Musa eera antû ba Isiraeri nwa mwanka baathîkîre Ngai
4
1 Musa eera antû ba Isiraeri, “Thikîîriani moorutani na mawatho mama ndî akubî kûbûrutana na bûmaathîkîre kaingo bûgaatûûra mwoyo na bûthûngîra na bûthûkia nthîgûrû îno Mwathani Ngai wa biûyûûyû bienu akûbûnenkera. 2 Bûtikongeere kana bûgaûra nwa mbi kuuma kîrî mawatho mama nkûbûnenkera. Îndî bwathîkîre mawatho ma Mwathani Ngai wenu mara nkûbûnenkera. 3 I bweboneere bûra Mwathani aarûthire Mbaari-Peori rîra aathiriirie antû bonthe bara baagongire ngai îra yeetagwa ‘Mbaari-Peori.’ 4 Îndî biû bara bwakarire bûrî eetîgua kîrî Mwathani Ngai wenu bwinthe bûrî mwoyo kinya îmunthî. 5 Raithaani, i mbûrutanîîte mawatho na moorutani monthe, wa ta bûra Mwathani Ngai wakwa ambîîrire ndûthe, kaingo bûmaathîkîra bûrî nthîgûrû îra bûthiîte kwithûkîra na bûthûkia îtuîka yenu. 6 Maathîkîreeni na wîru na antû ba mîgongo înu îîngî bakaamenya biû bûrî antû baûgî. Rîra bakeegua mawatho mama bakaarigaraga bakaûria, ‘Ka mûgongo ûyû ûrî na ûûgî na ûmenyo bûgana ata îî?’7 “Gûtirî mûgongo ûngî ûmûnene wîgagua ûrî na ngai arî akubî nau ta bûra Mwathani Ngai wetû eegagua arî akubî naati gûtûteethia rîonthe rîra tûmûrombaga ûteethio. 8 Na mma gûtirî mûgongo ûngî ûrî na mawatho maagîru ta mama nkûbûnenkera îmunthî. 9 Menyeeraani mûno na bwîcûûbîre kaingo bûtariganîrua i mantû mara Ngai aarûthire bûkîonaga na meetho meenu. Bwîre aana na aana ba aana beenu mantû mamu. 10 Bûririkane ntugû îra bwarûûngi mbere ya Mwathani, kîrîmaani kîa Orebu rîra Mwathani aambîîrire, ‘Mbîthîranîria antû. Inkwenda beegua bûra nkuuga kaingo beerutana gûûntîîya ûtûûrooni bwao bunthe nthîgûrû înu, na bakaarutana aana baao gûntîîya.’ 11 Bwayire aakubî, bwarûûngama nkona ya kîrîma, kîrîma gîkîûmbûkaga mwanki. Ndîrîmbî cia mwanki cietagia mwanka îgûrû matuuni, na kîrîma kîonthe gîkunîkîîtwe i karongorongo ga ntoogo na mwindu. 12 Rîru Mwathani abwarîria kuuma mwankiini; I bwegiirue biugo bira augire îndî bûtaamwona. 13 Rîru Mwathani abûmenyithia kîrîîkanîro gîake, maathana mara îkûmi aandîkire mbaariûni ciîrî cia maiga na abwatha bûmaathîkagîre. 14 Îgiitaani rîru Mwathani n'ambîîrire mbûrutane watho na mawatho mara bûbatîîrue kûthingata bwakinya nthîgûrû îra bûthiîte kûthûkia bwariinga muuro wa Njorondani.
15 “Rîra Mwathani aabwaragîria kuuma mwankiini kîrîmaani kîa Orebu bûtoona ûthiû bwake. Kwoogu menyeeraani 16 bûtikaathi kwîrûthîra mîbuanaano ya gûcaa ya mûûmbîre wa mûthemba n'wa ûrîkû, ûkari ta wa muntû mûrûme kana wa mûka, 17 kana ûkari ta nyamû ira ikaraga nthîgûrû kana kînyoni kîra kîbuurûkagîîra ruuoni, 18 kana ûkari ta nyamû ira ciîkururagia na nthî kana ta makûyû mara makaraga rûûyîîni. 19 Na bwaraitha îgûrû bwona riûa, mweri, na nthata na mainya mara mangî ma îgûrû, mantû mama matikaabweneerie bûmaturîria maru na kûmagoonga. Mwathani Ngai aneenkanîrîîte mainya mamu kîrî antû bonthe ba nthîgûrû. 20 Îndî biû Mwathani i ka aabwonokiirie kuuma Miisiri kûra gwakanaga ta kîrûngûyû kîa mwanki, kaingo bûtuîka antû baake na rûgai rwake rwa mwanya, wa ta bûra gûkari îmunthî tûrî. 21 Îndî Mwathani n'athûûrire i niû n'ûntû bwenu, na aathiîtia auga niû ntiiriinga Njorondani nthûngîra nthîgûrû îmbega îra Mwathani akûbûnenkera îtuîka rûgai rwenu. 22 Kwoogu niû ngaakuîra nthîgûrû îno. Ntiiriinga Njorondani. Îndî biû bûrî akubî kûringanîria bûthi bûthûkia nthîgûrû înu mbega. 23 Menyeeraani bûtikaaye kûriganîrua i kîrîîkanîro kîra Mwathani Ngai wenu aarûthire naabi, bûrûtha mîbuanaano ya mûûmbîre n'wa ûrîkû ûra Mwathani Ngai wenu abûkaanîîtie. 24 N'ûntû Mwathani Ngai wenu i mwanki ûra ûbîîthagia na i Ngai arî rûriitho.
25 “Wana bwakara îgiita rîîraaya nthîgûrû înu na bwagîa na aana ba aana, bûtikeeyie bwîrûthîra ngai cia mîbuanaano cia mûthemba n'wa ûrîkû kana bûrûtha ûntû bûûthûûku bûûya kûthûûria Mwathani Ngai wenu. 26 Bwarega kwathîka, i ngwîta îgûrû na nthîgûrû îmunthî barî aankûûyî atî bûtiikaranga bûtarî bathirie buumanga nthîgûrû îra bûriingîîte Njorondani bûthi gûtûûra. Bûtiikaranga ku, bûgaaciatwa cwe. 27 Mwathani akabûnyagaaria bûgatûûre mîgongooni na i baakai mûno bacienu bagaatigara naagu, Mwathani akeegua abwîngîîrîîtie bûthi. 28 Naagu nthîgûrû i ngeni bûkaagoongaga ngai cia mîtî na cia maiga, ira irûthîîtwe na njara cia antû, ira itoonaga kana ciîgua kana irîa kana ciîgua mûruke. 29 Na bûrî naagu bûgaaceria Mwathani Ngai wenu. Na wegua bûkamûceria na nkoro cienu cionthe na mîoyo yenu yonthe, bûkamwona. 30 Rîra ûkeegua bûrî kînyamaaraani îgiita rîru rîîyîîte, mûthiani cwe bûgaacookera Mwathani Ngai wenu na bûthikîîrie bûra akûbwîra. 31 N'ûntû Mwathani Ngai wenu i Ngai wa kîao, atibûtiganîria, kana abûthiria, kana ariganîrua i kîrîîkanîro kîra athiîtiirie kûthingatîîra kîrî biûyûûyû bienu.
Mwathani wenka n'we Ngai
32 “Ta ûrithîriani mantû ma kinya karaaya, mbere bûciarwa, kuuma rîra Ngai aûmbire muntû nthîgûrû mwanka îîndî. Bûûrithîrie kuuma mûthia ûmwe wa nthîgûrû kûthi ûra ûngî, wegua ûntû ta bûbû bûrakarîka kana bwîguîka kaîrî. 33 Kûrî mûgongo ûngî waro wîgua mûgambo wa Ngai uumîîte gatîgatî ka mwanki ta bûra bwegiirue na mûgongo ûyu wathi na mbere na gûtûûra? 34 Kûrî ngai ûngî aaro eethûkîria mûgongo ûmwe acutuunyûkia kuuma kîrî mûgongo ûngî ta bûra Ngai wenu aabûrutire Miisiri, agîtûmagîra magerio, biama, magegania, ndûa, inya ya kûmakania na ngûgî ikûguayia? Anga ûgu tibu Mwathani Ngai wenu aabûrûthîîre rîra bwarî Miisiri bûkîonaga na meetho? 35 Aabwoniirie mantû mama kaingo bwîtîgia Mwathani n'we Ngai na gûtirî ngai ûngî tatiga we. 36 N'atûmire bwegua mûgambo wake kuuma îgûrû kaingo abûcookanîîria, na aaga nthîgûrû aatûma bwona mwanki wake ûmûnene, na abwarîria kuuma gatîgatî kaau. 37 N'ûntû n'endire biûyûûyû bienu, na aathuura nciarwa ciao na we mwene abaruta Miisiri akîonanagia inya yake înene. 38 N'engatiirie mîgongo yarî îmînene nkûrûki ya biû, kaingo abwira na abûnenkera nthîgûrû yao îrî rûgai rwa mwanya kîrî biû, wa ta bûra gûkari îmunthî. 39 Kwoogu ririkanaani ûgu îmunthî na ûntû bûbu bûtikaume nkoro, atî Mwathani n'we Ngai îgûrû, kûûra îgûrû na aaga nthîgûrû na gûtirî ngai ûngî! 40 Wona bwathîkîra maathana na watho bûra ngûkûnenkera îmunthî, bûkeegua bûrî mayîîga biû na aana beenu. Na bûgaatûûra îgiita rîîraaya nthîgûrû îra Mwathani Ngai wenu akûbûnenkera îtuîka yenu tene na tene.”
Taûni cia kwîbitha
41 Rîru Musa aathuura taûni ithatû rûteere rwa uumîîro bwa riûa rwa Njorondani ituîka taûni cia kûthiiyaga kwîbitha, 42 naara muntû ûra aûragîîte muntû batiraarî ûthû n'we atakwenda, aûmba kûthi kwîbitha giria akaûragwa. 43 Taûni inu nacio i; Beseri îra îrî rwanda rwa rûgûrî, îrî ya mwîrîga wa Rubeni; Ramothi îra îrî Ngiriandi îrî ya mwîrîga wa Ngandi na Ngorani îra îrî Mbasani îrî ya mwîrîga wa Manase.
44 Bûbû i bu watho bûra Musa aneenkeere antû ba Isiraeri. 45 Mama i mo mawatho na moorutani mara Musa aneenkeere antû ba Isiraeri rîra baumire Miisiri, 46 rîra baarî rûteere rwa uumîîro bwa riûa rwa muuro wa Njorondani, kîbondeeni kîra kîraitheene na Bethi-Peori, nthîgûrû ya Sioni mûnene wa Amori, ûra aathanaga arî Esiboni. We na antû baake bonthe baarî bakûthirua ni Musa na antû ba Isiraeri rîra baumîîte Miisiri. 47 I baagwatire nthîgûrû yake na ya Ogu mûnene wa Mbasani. Baba barî baîrî baarî anene ba antû ba Amori bara baatûûraga rûteere rwa uumîîro bwa riûa bwa Njorondani. 48 Kwoogu antû ba Isiraeri i baatuunyanire nthîgûrû yonthe îra îrî kuuma Aroeri katheng'eng'aani ga kîbonde kîa Arinoni kûthi mwanka kîrîma gîa Sioni kîra kaîrî gîetagwa kîrîma kîa Erimoni, 49 amwe na nthîgûrû yonthe ya Araba mbarî ya uumîîro bwa riûa ya Njorondani, kûthi mwanka Îria rîa Araba,a mîtûndûrûkooni ya kîrîma gîa Pisiga.