Bantû a kûgongera Ngai
12
1 Musa aathi na mbere kwîra antû ba Isiraeri, “Mama i mo mawatho na moorutani mara bûbatîîrue kwathîkîra na wîru îgiita rîonthe rîra bûgaatûûra nthîgûrû îra Mwathani Ngai wa biûyûûyû bienu, abûnenkereete bwîgwatîra. 2 Rîra bûkeengatia mîgongo îra îtûûraga ku, nwa mwanka bwomorange gûntû kûra bagongagîra ngai ciao; irîmaani îgûrû, îgûrû rîa tûrîma, na ruungu rwa mîtî îmîîthî. 3 Bwomorange ithînjîro biao, bûrebûrange itugî bia ngai ciao, bûbîîthie itugî bia ngai yao îra yîîtagwa Asera, na bwînyangie ngai ciao cia ûrongo bûra itakîonwa kaîrî. 4 Naabi bûtikaagonge Mwathani Ngai wenu ta bûra antû babu bagongaga ngai ciao. 5 Mwathani akaathuura bantû amwe a nthîgûrû ya mîîrîga yenu, ara akeegagua arî. Agu noogo bûkaathiiyaga kûmûgongera, 6 na kûmûrutîra igongwana bia kûbîîthua, igongwana bira biingî, icuncî bia îkûmi, biewa bia mwanya, biewa bia kûûyûria mûthiîtio, biewa bia kwîbendera, na biewa bia itûra îria bia mbûri na bia ng'ombe. 7 Agu noogo biû na mîciî yenu bûkaarîîyagîra mbere ya Mwathani Ngai wenu, bûgakeneera bûra Mwathani Ngai wenu athaarimîîte ngûgî ya njara cienu. 8 Bûtikaathi na mbere kûrûtha bûra bûrarûthaga n'ûntû mwanka agu, muntû ararûthaga wa bûra akwenda, 9 n'ûntû bûtikûrî bûkûthûngîra nthîgûrû îra Mwathani Ngai wenu akûbûnenkera, kûra bûgaatûûraga na ûkiri. 10 Rîra bûkaariinga Njorondani, bûtûûre nthîgûrû îra Mwathani Ngai wenu akûbûnenkera, Mwathani akabwa ûkaria na ûkiri na anthû beenu. 11 Rîru Mwathani akaathuura bantû amwe ara bûkaamûreetagîra into bionthe bira nkûbwîra; igongwana bia kûbîîthia, igongwana bira biingî, icuncî bia îkûmi, biewa bia mwanya, na biewa bia kûûyûria mîthiîtio. 12 Na naagu inoogo bûgaakeneera mbere ya Mwathani Ngai wenu, biû na nthaka cienu, aarî beenu na aruti ngûgî beenu ba antû arûme na ba aka na Arawi bara batûûraga taûni cienu n'ûntû ti bagaîre nthîgûrû. 13 Bûmenyeere bûtikaathi kûrutîra igongwana bia kûbîîthia wa ara bûkwenda. 14 Bûkaabirutagîra bantû amwe ara Mwathani akaathuura nthîgûrû ya mwîrîga ûmwe wenu. Agu onka noogo bûûmba kûrutîra igongwana bienu na kûrûthîra mantû mara mangî monthe nkûbwîra.15 “Îndî nwa bûthînjîre na bûkarîîra nyama cia nyamû cienu gûntû kûra bûtûûraga. Na nwa bûrîe imbingî wa bûra bûkeenda kûringana na bûra Mwathani Ngai wenu abûnenkereete igana. Woora ûmwe wacienu, wîgue atarî na mûgiro kana arî nau, nwa arîe nyama cia cio wa ta bûra bûrîîyaga cia nthia na cia nkûrûûngû. 16 Îndî bûtikaarîe nthakame. Bûbatîîrue bûmîîtûûra nthîgûrû ta rûûyî. 17 Na bûtikaarîîre icuncî bienu bia îkûmi bia irio, bia ndibei înjerû kana bia maguta, mîciî yenu, kana bûrîîra itûra îria bia ng'ondu na bia ng'ombe, kana biewa bia kûûyûria mîthiîtio, biewa bia kwîbendera kana biewa bia mwanya mîciî yenu. 18 Bûbatîîrue bûrîîra biewa bibi mbere ya Mwathani Ngai wenu bantû ara akaathuura. Bûbirîîre oogo biû na nthaka na aarî beenu, aruti ngûgî beenu ba antû arûme na ba aka, na Arawi bara batwîre taûni cienu, bûgîkenagîîra mantû monthe mara bûkûrûtha mbere ya Mwathani. 19 Na bûmenyeere bûtikaariganîrue n'Arawi rîra rîonthe bûgaatûûra nthîgûrû yenu.
20 “Rîra Mwathani Ngai wenu akaaramia mîanka ya nthîgûrû yenu wa ta bûra aabwîrire, nwa bûrîe nyama warîra bûkeenda. 21 Ûkeegua bantû ara Mwathani Ngai wenu athuurîîte akeegagua n'araaya kuuma mîciî yenu, nwa bûthînje ng'ombe kana ng'ondu ira Mwathani abûneenkereete na bûkarîîra nyama mîciî, wa ta ûgu nkûbwîra. 22 Muntû wonthe, eegue atarî kana arî na mûgiro, nwa arîe nyama inu, wa ta bûra arîîyaga cia nkûrûngû kana cia nthia. 23 Îndî bunka bûmenyeere bûtikaarîe nyama na nthakame, n'ûntû mwoyo ûkaraga nthakameeni na ûtibatîîrue ûrîîyanîria mwoyo na nyama. 24 Kwoogu, bûtikaarîe nthakame, îndî bûmîîtûûrage nthî ta rûûyî. 25 Bûtikaarîe nthakame, kaingo mantû meenu na ma aana beenu makaathi bwega, n'ûntû bûkeegua bûkîrûtha bûra Mwathani agûkeneera. 26 Îndî bwirage into bionthe bira biathûrîre Mwathani na bira bwîranîrîîte bûkaarutîra Mwathani, bantû ara Mwathani akeegua athuurîîte. 27 Bûkaarutagîra nyama na nthakame ya kîgongwana kîra kîbîîthagua kîthînjîrooni kîa Mwathani Ngai wenu. Nthakame ya igongwana bira biingî îbatîîrue îîtûûrwa rûteere rwa kîthînjîro kîa Mwathani Ngai wenu. Îndî nwa bûrîe nyama. 28 Bûmenyeere mûno bwathîkîre maathana mama monthe nkûbûnenkera kaingo mantû meenu na ma nciarwa cienu makaathi bwega tene na tene, n'ûntû bûkeegua bûkîrûtha bûra Mwathani Ngai wenu akwona bûrî bwega na bwagîru.
29 “Rîra Mwathani Ngai wenu akaathiria mîgongo naabi bûmîîngatie na bwîgwatîre nthîgûrû yao, 30 bûtikaaye kûgwa magerioni ma kûbathingata bûgonga ngai ciao cia ûrongo. Bûtikeebîîre, ‘Î bungwa n'ata mîgongo îno îgongaga ngai ciao? Anga twatûgonge Mwathani wa tabo?’ 31 Bûtikaagonge Mwathani Ngai wenu ta bûra mîgongo îgongaga ngai ciao. Mîgongo înu nîrûthaga mantû marî mariiri bakîgonga ngai ciao, mara Mwathani ameneete. Wana i babîîthagia nthaka na aarî baao, barî igongwana kîrî ngai inu ciao.
32 “Bûmenyeere mûno bwathîkîre maathana monthe mara nkûbûnenkera. Bûtikamongeere kana bûmagaûra.”