Bûtikaariganîrue i Mwathani
8
1 Musa aathi na mbere kwîra antû ba Isiraeri, “Bwathîkîre na wîru mawatho mara nkûbûnenkera îmunthî, kaingo bûthi na mbere gûtûûra na bwingîe, na bûkaathûngîra na bwîgwatîre nthîgûrû îra Mwathani athiîtiirie kûnenkera biûyûûyû bienu. 2 Ririkanaani bûra Mwathani aabûtongoriirie rûgendooni rwa mîanka mîrongo îna gûkûrûkîîra rwanda, kaingo abûtuîkithia aathîki na abûthima nkoro cienu oona kana bûkaûmba kwathîkîra maathana maake kana bûtiûmba. 3 N'atûmire bûgea na kwînyiia na njîra ya kûreka bûbûûta na gûcooka kûbûrera na mana, gîntû kîra gîtaiyîkeene agu kabereeni i biû kana biûyûûyû bienu. Aarûthire ûgu kaingo abûrutana mûgaate unka ûtiûmba gûtûûria muntû mwoyo, îndî kiugo kîonthe kîra kiumaga kanyuani ka Mwathani kîamûtûûria. 4 Mîankaani înu mîrongo îna, nguo cienu itaathira kana magûrû meenu maimba i kûthi. 5 Menyaani ata rî, wa ta bûra muntû agondokagîra mwana wake n'ûntû bwa mabîtia maake, nwabu Mwathani abûgondokagîra n'ûntû bwa mabîtia meenu. 6 Kwoogu, menyeeraani maathana ma Mwathani Ngai wenu, bûthiingatage bûra akûbwîra na bûkamûtîîya. 7 Mwathani Ngai wenu abûreeteete nthîgûrû î nthoongi mûno, îrî na miuro, inyaka na ithima biingî iboondeeni na irîmaani. 8 I nthîgûrû îgûciara ngano na Sayiri, mîcabiibû, mîkûyû, mîkûkûmanga, maguta ma mîceituuni na ûkî. 9 Naagu bûkoona irio biingî na bûtiaga nwambi. Maiga maayo marî na cuuma, kuuma tûrîmaani twayo bûkeenjaga cuuma ya rûthuku. 10 Rîra bûkaarîa bûbae, bûkumie Mwathani Ngai wenu n'ûntû bwa nthîgûrû îmbega îra abûnenkera.11 “Îndî bûmenyeere bûtikaaye kûriganîrua i Mwathani Ngai wenu, bûrega kwathîkîra mawatho mara nkûbûnenkera îmunthî. 12 Rîra bûkeegua bûrî na bionthe bira bûkwenda kûrîa na bwaka nyomba inthongi cia gûtûûra, 13 na bûgîe na ng'ombe, mbûri na ng'ondu inyiingî na thaabu, fetha na mootonga mamu mangî meenu maingîe, 14 bwîmenyeere mûno rîru bûtikaaye gwîkumia bûriganîrua i Mwathani Ngai wenu, ûra aabwonokiirie kuuma ûkombooni nthîgûrû ya Miisiri. 15 Aabûtongoreerie rwanda rûûnene na rwa kûmakania rwarî na njoka irî cûmû na ing'aarurî na rwarî rûrûûmo rûtarî rûûyî. N'abûrutîîre rûûyî kuuma rwaraani rûûmo rwa iiga 16 na abûrera na mana bûrî rwanda, irio bira agu mbereeni bitaiyîkeene i biûyûûyû bienu. Arûthire ûgu kaingo bûtuîka antû bakwînyiia na abûthima kaingo mûthiani mantû meenu mathi bwega. 17 Bûmenyeere bûtikaaye kûthûgaania i biû bwetongiirie na inya na kûûmbana kwenu bwingwa. 18 Ririkanaani Mwathani Ngai wenu n'we ûbûneenkagîra inya ya gûtonga. Arûthaga ûgu n'ûntû we i mwîtîgua kîrî kîrîîkanîro kîra aarûthire na biûyûûyû bienu.
19 “Îndî menyaani ata rî, bûkaaya kûriganîrua i Mwathani Ngai wenu na bûkathiingata ngai ciingî, bûgîcigoongaga na bûgaciîndamîîra, nwa mwanka bûkaathirua. 20 Wa ta bûra Mwathani athirîîtie mîgongo îra yabûrigagîîria njîraani, woogu nwabu wana biû bûkaathirua n'ûntû bwa kûrega kwathîkîra Mwathani Ngai wenu.”