Isiraeri yacinda Ogu mûnene wa Mbasani
3
1 Musa aathi na mbere kûbeera, “Kuuma agu twaûndûka twagwata barabara ya kûthi Mbasani, na mûnene Ogu wa Mbasani na njûûrî yake yonthe ya ndûa aumagarûka arîîkana naati Endirei arûa nati. 2 Îndî Mwathani ambîîra, ‘Ûtikaamakue n'we, n'ûntû i mûnenkanîrîîte kîrî woû, amwe na njûûrî yake yonthe, na nthîgûrû yake. Mûrûthe wa ta bûra warûthire Sioni mûnene wa Amori ûra aathanaga Esiboni.’ 3 Kwoogu Mwathani Ngai wetû aneenkanîra Ogu mûnene wa Mbasani na antû baake bonthe njaraani cietû, twabaûraga bonthe na gûtirî matigari maatigwa ku. 4 Îgiitaani rîru i twagwatire taûni ciake mîrongo îthanthatû, na ûgu i ta kuuga nthîgûrû yonthe ya Arigobu îra mûnene ûyu aathaga. Gûtirî taûni nwa îmwe yake tûtaagwata. 5 Taûni inu ciarî imbirigîre na nthingo indaaya mûno na mîîrîga yacio yaingwa na mîrîîgo îmîkamu. Amwe na taûni inu, itwathûkiirie ntûûra inyiingî ira itaarî imbirigîre. 6 Itwaciînyaangiirie cionthe kûrû, wa ta bûra twarûthîîre Sioni mûnene wa Esiboni. Twenyaangagia taûni yonthe, tûkaûraga antû arûme, aka na twana. 7 Îndî itwathûkiirie nyamû cia ndîîthia na into bingî bira biarî na baita biatuîka bietû. 8 Kwoogu îgiitaani rîru itwathûkiirie nthîgûrû îra yarûgamîîrîtwe n'anene baîrî ba Amori mbarî ya uumîîro bwa riûa bwa muuro wa Njorondani, kuuma kîbondeeni kîa Arinoni mwanka kîrîma kîa Erimoni. 9 (Antû ba Sindoni beetaga kîrîma gîa Erimoni kîrîma gîa Sirioni, nabo antû ba Amori bagagîîta kîrîma gîa Seniri). 10 I twagwatire taûni cionthe ira ciarî gûntû kûra kwaranîru, na Ngiriandi yonthe, na Mbasani yonthe, kûthi mwanka Sareka na Endirei; na ino i taûni ira ciathagwa i mûnene Ogu wa Mbasani. 11 Mûnene Ogu wa Mbasani n'we aarî wa mûthia wa matigari ma Refaimu. (Ûrîrî bwake bwarî bwa cuuma na bwarî bwa ûraaya bwa nkûrûki ya biiti îkûmi na ithatû na wariî bwa biiti ithanthatû, kûringana na ithimi bia kagiita gaku. Wana îîndî i kîonagwa taûniini ya Raba ya Amoni.)Mîîrîga îra yagaîrîîrwe mbarî ya uumîîro bwa riûa bwa muuro wa Njorondani
12 “Rîra twathûkiirie nthîgûrû înu yatuîka yetû, ndaagaîrîîre antû ba mwîrîga wa Rubeni na ba mwîrîga wa Ngandi nthîgûrû îra ya kuuma Aroeri ûthiîte rûteere rwa neegûrû, kuuma katheng'eng'aani ga kîbonde kîa Arinoni, na nucu ya nthîgûrû ya irîma ya Ngiriandi, amwe na taûni ciayo cionthe. 13 Nthîgûrû înu îîngî yatigeere ya Ngiriandi amwe na Mbasani yonthe, îra yathagwa ni Ogu, n'yo i nthîgûrû yonthe ya Arigobu, ndamîneenkanîra kîrî nucu ya mwîrîga wa Manase. (Mbasani yaiyîkeene kaîrî ta nthîgûrû ya Arefaimu.) 14 Njairi, ûmwe wa antû ba Manase, naagwatire nthîgûrû yonthe ya Arigobu ya Mbasani kûthi mwanka mîankaani ya antû ba Ngesuri na Maakathi. Njairi n'aagarûrire riîtwa rîa gûntû gûku gwatua gwîtagwa riîtwa rîake. Ciîtagwa ntûûra cia Njairi mwanka îmunthî. 15 Ndaaneenkeere Makiri Ngiriandi. 16 N'yo mîîrîga ya Rubeni na Ngandi ndamînenkera nthîgûrû ya Ngiriandi îra îthiîte kuuma gatîgatî ga kîbonde kîa Arinoni, kûthi mwanka muuro wa Njaboku ûra warî mwanka wa Amoni. 17 Mwanka wa mbarî ya ûthwîro bwa riûa warî muuro wa Njorondani, uumîîte îria rîa Kinerethi mbarî ya n'egûrû, kûthi Îria rîtarî Mwoyo rîra riiyîkeene ta Îria rîa Cuumbî mbarî ya iti, na kûthi mîtûndûrûkooni ya kîrîma gîa Pisiga mbarî ya uumîîro bwa riûa.
18 “Îgiita rîru ndabwîra, ‘Mwathani Ngai wenu Nabûnenkerete nthîgûrû îno îtuîke yenu. Antû beenu ba ndûa i beeboge mathaga ma ndûa bariinge Njorondani barî mbere ya antû bara bangî ba Isiraeri. 19 Îndî aka beenu, na aana na nyamû cienu cia ndîîthia, (ira mbiyî bûrî nacio inyiingî, inu igaatigwa taûni ira ndabûnenkera.) 20 Bûteetheerie aruanyûkwe kûgwata nthîgûrû îra Mwathani akûbanenkera rûgongo rûra rûûngî rwa Njorondani, mwanka rîra Mwathani akaareka batûûra nthîgûrû înu na ûkiri, wa ta biû, rîru nwabûcooke woora muntû kîrî rûgai rûra ndabûnenkera.’ ”
Musa aakaanua kûriinga Njorondani
21 Musa aathi na mbere kuuga, “Kagiita gaku ndaatha Njosua ndamwîra, ‘N'woneete na meetho maaku bûra Mwathani Ngai waku arûthîîte anene bara baîrî, Sioni na Ogu. Woogu nwabu Mwathani akaarûtha moonene monthe mara marî naagu ûriingîîte ûthiîte rûgongo rûra. 22 Ûtikaamakuthûke, n'ûntû i Mwathani Ngai waku akûrûagîîra.’ 23 Îgiitaani rîru i ndaakayîîre Mwathani nkiugaga, 24 ‘Mwathani Mwene Inya, nwaka wanjîîria kwonia mûruti ngûgî waku ûnene na inya yaku. Gûtirî Ngai ûngî îgûrû kana nthîgûrû aûmba kûrûtha mantû maanene mara ûrûthîîte! 25 Mwathani mbîtîgîîria ndinge Njorondani, nthi nkoone nthîgûrû înoru îra îrî rûgongo rûûra, nthîgûrû înthongi ya irîma na irîma bia Rebanoni.’ 26 Îndî Mwathani n'athûûri i n'yû n'ûntû bwenu na kwoogu atanthikîîria. Nwaka ambîîrire, ‘Ka iganîre agu, na ûtikambîîre ntheto inu kaîrî. 27 Îtwa kîrîmaani gîa Pisiga ûraithîîrie nthîgûrû înu rûteere rwa iti, n'egûrû, umîîro bwa riûa na rwa ûthwîro bwa riûa. Wîbonere na meetho maaku n'ûntû woû ûtiiriinga Njorondani. 28 Îndî waathe Njosua ûmûmîîrie n'ûntû n'we agaatongoreeria antû ba Isiraeri bakîriinga Njorondani na kûthûkia nthîgûrû înu ûkoona.’ 29 Kwoogu twakara kîbondeeni gîku kîraitheene na Bethi-Peori.”