Musa aneenkerwa maathana kaîrî
10
1 Musa aathi na mbere kwîra antû ba Isiraeri, “Kagiita gaku Mwathani ambîîra, ‘Caa mbaariû ciingî ciîrî cia maiga ta ira cia mbere, na ûtume îthandûkû rîa mbaaû, kûra ûgaaciîkîra, rîru ûtwee kîrîma ûûye naaga ndî. 2 Nkaandîka mbaariûni inu biugo wa bira ndaandîkîîte kîrî ira cia mbere wareburaangire, naawe ûgaciîkîra îthandûkûûni.’3 “Kwoogu i ndaatumire îthandûkû rîa mbaaû cia mîgaa, na ndacaa mbaariû ciîrî cia maiga ta ira cia mbere rîru ndaatwa nacio kîrîmaani. 4 Mwathani aandîka mbaariûni inu biugo bira biongwa aandîkîîte mbaariûni ira cia mbere, na biugo bibu i maathana mara îkûmi mara aabwîrire kuuma gatîgatîîni ka mwanki, kîrîmaani, naabi bwîthîreene agu ruungu rwakîo. Na aanenkera cio. 5 Rîru ndaagarûka na ndaagûrûka kuuma kîrîmaani, ndeekîra mbaariû inu îthandûkûûni rîra ndaarî ngûtuma, wa ta bûra Mwathani aambîîrîîte. Wana îndî mbaariû inu irî kûûra îthandûkûûni.
Arûni aakua
6 “Antû ba Isiraeri bauma ithimaani bia antû ba Njaakani baathi Mosera, ara Arûni aakuîrîîre na aathikwa. Nthaka yake Eriasari aatuîka mûthînjîri ûra mûnene wa Ngai bantûûni a îthe. 7 Rîru baathi mwanka Gundigonda, baacooka baathi Njotibathi, gûntû kwarî na miuro îmiingî îrî na rûûyî.
Ngûgî cia Arawi
8 “Kagiitaani gaku Mwathani aathûra antû ba mwîrîga wa Rawi bakamataga Îthandûkû rîa Kîrîîkanîro kîa Mwathani, kûrutagîra Mwathani ngûgî barî athînjîri na kûthaarimaga antû riîtwani rîa Mwathani. 9 Na gîku i kîo gîtûmi antû ba mwîrîga wa Rawi bataagaîrwa nthîgûrû mîîrîga îra îîngî ya Isiraeri îkîgaîrwa. Mwathani n'we rûgai rwao, wa ta bûra Mwathani Ngai wenu aabeerîîte.
Mwathani acookia îromba rîa Musa
10 “Indaakarire kîrîmaani, wa ta kagiita ka mbere, ntugû mîrongo îna, mûthenya na ûtugû. Mwathani aathikîîria îromba rîakwa, eetîgîîria gûtîîra kûbûthiria. 11 Rîru Mwathani ambîîra mbûye mbûtongoreerie bûthûûngîre na bûkeegwatîre nthîgûrû îra augîîte akaanenkera biûyûûyû bienu.
12 “Na îndî antû ba Isiraeri, n'ata Mwathani Ngai wenu eendaga kuumania naabi? Eendaga bûmûtîîya, bûtûûra kûringana na kwenda gwake, bûmwenda na bûmûgonga na nkoro na mwoyo wenu unthe, 13 na bwathîkagîre maathana na watho bwa Mwathani bûra nkûbûnenkera îmunthî kaingo bûgaateetheka. 14 Îgûrû rîra rîrî îgûrû mûno i rîa Mwathani. Nthîgûrû na into bionthe bira birî ku i bia Mwathani Ngai wenu. 15 Îndî wana gûkari ûgu Mwathani n'endire biûyûûyû bienu mûno mwanka abûûkîîria biû nciarwa ciao îgûrû ya mîgongo îra îngî, wa ta bûra bûkari îmunthî. 16 Kwoogu taanwani nkoro cienu na bûtige kûûmia biongo.
17 “Mwathani Ngai wenu n'we Ngai ûra mûnene kîrî ngai ira ingî cionthe na n'we Mwathani wa aathani bonthe. I Ngai ûmûnene, arî na inya na n'wa kûmakania. We atiendanagîîra na atigukumîka. 18 N'athetagîîra moobatu ma nkea na ma ntigwa. N'endeete ageni bara batwîre gatîgatîîni keenu na nabaneenkagîra irio na nguo. 19 Kwoogu, wana biû endagaani ageni bara batwîre gatîgatîîni keenu, n'ûntû wana biû i bwarî ageni nthîgûrû ya Miisiri. 20 Tîîyagaani Mwathani Ngai wenu na bûmûgongage we wenka. Îîrikieni kîrî we na bûthiîtagie na riîtwa rîake rîonka. 21 I Ngai wenu na ibûbatîîrue bûmûkumia. N'abûriingîrîîte biama biineene na bia kûrigaria bûkîîbonagîra na meetho. 22 Rîra biûyûûyû bienu biathiire Miisiri baarî antû mîrongo mûgwanja. Îndî îîndî Mwathani Ngai wenu n'abûthagayîîtie bwaingîa ta nthata cia îgûrû.”