Yathana rîra rînene kîrî monthe
6
1 Musa aathi na mbere kwîra antû ba Isiraeri, “Mama i mo maathana, moorutani na mawatho mara Mwathani Ngai wenu ambîîrire mbûrutane, kaingo bûmaathîkagîra bûrî nthîgûrû îra bûthiîte kûthûûngîra na kwîgwatîra. 2 Biû, aana beenu na aana ba aana beenu, ibûbatîîrue bûtîîya Mwathani Ngai wenu bwathîkîra maathana maake monthe mara nkûbûnenkera, ûtûûro bwenu bunthe, kaingo ntugû cienu cia gûtûûra nthî înu ciongeereka. 3 Tathikîîriani, biû antû ba Isiraeri, ibûbatîîrue bwathîkîra maathana ma Mwathani na wîru kaingo mantû meenu makaathi bwega na bwîgue bûrî na aana baingî, nthîgûrû îra yûûyûrîîte îria na ûkî, wa ta bûra Mwathani Ngai wa biûyûûyû bienu aabwîrire.4 “Tathikîîriani biû antû ba Isiraeri, Mwathani Ngai wetû n'we Ngai wenka. 5 Enda Mwathani Ngai waku na nkoro yaku yonthe, na mwoyo waku unthe na inya yaku yonthe. 6 Na maathana mama ngûkûnenkera îmunthî matikaume nkorooni yaku. 7 Ûrutane aana baaku mo na wîru. Ûkare ûkîmacookagîîria ûrî mûciî waku na rîra ûrî rûgendooni, rîra ûkîmaama na rûkîîrî waûkîîra. 8 Ûmoogeere njaraani yaku, kaingo ûmaririkanaga, na ûmoogeere ûthiû bwaku. 9 Bûmaandîke mbureemuuni cia mîrango yenu na mîîrîgaani ya mîciî yenu.
10 “Mwathani Ngai wenu n'athiîte kûbûthûngîria nthîgûrû îra athiîtiirie kûnenkera biûyûûyû bienu, Îburaîmu, Isaka na Njakubu. I nthîgûrû îrî na taûni inene imbega ira bûtaaka, 11 na nyomba ira irî ku ciûyûri into bionthe bira biega bira bûtaacwa. Bûgaataaga rûûyî ithimaani bira bûteenja na bûgaaketha kuuma mîndaani ya mîcabiibû na ya mîceituuni îra bûtaanda. Wona bwarîa bwabaa, 12 bûmenyeere bûtikaariganîrue i Mwathani ûra aabûrutire nthîgûrû ya Miisiri kûra bwarî nkombo. 13 Ûbatîîrue ûtîîya Mwathani Ngai waku na ûmûrutagîra ngûgî, na ûthiîtagie na riîtwa rîake rîonka. 14 Bûtikaagonge ngai ciingî cia mîgongo îra îbûthiûrûkîrîîtie. 15 Wona bwagonga ngai ciingî, mûthûûro wa Mwathani Ngai wenu ûkabûthiria cwe, n'ûntû Mwathani ûra atûûraga gatîgatî keenu, i Ngai arî rûriitho.
16 “Bûtikaagerie Mwathani Ngai wenu ta bûra bwarûthire Masa. 17 Nwa mwanka bwathîkîre maathana ma Mwathani Ngai na wîru, na moorutani maake monthe na mawatho mara abûneenkerete. 18 Îrûtha mantû monthe mara maagîru na meega mbere ya Mwathani na mantû maaku makeegua marî meega. Rîru ûkaathûngîra na wîgwatîre nthîgûrû îra mbega îra Mwathani athiîtiirie kûnenkera biûyûûyû biaku. 19 Ûkaûmba kwîngatia anthû baaku bonthe kuuma nthîgûrû înu, wa ta bûra Mwathani augire ûkaarûtha. 20 Na rîra aana beenu, îgiitaani rîra rîkaaya bakabûûria, ‘I mbi yaatûmire Mwathani Ngai wetû abwîra bwathîkîre maathana, moorutani mawatho mama monthe?’ 21 bûkabacookeria bûbeere, ‘Twarî nkombo cia mûnene Faraû nthîgûrû ya Miisiri, îndî Mwathani atûruta Miisiri na inya yake înene. 22 Mwathani n'aringire biama na iriga biinene na arûthîra antû ba Miisiri, na mûnene wao amwe na atongoria baao mantû maanene maathûûku ma kûbamakia. 23 N'atûrutire kuuma Miisiri atûreeta nthîgûrû îno, wa ta bûra eerire biûyûûyû bietû akaarûtha. 24 Mwathani atwîrire twathîkîre mawatho mama monthe na tûmûtîîye kaingo atûtûûria mwoyo, wa ta bûra arûthîîte mwanka îmunthî. 25 Wona twathîkîra mantû monthe mara Mwathani atwîrîîte na wîru agaakena i tiigû.’ ”