14
1 Musa aathi na mbere kwîra antû ba Isiraeri, “N'ûntû biû bûrî antû ba Mwathani Ngai wenu, bûtigeetemange kana bwenjwa irea rîra bwakuithia, ta bûra antû bara bangî barûthaga. 2 N'ûntû biû bûrî ba Mwathani Ngai wenu. I ka abûthuurîîte bûtuîka antû baake ba mwanya kuuma kîrî antû bara bangî bonthe ba nthîgûrû.Nyamû ira irî mûgiro na ira itarî mûgiro
3 “Bûtikaarîe gîntû nwa kîrîkû kîra Mwathani augîîte kîrî na mûgiro. 4 Nyamû ino i cio bûûmba kûrîa; ng'ombe, ng'ondu, mbûri, 5 nthia, nkûrûngû, nthwariga, mbûri ya kîthaka, nkondi, kamani na ng'ondu ya kîrîma. 6 Nwa bûrîe nyamû ira irî ncûûga imbatûranie maita maîrî na icookagia mûthagumûrio. 7 Îndî bûtikaarîe nyamû ira itacookagia mûthagumûrio na ciîgua irî na ncûûga ingaanie. Kwoogu bûtikaarîe, nkamîîra, kayûgû, kana înyore. Wana wegua icicookagia mûthagumûrio, ncûûga cia cio timbatûranie maita maîrî, irî na mûgiro. 8 Ngûrwe n'yo îrî mûgiro. Wana wegua ncûûga ciayo icimbatûranie, îticookagia mûthagumûrio. Bûtikaarîe nyama ciacio kana bûtonga biimba biacio.
9 “Nwa bûrîe mûthemba unthe wa nyamû cia rûûyî ira irî na magoko na mathabu. 10 Îndî nyamû ira itarî na mathabu na magoko itibatîîrue kûrîîgwa, înu îrî mûgiro.
11 “Nwa bûrîe nyoni cionthe ira itarî mûgiro. 12 Îndî bûtikaarîe mîthemba îno ya nyoni: rwîgî, nderi, ndiiû, 13 kathûngûnkuma, mpûngû, njîgî mwanya mwanya, 14 nkûngûrû cia mîthemba yonthe, 15 nyaga, nthuntuguru, nkuru, mîthemba mwanya mwanya ya njîgî, 16 gatundu kara kaniini, ntuundu îra nene, ntuundu îra njerû, 17 ntuundu ya rwanda, mboobwe, 18 na ntûnda rûkiingo, mpûng'au, nkune na kîreere. a
19 “Tûnyamû tunthe tûra tûrî mathabu tûrî na mûgiro, na tûtibatîîrue kûrîîwa. 20 Nwa bûrîe nyamû cionthe ira irî mathabu na itarî mûgiro.
21 “Bûtikaarîe nyamû ya gûkua yongwa. Nwa bûneenkere mûgeni ûra atwîre taûniini cienu, akarîa, kana bûkeenderia mûgeni. Îndî biû bûtikaarîe nyamû ta înu n'ûntû biû i bwathûrîrîîtwe Mwathani Ngai wenu.
“Bûtikaatherûkie kabûri na îria rîa gina.
Icuncî bia îkûmi
22 “Bwathûrage gîcuncî kîonthe gîa îkûmi kîa maketha ma mînda yenu woora mwanka. 23 Rîru bûkathi bantû ara Mwathani Ngai wenu athuurîîte kwîgagua arî, bûkarîîra icuncî bia îkûmi bia irio, ndibei, na maguta, amwe na itûra îria bia ng'ombe na ng'ondu. Gîtûmi gîa kûrutaga gîcuncî gîa îkûmi i kûbûrutana gûtîîya Mwathani Ngai wenu. 24 Îndî ûkeegua bantû ara Mwathani Ngai wenu athuurîîte akwîgagua arî naaraaya kuuma mîciî yenu bûra bûtaûmba gûkamata icuncî bia into bira Mwathani Ngai wenu abûthaarimîîte nabio, 25 nwa bwendie icuncî bienu bia îkûmi bia irio na bia nyamû, rîru bûkamate mbia inu bûthi nacio agu Mwathani athuurîîte. 26 Bwakinya oogo, tûmîraani mbia inu kûgûra wa kîra bûkwenda, ng'ombe, ng'ondu, ndibei kana ncoobi, kana biakûrîa bionthe wa bira bûkeegua bata ya kûrîa. Rîru bûrî mbere ya Mwathani Ngai wenu, biû na mîciî yenu bûrîîre na bûkeneere. 27 Na bûtikaariganîrue n'Arawi bara batwîre taûniini cienu n'ûntû bo bataagaîrwa nthîgûrû ta biû.
28 “Mûthiani wa woora mwanka wa îthatû, reetagaani icuncî bia îkûmi bia irio bienu bionthe bûbiaige taûniini cienu. 29 Irio bibi i bia Arawi n'ûntû bo bataagaîrwa nthîgûrû, na bia ageni, na twana tûkîa, na ntigwa, ira itûûraga taûniini cienu. Babatîîrue kûûyaga bakarîa na bakabaa kaingo Mwathani Ngai wenu akabûthaarima mantûûni monthe mara bûkaarûthaga.”