Mîîrîga ya uumîîro bwa riûa bwa rûgoongo rwa Njorondani
(Kûri 3:12-22)
32
1 Mîîrîga ya Rubeni na Ngandi ibaarî na nyamû cia ndîîthia inyingî mûno. Rîra boonire nthîgûrû ya Njaseri na ya Ngiriandi irî mbega cia ûrîîthi, 2 baathiire kîrî Musa, Eriasari na atongoria bara bangî ba antû babeera, 3 “Atarothi, Ndiboni, Njaseri, Nimura, Esiboni, Eriare, Sebamu, Nebo na Mbeoni 4 taûni ira Mwathani ateethiirie antû ba Isiraeri gûcinda, imbega mûno cia ûrîîthi, na tiû antû beenu tûrî na nyamû inyiingî cia ndîîthia. 5 I tûkûbûromba bûtûnenkere nthîgûrû îno îtuîke ûtonga bwetû. Bûtigaatûme tûringa rûgoongo rûra rûngî rwa Njorondani.”6 Musa eera antû ba Ngandi na ba Rubeni, “Biû bûrîenda gûkara aaga antû beenu bakîthi ndûani? 7 I mbi îgûtûma bwenda kûûraga antû bara bangî ba Isiraeri nkoro batariingîîte Njorondani bathi nthîgûrû îra Mwathani abaneenkerete? 8 Ûgu i bu baabaagu baarûthire nkûbatûma kuuma Kandesi-Barinea bathi kûthigaana nthîgûrû înu. 9 Baathiire mwanka kîbondeeni kîa Kîgaro na boona nthîgûrû îndî rîra baacookire i ka baûragire antû ba Isiraeri nkoro batikaaye kûthûngîra nthîgûrû îra Mwathani aabaneenkerete. 10 Mwathani n'aathûûrire ntugû înu na aathiîtia akiugaga, 11 ‘Nkûthiîtia ûgu, n'ûntû batiratuîka eetîgua kîrî niû, gûtirî muntû mûrûme nwa ûmwe wa ûkûrû bwa mîanka mîrongo îîrî gwîtia aumire Miisiri akaathûngîra nthîgûrû îra ndeeranîîre kîrî Îburaîmu, Isaka na Njakubu. 12 Îî gûtirî nwa ûmwe tatiga Karebu mwana wa Njebune ûra Mûkenisi na Njosua mwana wa Nuni n'ûntû ibaarî eetîgua kîrî Mwathani. 13 Mwathani n'athûûrire n'antû ba Isiraeri na atûma bakara bakîriûngaga rwanda kagiita ka mîanka mîrongo îna mwanka rîra nthuke îra yamûthûûrîîtie yakuire yathira.’
14 “Na îîndî i bûgûtuatia baabaagu, bwatuîka nthuke ya antû ba meeyia bara bakwenda gûtûma mûthûûro wa Mwathani wîndamîîra Isiraeri kaîrî. 15 Ûkeegua biû antû ba Rubeni na Ngandi bûkaarega kûmûthingata îîndî, agaatiganîria antû baba naaga rwanda, na i biû bûkeegua bûtûmîîte kînyamaara kîbaayîîra.”
16 Baathi kîrî Musa bamwîra, “Mbere ma twîtîgîîrie twirigîre nyamû cietû cia ndîîthia na twakîre taûni cietû na nthingo ira tûgaatiga aka na aana beetû. 17 Rîru tûkeegua twîthuuranîrîte kûthi na antû baba bangî ba Isiraeri tûthi ndûani nabo mwanka rîra bakeegwatîra nthîgûrû na barîîkîîrie. Naati ûkeegua tûkîmenyaga aka, aana na nyamû cietû itirî ûgwatiini kuumania na antû ba gûkû n'ûntû ûkeegua barî gûntû kwirige gwaita. 18 Tutiicooka mîciî yetû mwanka rîra antû bara bangî ba Isiraeri bakeegwatîra nthîgûrû îra baaneenkeerwe. 19 Na tiû gûtirî nthî tûkwenda rûgongo rûra rûûngî rwa Njorondani, n'ûntû gîcuncî gîetû kîrî rûgoongo rûrû.” 20 Rîru Musa auga, “Wegua bûkaarûtha woogu bûkuuga, bûthûkie into bienu bia ndûa mbere ya Mwathani bûthi ndûani, 21 na wegua bûkaathûkia into bienu bia ndûa bûringe muuro wa Njorondani mbere ya Mwathani mwanka rîra akeengatia anthû baake, 22 rîru rîra nthîgûrû îkeegua îrî njaraani cia antû ba Isiraeri Mwathani akeegua abweete rûûtha. Na akabwîtîgîîria nthîgûrû îno îrî rûgoongo rûrû rwa Njorondani îtuîke yenu.”
23 “Îndî tatigaani mbûkaanie, bûmenye, bûkarega kwaiga wîrane bwenu bûkeegua bûkîbîtîria Mwathani. Bûtikaarûthe mabîtia ta mamu, n'ûntû bûgaakanûkua n'ûntû bwa wîyia bwenu. 24 Kwoogu biû akaani taûni cienu na bwirigîre nyamû cienu, îndî naabi nwa mwanka bûûyûrie wîrane bwenu.”
25 Antû arûme babu ba Ngandi na Rubeni beera Musa, “Tiû mûnene tûkaarûtha wa ûgu wathana. 26 Eekûrû beetû, twana twetû na nyamû cietû cia ndîîthia bigaatigwa aaga taûniini cia Ngiriandi. 27 Îndî tiû twinthe itwîthuuranîrîte kûthi ndûani wa ta bûra Mwathani agûtwatha. Tûkaaringa Njorondani tûkarûe wata ûgu wauga.”
28 Kwoogu Musa aanenkera Eriasari, Njosua mwana wa Nuni na atongoria bara bangî ba Isiraeri mawatho mama: 29 “Wegua antû arûme baba Ngandi na Rubeni bakaaringa Njorondani beethuuranîrîte kûrûa wa ta bûra Mwathani akaathanaga, na wegua kuumania na ûteethio bwao bûkaûmba kûthûkia nthîgûrû înu, rîru nwa bûbaneenkere nthîgûrû ya Ngiriandi îgatuîka rûgai rwao. 30 Îndî bakaaya kûrega kûringa Njorondani bathi ndûani naabi, wanabo rûgai rwao rûrî rûteere rûra rûngî nthîgûrû ya Kanaani wa ta mîîrîga îra îngî.”
31 Antû arûme ba Ngandi na Rubeni baacookia, “Mûnene, tûkaarûtha wa ta bûra Mwathani aathana. 32 Atûtongorereetie, tûkaaringanîria mwanka nthîgûrû ya Kanaani na tûthi kûrûa kaingo rûgai rwa nthîgûrû îno îrî rûgoongo rûrû rwa Njorondani rwîgua rûrî rwetû.”
33 Kwoogu, Musa aaneenkera mîîrîga ya Ngandi na Rubeni na nucu ya mwîrîga wa Manase mwana wa Njosebu nthîgûrû ya mûnene Sioni wa Amori na ya mûnene Ogu wa Mbasani, amwe na taûni na tûthîgûrû tûngî tûra twarî mbarî înu.
34 Mwîrîga wa Ngandi gwaka kaîrî mîako ya taûni ino: Ndiboni, Atarothi, Aroeri, 35 Atirothi-Sofani, Njaseri, Njogibea 36 Bethi-Nimura na Bethi-Arani. 37 Mwîrîga wa Rubeni gwaka kaîrî mîako ya taûni ino: Esiboni, Eriare, Kiriathaimu 38 Nebo, Mbaari-Meoni na Sibuma. Beeta taûni inu baakire mariîtwa maayerû.
39 Mwîrîga wa Makiri mwana wa Manase waithûkîra nthîgûrû ya Ngiriandi baatûûra ku, na beengatia antû ba Amori bara baarî ku. 40 Kwoogu Musa aaneenkera antû ba Mwîrîga wa Makiri mwana wa Manase nthîgûrû ya Ngiriandi baatûûra ku. 41 Njairi wa mwîrîga wa Manase n'aithûkîîre na aathûkia ntûûra imwe aciîta, “Ntûûra cia Njairi.” 42 Noba aithûkîra na aathûkia Kenathi na ntûûra ciayo. Aagarûrîra riîtwa rîa Kenathi rîatuîka Noba, ta we.