11
1 Musa aathi na mbere kwîra antû ba Isiraeri, “Enda Mwathani Ngai waku na rîonthe wathîkagîre maathana, mawatho na moorutani maake monthe. 2 Îmunthî, ririkanaani bûra bwîrutanîîte îgûrû rîa Mwathani kuumania na bûra bwoneete akîrûtha. Ririkanaani i biû bwingwa bwonire inya, ûûmbani na ûnene bwa Mwathani na t'aana beenu boonire. 3 I bwonire biama na magegania mara aarûthire Miisiri kîrî mûnene na kîrî nthîgûrû yonthe. 4 I bwonire bûra Mwathani aathiriirie njûûrî ya Miisiri yonthe, amwe na mbaraathi na nkaarî ciao cia mbaraathi, rîra aabakondoriirie na rûûyî rwa Îria Rîtuune beengeene naabi. Na kinya îmunthî tûrî nwa banyamaaraga n'ûntû bûbu. 5 I bwiyî bûra Mwathani aabûrûthîîre rwanda mbere bûkinya aaga. 6 I bûkûririkana bûra aarûthire nthaka cia Eriabu; Ndathani na Abiramu, ba mwîrîga wa Rubeni. Bûra nthîgûrû yatîkire, antû bonthe ba Isiraeri bakîonaga, yabameria bo na mîciî yao, na marema maao, na into biao bionthe. 7 Na mma i biû bwonire mantû mama manene mara Mwathani arûthîîte.8 “Kwoogu, athîkîraani maathana mara nkûbûnenkera îmunthî kaingo bûgîa na inya bûûmba kûringa muuro na bwîgwatîra nthîgûrû îra bûthiîte kûthûngîra. 9 Woona bwathîkîra maathana mamu, bûgaatûûra îgiita rîîraaya nthîgûrû îra Mwathani athiîtiirie kûnenkera biûyûûyû bienu na nciarwa ciao. N'yo i nthîgûrû yûûyûrîîte îria na ûkî. 10 Nthîgûrû îra bûthiîte kwîgwatîra îtikari ta nthîgûrû ya Miisiri kûra bwaumire, naara bwandaga mbeû na bwarutaga ngûgî îmbûmo ya gûtûûrîria rûûyî ta mûnda wa nyani. 11 Îndî nthîgûrû îra bûthiîte kûthûûngîra na kwîgwatîra, i nthîgûrû yûyûri irîma na iboonde, na yuuraga mbura înyingî kuuma îgûrû. 12 Mwathani Ngai wenu n'we amîmenyagîîra na akamîraithîra wa îra ntugû, kuuma mwanjîîrio mwanka mûthia wa mwanka.
13 “Kwoogu, wegua bûkaathîkîra maathana mara nkûbûnenkera îmunthî monthe, na bwende na bûgoonge Mwathani Ngai wenu na nkoro na mîoyo yenu yonthe, 14 akaurithia mbura nthîgûrû yenu îgiita rîra rîagîrîîte, mbura ya nthano na ya mûratho, kaingo bwîgua bûrî na maketha ma irio, ncabiibû cia kûrûtha ndibei na mîceituuni ya kûrûtha maguta. 15 Akabûnenkera nyaki ithakaani bienu ya kûrîîwa i ng'ombe cienu, naabi bûkeegua bûrî na biakûrîa bia kûgana.
16 “Bwîmenyeere bûtikaaye kweneerua bûtiganîria Mwathani, bûthi kûgonga na gûtûmîkîra ngai ciingî. 17 Bûkathiingata ngai iingî, Mwathani n'akaathûûra i biû. Akainga îgûrû na atige kuurithia mbura na irio bienu bitiikûra. Na bûgaakua bûtakaraangîîte nthîgûrû înu mbega Mwathani akûbûnenkera. 18 Kwoogu thûkiani biugo bibi biakwa na ûrito na bûbirikie nkorooni na mathûgaaniani meenu. Na n'ûntû bwa mûririkana, bûbiogeereni njaraani cienu na moothiûni meenu. 19 Bûrutane aana beenu bio, na bûkare bûkîaragia îgûrû rîa bio bûrî mûciî na bûrî njîraani, bûkîmaama na bûgîûkîra. 20 Bûbiandîke mbureemuuni cia mîrango na mîîrîgaani yenu. 21 Bwarûtha ûgu, ntugû cienu na cia aana beenu cia gûtûûra nthîgûrû îno Mwathani aathiîtiirie kûnenkera biûyûûyû bienu ciîgue irî inyingî ta ntugû ira îgûrû rîtwîre rîrî îgûrû ya nthîgûrû.a
22 “Bûmenyeere mûno bwathîkîre mawatho mama nkûbûnenkera îmunthî bûmathingata, bwende Mwathani Ngai wenu, bûthiingate njîra ciake na bwîkirimanie n'we. 23 Rîru Mwathani akeengatia mîgongo yonthe îra îrî mbere yenu na bûkamîtuunya nthîgûrû înu, na wegua i mîgongo îmînene na îrî na inya kûbûkîra. 24 Gûntû kunthe kûra bûgaakinyanga na magûrû meenu gûgaatuîka kwenu. Nthîgûrû yenu îkeegua îthiîte kuuma rwanda mbarî ya iti mwanka Rebanoni mbarî ya n'egûrû, na kuuma muuro ûra wîtawa Yufîrîti mbarî ya umîîro bwa riûa mwanka îria rîa Menditarîniani mbarî ya ûthwîro bwa riûa. 25 Gûtirî muntû akaûmba kûbûrigîîria. Mwathani Ngai wenu agaatûma antû bagwatwa n'ûguaya n'ûntû bwenu, gûntû kunthe kûra bûkaathi nthîgûrû yonthe, wa ta bûra aabwîrire.
26 “Îmunthî nkûbûnenkera mwanya wa kûthuura kîthaarimo kana kîrumi. 27 Bûkaathaarimwa wegua bûkaathîkîra maathana ma Mwathani Ngai wenu mama nkûbûnenkera îmunthî. 28 Îndî bûkaagwatwa i kîrumi wona bwaregana na maathana ma Mwathani Ngai wenu na bwauma njîraani îra nkûbwatha îmunthî bûthiingata bwatua kûgonga ngai iingeni ira bûtaiyî mbereeni.
29 “Rîra Mwathani Ngai wenu akaabwira nthîgûrû îra bûthiîte kûthûngîra bwîgwatîra, buugîîria bûra Mwathani akaathaarimana bûrî kîrîmaani kîa Ngerisimu na buugîîrie bûra akaarumana bûrî kîrîmaani kîa Ebari. 30 Wa ta bûra bwiyî, irîma bibi birî rûteere rwa ûthwîro bwa riûa bwa muuro wa Njorondani, nthîgûrû ya Akanaani bara batwîre kîbondeeni kîa Njorondani. Birî mbarî ya ûthwîro bwa riûa bwa taûni ya Girigari akubî na mîpuru ya More. 31 Bûrî akubî kûringa muuro wa Njorondani na kwîgwatîra nthîgûrû îra Mwathani Ngai wenu akûbûnenkera. Rîra bûkaamîgwata na bûtûûre ku, 32 bûmenyeere mûno, bwathîkîre mawatho mara nkûbûnenkera îmunthî.”