Maathana îkûmi
5
1 10 Musa eethîrania antû bonthe ba Isiraeri abeera, “Antû ba Isiraeri, thikîîriani mawatho na moorutani mara nkûbûnenkera îmunthî, bûmagwate na bûmaathîkîre na wîru! 2 Rîra twarî kîrîmaani kîa Orebu, Mwathani Ngai wetû n'arûthire kîrîîkanîro naati. 3 Mwathani ataarûtha kîrîîkanîro gîkî îgiita rîîtaaya rîa biûyûûyû bietû, îndî aarûthire kîo naati twinthe tiû tûrî mwoyo îmunthî. 4 Mwathani aariirie naabi wengwa kuuma gatîgatî ka mwanki kîrîmaani. 5 Îgiita rîru ndaarûûngi gatîgatî keenu na Mwathani kaingo mbwîra bûra augaga, n'ûntû i bwakuthûkire mwanki bwarega gûtwa kîrîma.” Mwathani auga,6 “ ‘I niû Mwathani Ngai waku, ûra aakûrutire nthîgûrû ya Miisiri, naara warî nkombo.’
7 ‘Ûtikeegue ûrî na ngai ûngî tatiga Niû.’
8 ‘Ûtikaarûthe mûbuanaano wa gûcaa wa gîntû n'wa kîrîkû kîra kîrî îgûrû, kana kîrî nthîgûrû, kana kîrî rûûyîîni. 9 Ûtigaaturîrie maru mûbuanano nwa ûrîkû ûcugoonga kana ûcutûmîkîra, n'ûntû n'yû Mwathani Ngai wenu, ndî Ngai wa rûriitho.a Nkaagwatagwatithia aana îkaanûkia n'ûntû bwa wîyia bwa beethe mwanka rûciaro rwa ithatû na rwa inya rwa bara banthwîre. 10 Îndî imbonanagia wendo kîrî nciarwa ngiri na ngiri cia bara bambeendeete na baathîkagîra mawatho maakwa.’
11 ‘Ûtikaawete riîtwa rîa Mwathani Ngai waku na mathee, n'ûntû Mwathani agaakaanûkia ûra agwetaga riîtwa rîake na mathee.’
12 ‘Menyeera ntugû ya Sabatû na ûmîathûre îrî ntheru, wa ta bûra niû Mwathani Ngai waku nkwathîîte. 13 Rutaga ngûgî ciaku cionthe ntugû ithanthatû. 14 Îndî ntugû ya mûgwanja i Sabatû îra mbathûrîrîîtwe, niû Mwathani Ngai waku. Ntugû înu gûtikaagîte muntû akaaruta ngûgî, eegue arî woû kana mwana waku wa muntû mûrûme kana wa mwarî, kana nkombo yaku ya muntû mûrûme kana ya mûka, kana ncamba yaku, kana îng'ooi rîaku, kana ng'ombe yaku, kana nyamû inu ingî ciaku cia ndîîthia kana mûgeni ûra atwîre gatîgatîîni keenu, kaingo aruti ngûgî baaku banogoka na woû ûkînogoka. 15 Ririkanaga wana woû warî nkombo Miisiri na Mwathani Ngai waku akûruta noogo na inya na kûûmbana kûûnene. Na i kîo gîtûmi Mwathani Ngai waku agûkwatha ûmenyagîîre Sabatû.’
16 ‘Tîîyaga abaagu na nyûkwe, wa ta bûra Mwathani Ngai waku akwathîîte, kaingo ûtûûra îgiita rîîraaya, na wîgua ûrî na ûtûûro bwega nthîgûrû îno Mwathani Ngai waku agûkwa.’
17 ‘Ûtikaûragane.’
18 ‘Ûtikaathûngîîre.’
19 ‘Ûtikaiye.’
20 ‘Ûtikaarute ûkûûyî bwa ûrongo îgûrû ya muntû ûra ûngî.’
21 ‘Ûtikeerirîrie mwekûrû wa muntû ûra ûngî. Ûtikeerirîrie nyomba, mûnda, nkombo ya muntû mûrûme kana ya muntû mûka, ndegwa, îng'ooi, kana gîntû n'wa kîrîkû kîa muntû ûra ûngî.’ ”
22 “Mama i mo maathana mara Mwathani aabûnenkeere bwinthe rîra bwethîranîîte kîrîmaani, rîra aaragia na mûgambo ûmûnene ûkiumaga gatîgatî ka mwanki na matu na mwindu ûmûnene. Ûgu i bu augire îgiita rîru na atongeera nwa mbi. Na aandîka maathana mamu mbaariûni ciîrî cia maiga aaneenkera. 23 Na rîra bwegiirue mûgambo ûyu waumaga mwinduuni na kîrîma gîkîûmbûkaga mwanki, atongoria beenu bonthe ba mîîrîga yenu na akûrû i baayire kîrî niû, 24 baambîîra, ‘Mwathani Ngai wetû agûtwonia mwago na ûnene bwake, na tûkwîgua mûgambo wake kuuma gatîgatîîni ka mwanki. Îmunthi tûkwona nwa kûûmbîke muntû akathi na mbere gûtûûra mwoyo, wana Ngai aarîîtie n'we. 25 Îndî îîndî, i mbi îgaatûma tûthi na mbere kwîbîkîra ûgwatiini bwa gûkua? Mwanki ûyû mûnene ûûgû ûgatûthiria, na wona twegua mûgambo wa Mwathani Ngai wetû kaîrî tûgaakua. 26 Kûrî muntû aaro athi mbere na gûtûûra mwoyo nyuma ya kwîgua Ngai ûra atûûraga mwoyo akîaria kuuma gatîgatî ka mwanki ta bûra twegua? 27 Woû Musa, îthi akubî wîgue bûra Mwathani Ngai wetû akauga. Rîru naawe ûûye ûtwîre mara monthe agaakwîra na tûkaathikîîria na tûmaathîkîre.’
28 “Rîra Mwathani eegiirue bûra bwambîîraga, ambîîra, ‘Nkwîgua bûra antû bagûkwîraga, bakwaria bwega na i bu kûbatîîrue. 29 Ûtakîîgua i bu bagaatûûra bagîîciiragia wa ûgu, bagaatûûra bantîîyîte na bakîathîkagîra maathana maakwa! Bakarûtha ûgu, mantû maao na ma aana baao meegua marî meega tene na tene. 30 Îthi ûbeere bacooke maremaani maao. 31 Îndî woû îkara aaga naani kaingo nkûnenkera maathana, watho na mawatho maakwa monthe. Ûthi ûrutane antû mo na kaingo bamaathîkagîra barî nthîgûrû îra nkûbanenkera rûrî rûgai rwao.’