Antû ba Ngai
7
1 Musa aathi na mbere kwîra antû ba Isiraeri, “Rîra Mwathani Ngai wenu akaabûreeta nthîgûrû îra bûthiîte kûthûûngîra bwîgwatîra, akeengatia mîgongo îmiingî îra îtwîre ku, mbere ya bûkinya. N'yo mîgongo înu ni Aiti, Angirigasi, Amori, Akanaani, Aperisi, Aibi na Anjebusi. Mîgoongo îno mûgwanja îrî na antû baingî na îrî na inya kûbûkîra. 2 Rîra Mwathani akaaneenkanîra antû babu njaraani cienu na bûbature, bûbatîîrue bûbathiria bonthe. Bûtikaarûthe irîîkanîro nabo kana bûbeegîîrua kîao. 3 Bûtikaagûrane nabo kana bûreka nthaka cienu ithi kûgûra aarî baao kana aarî beenu bagûrwa i nthaka ciao. 4 Bakarûtha ûgu i bagaatûma aana beenu bantiganîria na batua kûgonga ngai ciingî. Gûkaaya gûkarîka ûgu Mwathani akaathûûra i biû na akabûthiria.5 “Kwoogu ûûgû i bu bûbatîîrue kûrûtha bwomorange ithînjîro biao, bûrebûraange itugî biao bira bagoongaga, bûnukaange mîbuanaano ya ngai îra îîtagwa Asera na bûbîîthie ngai inu ciao cia ûrongo na mwanki. 6 N'ûntû biû bûrî antû baatheru, ba Mwathani Ngai wenu. Mwathani Ngai wenu aabûthuurire kuuma kîrî antû ba nthîgûrû yonthe bûtuîka mûgongo ûrî gîtûmi mûno kîrî we.
7 “Mwathani ataabwendire na abûthuura n'ûntû i bwarî baingî nkûrûki ya antû bara bangî. Na mma i biû bwarî mûgongo ûra warî na antû baakai nkûrûki ya mîgongo îra îîngî! 8 Gîtûmi Mwathani n'akwendeete na n'eendaga kûûyûria mûthiîtio ûra athiîtiirie kîrî biûyûûyû bienu. I kîo gîatûmire Mwathani abwonokia na inya înene ya kûmakania kuuma ûkombooni bwa Faraû mûnene wa Miisiri. 9 Kwoogu menyaani ata rî, Mwathani Ngai wenu n'we Ngai. I Ngai mwîtîgua ûra aûyûragia kîrîîkanîro gîake na akoonania kîao gîake kîrî nciarwa ngiri na ngiri cia bara bamwendeete na baathîkagîra maathana maake. 10 Îndî atitiiragîra gûkaanûkia na kûthiria bara bamûthwîre. 11 Kwoogu athîkagîraani maathana, watho na mawatho mara nkûbûnenkera îmunthî.
Ithaarimo n'ûntû bwa kwathîka
(Kûri 28:1-14)
12 “Wona bwamathikîîria na mma, Mwathani Ngai wenu akaûyûria kîrîîkanîro gîake na kûbwonia wendo bûtarî mûthia wa ta bûra eerire biûyûûyû bienu. 13 Akabwenda, abûthaarime na atûme bûtuîka mûgongo ûmûnene. Akabûnenkera aana baingî na abûthaarime na kîmera, ndibei, maguta ma mîceituuni, ng'ombe na ng'ondu inyiingî nthîgûrû îra athiîtiirie kûbûnenkera. 14 Bûkeegua bûrî bathaarime nkûrûki ya mîgongo îra îîngî yonthe. Gûtirî antû arûme kana aka beenu bakeegua barî nthaata. Nyamû cienu cia ndîîthia igaaciaranaga. 15 Mwathani akabûrigîîria kuumania na mîrimo yonthe. Atiireka bûgwatwa i mîrimo îmîthûûku îra bwaiyî rîra bwarî Miisiri, îndî mîrimo înu n'yo agaatûmaga îgwata anthû beenu!
16 “Antû bara Mwathani Ngai wenu akaaneenkanîra njaraani cienu, bûbatîîrue bûbathiria cwe. Bûtikaabeegîîrue kîao kana bûgoonga ngai ciao. Bûkarûtha ûgu i bûkeegua bûgwîte mûtegooni. 17 Rîmwe n'wa bwîbîîre nkorooni, ‘Mûgongo ûyû ûrî na inya nkûrûki yetû na kwoogu tûtiûmba gûcuîngatia.’ 18 Îndî bûtikaabakuthûke! Ririkanaani bûra Mwathani Ngai wenu arûthire Faraû nantû baake bonthe Miisiri. 19 Ririkanaani inyamaara bia kûrigaria bira Mwathani aabatûmîîre bûkîonaga na meetho meenu. Bûririkane biama na magegania, inya na ûûmbi bûûnene bûra aatûmîîre kûbûruta Miisiri. Mwathani Ngai wenu nwabu akaarûtha antû bonthe ba mîgongo înu bûgûkuthûka. 20 Na Mwathani Ngai wenu agaatûma magu mathi mathirie matigari ma antû baakai bara bakeegua batigeere beebithîîte giria bûboona.
21 “Kwoogu bûtigaakuthûke mîgongo înu, n'ûntû Mwathani Ngai wenu arî amwe naabi na i Ngai ûmûnene na wa kûmakania. 22 Mwathani Ngai wenu akeengatia mîgongo înu mbere yenu wa bûra bûkûthûngîra nthîgûrû înu mpoora, mpoora. Atimîîngatia rîmwe bea, nyamû cia kîthaka ciîya kwingîa i bûnyamaaria. 23 Mwathani Ngai wenu akaaneenkanîra anthû beenu njaraani cienu, abeekîre kîrigicano mwanka bathire. 24 Akaanenkanîra anene baao njaraani cienu. Bûkabaûraga bonthe bariganîrie cwe. Gûtirî we akaûmba kûbûrigîîria mwanka rîra bûkaabathiria bonthe.
25 “Nwa mwanka bûbîîthie mîbuanaano ya ngai ciao cia ûrongo. Bûtikeerirîrie thaabu kana fetha îra îtûmîrîtwe kûrûtha ngai inu bûthûkia cio. Bûkaaya kûgwa mûtegooni ûyu bûkaathûûria Mwathani mûno n'ûntû nameneete mûtugo wa kûromba ngai cia ûrongo. 26 Bûtikaire ngai inu cia ûrongo mîciî yenu, n'ûntû bwarûtha ûgu mîciî yenu îkaathirua kûrû wa ta cio. Nwa mwanka bûmene na bûthûûre ngai inu cia ûrongo irî mûgiro n'ûntû i cia kûthirua.”