Kûrega kwathîka gwa antû
9
1 Musa aathi na mbere kwîra antû ba Isiraeri, “Thikîîriani biû antû ba Isiraeri! Îmunthi bûrî akubî kûringa Njorondani na bwîgwatîra nthîgûrû ya mîgongo îmînene na îrî na inya nkûrûki ya biû. Taûni ciao n'iinene na nthingo cia cio iraayîîte cietia ciakinya matuuni. 2 Antû ba noogo nabo i baaraaya na barî na inya, antû baanene ba rûrîîyo rwa Anaki, antû bara baarî baanene nkûrûki ya kîthimi. Na bûreegua gûkîîrwa gûtirî we ûûmba kûbacinda ndûani. 3 Îndî menyaani na mma îmunthî atî Mwathani Ngai wenu akaaringa Njorondani arî mbere yenu ta rûrîrîmbî rwa mwanki na abathirie. Akaathi abathirie inya mbere bûkinya kaingo bwakinya bûbakuthakuthia na bûbathiria na mpwî, wa ta bûra Mwathani augîîte gûgaakarîka.4 “Mwathani Ngai wenu abûrûthîra ûgu bûtikeebîîre na nkoro, ‘Mwathani atûnenkera nthîgûrû îno n'ûntû tûrî baagîru!’ Yiiyi. Mwathani arîîngatia mîgongo îno mbere yetû n'ûntû bwa kûûmia biongo kwao. 5 Mwathani atikûreka bûthûngîra na bûtûûra nthîgûrû înu n'ûntû bwa bûra bûrî beega kana bûrûthaga mantû mara mabatîîrue. Îndî akaabeengatia baume ku n'ûntû bwa ûthûûku bwao na n'ûntû n'akwenda kûûyûria kîrîîkanîro kîra arîîkanîîre na biûyûûyû bienu, Îburaîmu, Isaka na Njakubu. 6 Ka mbuge kaîrî ata rî, Mwathani Ngai wenu atikûbûnenkera nthîgûrû îno mbega îtuîka yenu n'ûntû bûrî baagîru. Bûtirî baagîru bûrî antû baûmo biongo!
7 “Ririkanaani na bûtikaaro bûriganîrua bûra bwathûûriirie Mwathani Ngai wenu bûrî rwanda. Kuuma ntugû îra bwaumire Miisiri mwanka ntugû îra bwakinyire aaga, bûtwîre bûûmîrîîtie Mwathani biongo. 8 Ririkanaani bûra bwathûûrîîtie Mwathani bûrî kîrîmaani kîa Orebu, mwanka eenda kûbûthiria. 9 Kagiita gaku i rîra ndaarî kîrîmaani îgûrû nkîneenkerwa mbaariû cia maiga ira ciandîkîîtwe maathana ma kîrîîkanîro kîra Mwathani aarî akûrûtha naabi. Ndaakarire ku ntugû mîrongo îna, mûthenya na ûtugû, ntakûrîa kana nyua nwa rûûyî. 10 Mwathani nanenkeere mbaariû inu ciîrî cia maiga, ira aandîkîîte na njara yake wengwa, biugo bira aabwîraga kuuma gatîgatî ka mwanki, rîra bwethîreene kîrîmaani.
11 “Mûthiani wa ntugû mîrongo îna, mûthenya na ûtugû, Mwathani n'ampeere mbaariû ciîrî cia maiga ira ciandîkîîtwe maathana. 12 Rîru Mwathani ambîîra, ‘Gûrûkaanga na mpwî n'ûntû antû baaku bara waarutire Miisiri bakwîthûûkia. I baathûkîrîîte kuuma njîraani îra ndaabeerire bathiingate na beeturîra ngai ya ûrongo ya thaabu.’
13 “Mwathani ambîîra, ‘I mboneete antû baba i baûmo biongo mûno. 14 Ûtikaangirie. Inkwenda kûbathiria kûrû na bariganîrie cwe. Rîru ngaatuîkithia rûrîîyo rwaku mûgongo ûmûnene, ûmûnene na ûrî na inya nkûrûki ya bûra ûgana îîndî.’
15 “Kwoogu ndaagarûka na ndaagûrûka kîrîmaani kîra kîaûmbûkaga mwanki nkamatîîte mbaariû ciîrî cia maiga ira ciandîkîîtwe maathana. 16 Nkûraitha ndoona i bwarî kûrega kwathîkîra watho bûra Mwathani Ngai wenu abûneenkereete na njîra ya kwîrûthîra ngai ya ûrongo ya kayaû ka thaabu. Bwagîa mpwî cia kwathûkîra kuuma njîraani ira Mwathani aabwathîîte bûthiingate. 17 Kwoogu ndaathûkia mbaariû ira cia maiga ndaikanyania nthî ndairebûranga bûkîonaga. 18 Rîru ndaamaama nthî na nda mbere ya Mwathani, ntakûrîa kana nyua nwa mbi ntugû mîrongo îna mûthenya na ûtugû. Ndaarûthire ûgu n'ûntû bwa bûra bweyîîtie bwarûtha bûra Mwathani athwîre, bwamûthûûria. 19 Indaamakaga n'ûntû mûthûûro ûra Mwathani aarî nau îgûrû rîenu nwarî ûmûnene mûno ûntû akîbûthiria. Îndî Mwathani n'anthikîîrie kaîrî. 20 Mwathani n'athûûri n'Arûni kinya we ûntû akîmûûraga. Kwoogu indaaroombeere Arûni wana nwe. 21 Rîru ndaathûkia nyamû înu ya meeyia, mûbuanaano ûyu wa kayaû bwarûthîîte, ndamîrîrîkîra na mwanki, ndamîrebûraanga na ndamîthia mwanka yatuîka rûgûûnkû, ndaatûûra rûgûûnkû rûru muurooni ûra uumîîte kîrîmaani.
22 “Na kaîrî, i bwathûûriirie Mwathani rîra bwarî Tabera Masa na bûrî Kiburothi-Ataaba. 23 Na rîra bwarî Kandesi-Barinea Mwathani aabwîrire, ‘Îthiini bûthûkie nthîgûrû îra nkûbûnenkera.’ Îndî naabi bwaûmîria Mwathani Ngai wenu biongo. Bûtaamwîtîgia kana bûmwathîkîra. 24 Biû bûrî antû bara batwîre bataathîkagîra Mwathani kuuma kagiita kara ndaabûmenyire.
25 “I kîo gîatûmire maama nthî na nda mbere ya Mwathani ntugû mîrongo îna mûthenya na ûtugû, n'ûntû aarî akuuga akabûthiria. 26 Ndaarombire Mwathani ndauga, ‘Mwathani Mwene Inya, ûtikaathirie antû baaku. Waabarutire Miisiri na inya îînene na waboonokia na ûûmbani bûûnene wabatuîkithia rûgai rwaku rwa mwanya. 27 Îririkana bûra aruti ngûgî baaku Îburaîmu, Isaka na Njakubu baakwathîkîîre bwega. Ûriganîrue n'ûremu na meeyia ma antû baba ba Isiraeri. 28 Ûkaaya kûthiria antû baba, antû ba Miisiri bakauga, “Mwathani aabathiriirie n'ûntû n'aremirwe i kûbaira nthîgûrû îra aathiîtîîtie kûbaira.” Kana bauge, “Aabathiriirie n'ûntû n'abameneete; aabairire rwanda athi kûbathirîria noogo.” 29 Baba n'antû baaku na rûgai rwaku rwa mwanya. Waabarutire Miisiri ûgîtûmagîra inya na ûûmbani bwaku bûûnene.’ ”