû ta inu ibatîîrue irîîrwa taûni cienu. Woora muntû eegue arî na mûgiro kana atarî nau nwa arîe nyama inu, wa ta bûra bûrîîyaga nyama cia nthia kana nkûrûngû. 23 Îndî bûtikaarîe nthakame yacio, bûmîîtûûre nthîgûrû ta rûûyî.”