13
1 Musa aathi na mbere kwîra antû ba Isiraeri, “Gûkaaya kûgîa na kîroria kana mûtaûri wa irooto gatîgatîîni keenu, na akabwîra kûrî na kîama kîna kîthiîte kwonekana, 2 na wa ta bûra augîîte, kîama gîku gîkoonekana, na kîroria gîku gîkaaya kûbwîra, ‘Ncûûni tûgonge ngai ciingî ira bûtaiyî,’ 3 bûtikaamûthikîîrie. I Mwathani Ngai wenu akeegua akîbûthima oona kana i bwendeete Mwathani na nkoro cienu cionthe na mîoyo yenu yonthe. 4 Thingatagaani Mwathani Ngai wenu wenka na bûmûkuthûkage. Menyagîîraani maathana maake, na bûmwathîkagîre, mûtûmîkagîreeni na bwîkirimanie n'we. 5 Kîroria kana mûtaûri wa irooto ûra ûcûûgagia kûbûbîtithia njîra abatîîrue aûragwa, n'ûntû n'we atûmaga antû batiganîria Mwathani Ngai wenu, ûra aabûrutire kuuma nthîgûrû ya Miisiri na aboonokia kuuma nyomba ya ûkombo. N'ûntû antû ta babu i bo bakaraga bakîgeragia kûbûrigîîria bûtikaathingate maathana ma Mwathani Ngai wenu, bûbatîîrue bûbaûraga, bûrutaruta ûthûûku gatîgatîîni keenu.6 “Wana mûruanyûkwe ûra bûciaranîrîîtue n'we, kana nthaka kana mwarî waku, kana mwekûrû waku ûra wendeete, kana mûcoore waku ûra wendeete mûno, nwa aaye kîrî woû na witho agakwîra bûgonge ngai ciingî, ngai ira biû na biûyûûyû bienu bûtooro bûgonga, 7 akaaya gûkwîra bûgonge ngai cia antû bara bûtûûranîîre nabo, kana cia antû ba kuuma kûûraaya, 8 ûtikaamwîtîgîîrie kana ûmûthikîîria. Ûtikaamwîgîîrue kîao, ûtikaamwithe kana ûmûtheteera. 9 Ûbatîîrue ûmûûraga. I woû ûbatîîrue kûmwambia rîru antû bara bangî bakathiingatîîra bûkamûûraga. 10 Ûragaani ûra arî na mabîtia na maiga, n'ûntû n'akwenda kûbûrutaruta buuma kîrî Mwathani Ngai wenu ûra wabwonokiirie kuuma Miisiri, nyomba ya ûkombo. 11 Rîru antû bonthe ba Isiraeri bakeegua bûra gwakarîka, bagîe na ûguaya, na gûtirî we akeenda kûrûtha ûntû ta bûbu bûthûûku kaîrî.
12 “Bûkaaya kwîgua gûkîîrwa îgûrû ya taûni îmwe ya ira Mwathani Ngai wenu akûbûnenkera bûtûûra, 13 atî antû baathûûku kuuma gatîgatîîni keenu i babîtithîîtie antû ba taûni yao njîra bakîbeeraga, ‘Tûthiini tûgonge ngai ciingî’ (ngai ira bûtaiyî), 14 bûbatîîrue bûtuîria nguutû inu bwega. Wegua n'ûmma ûntû bûthûûku ûgu i bûkarîkîîte, 15 bûbatîîrue bûûraga antû bonthe ba taûni înu. Na bwînyangie bionthe bira birî ku kûrû amwe na nyamû ciao cia ndîîthia. 16 Rîru bwîthîranie into bionthe bia antû ba taûni înu bûbiûmbe bantû aaranîru gatîgatî ga taûni, kîrî kîgongwana kîra kîbîîthagua kîrî Mwathani Ngai wenu, rîru bûrîrîkîre na mwanki taûni înu na into bionthe bira birî ku. Îtûûre îrî îganjo na îtigaacooke gwakwa kaîrî. 17 Bûtikaathûkie gîntû nwa kîmwe gîa into bibu bibatîîrue kûbîîthua, n'we Mwathani akabwebithia mûthûûro wake na abwîgîîrue kîao. Agaatûma bûtuîke mûgongo ûmûnene, wa ta bûra eerire biûyûûyû bienu. 18 Mwathani Ngai wenu akabwîgîîrua kîao wegua bûkamwathîkîra na bûthiingate maathana mara nkûbûnenkera îmunthî, na bûrûthage bûra Mwathani akwona kûbatîîrue.”