Mûthûûro wa Mwathani kîrî Mindiani
31
1 Mwathani aaria na Musa amwîra ata rî, 2 “Kaanûkia antû ba Mindiani n'ûntû bwa gûtongoria antû ba Isiraeri kûromba ngai cia mîbuanaano. Gwarîîkia kûrûtha ûgu ûgaakua.”3 Kwoogu Musa eera antû, “Îîthuuranîreeni n'ûntû bwa kûrûa, bûkaithûkîre antû ba Mindiani bûbae îkaanûkia n'ûntû bwa bûra baarûthire Mwathani. 4 Woora mwîrîga wa Isiraeri ûtûme antû arûme ngiri ndûani.” 5 Kwoogu antû arûme ngiri baathuurwa kuuma wa kîra mwîrîga wa Isiraeri na antû babu bonthe baarî ngiri îkûmi na ciîrî bara beekunyîîte kûthi ndûani. 6 Musa abatûma baathi kûrûa barûûngamîrîtwe i Finiasi mwana wa Eriasari Mûthînjîri wa Ngai, ûra aareetire into biitheru na tûrumbeeta twa gwîkia mbu.
7 Baithûkîra antû ba Mindiani wa ta bûra Mwathani eerîîte Musa, baûraga antû arûme bonthe, 8 amwe na anene bataano ba Mindiani tabo: Ebi, Rekemu, Suri, Uri, na Reba. Na baûraga Mbaraamu mwana wa Mbeori. 9 Antû ba Isiraeri baataa aka ba Mindiani na aana, baathûkia ng'ombe na ng'ondu, babacuuma ûtonga bwao bunthe, 10 Na baabîîthia taûni na kambî ciao. 11 Baakamata into biao bira baataîte amwe na atae na nyamû cia ndîîthia. 12 Baathi nabio kîrî Musa na Eriasari Mûthînjîri wa Ngai na antû bonthe, ba Isiraeri bara baarî iboondeeni bia Moabu îkumbo rîa Njorondani rûgongo rûra rûngî rwa Njeriko.
13 Musa, Eriasari na atongoria ba antû baumagarûka baathi kûthagaana njûûrî. 14 Musa n'aathûûrire n'ûntû bwa arûngamîîri na atongoria ba njûûrî na ba ikundi bara baumîîte ndûani.
15 Abaûria, “I kî n'ûntû bûtigire aka bonthe barî mwoyo? 16 Ririkaani aka wa baba nwabo baabîtithirie antû ba Isiraeri, Peori, baathiingatîîte mataaro ma Mbaraamu. Na gîku i kîo gîatûmire Mwathani atûma mûthiro îgûrû rîa antû baake. 17 Kwoogu wa îîndî, ûragaani twana twa twîyî tunthe tûrî aga na mûka wonthe aaro amaama na muntû mûrûme. 18 Îndî îîtigarîrieni twana twa twarî tunthe na aka bonthe bara bataaromaama na muntû mûrûme.”
19 “Îîndî bara bonthe baûraganîîte kana baatongithîîtie ntungu babatîîrue bûkara ome ya kambî ntugû mûgwanja. Ntugû ya ithatû na ya mûgwanja bwîtherie biû na aka babu bûtaîte. 20 Na nwa mwanka bûtherie nguo cionthe kana gîntû kîonthe kîrûthîîtwe na rûûo, guaya ya mbûri kana mûtî.”
21 Eriasari mûthînjîri wa Ngai eera antû bara baumîîte ndûani, “Mama i mawatho mara Mwathani aneenkereete Musa. 22 Thaabu, fetha, yîûmba rîa gîkama, îthaga, na mîthemba îîngî ya cuuma, 23 na gîntû kîngî kîra gîtaûmba kwînyangua i mwanki, gîgaakûrûkîîrua mwankiini. Na kîra kîûmba kwînyangua i mwanki gîgaakûrûkîîrua rûûyîîni. 24 Ntugû ya mûgwanja, nwa mwanka bûbûûre nguo cienu na bûgaatuîka baatheru. Rîru nwa bûthûûngîre kambîîni.”
Kûgaa into bira biataîtwe
25 Mwathani aaria na Musa amwîra ata rî, 26 “Woû na Eriasari Mûthînjîri wa Ngai na atongoria babu bangî ba antû i biû bûgaatara into bira bitaîtwe amwe na agwate na nyamû. 27 Bûgaanie into bibu ikundî biîrî biganeene, gîkundi kîmwe kîîgue kîrî kîa acikaarî na gîku kîngî gîa antû babu bangî bonthe. 28 Kuuma gîcuncîîni kîa acikaarî bûgiite ûgooti n'ûntû bwa Mwathani. Ûgooti bûbu nabu bûkeegua bûgana ûûgû, mûgwate ûmwe kuuma kîrî agwate magana mataano, kinya n'wîgue i kuuma kîrî mbûri, ng'ombe, îng'ooi kana ng'ondu nwa woogu. 29 Ûneenkere Eriasari ûra Mûthînjîri into bibu birî maruta ma mwanya kîrî Mwathani. 30 Kuuma kîrî gîcuncî gîa antû bara bangî ba Isiraeri ûrute mûgwate ûmwe kuuma kîrî agwate mîrongo îtaano na nyamû îmwe kuuma kîrî nyamû mîrongo îtaano. Ûneenkere Arawi bara bamenyagîîra Îrema rîa Kûrîîkanaga into bibu.” 31 Musa na Eriasari Mûthînjîri wa Ngai baarûtha wa ta bûra Mwathani eerîîte Musa.
32 Into bira acikaarî baumire nabio ndûani biarî ng'ondu ngiri magana mathanthatû ma mîrongo mûgwanja na itaano, 33 ng'ombe ngiri mîrongo mûgwanja na ciîrî, 34 mang'ooi ngiri mîrongo îthanthatû na îmwe, 35 na aka ngiri mîrongo îthatû na ciîrî bara bataaromaama na muntû mûrûme.
36 Nucu ya rûgai îra yarî ya acikaarî yarî;
ng'ondu ngiri magana mathatû ma mîrongo îthatû na mûgwanja cia magana mataano,
37 na ûgooti bwa Mwathani bwarî ng'ondu magana mathanthatû ma mîrongo mûgwanja na itaano;
38 ng'ombe ngiri mîrongo îthatû na ithanthatû na ûgooti bwa Mwathani i ng'ombe mîrongo mûgwanja na ciîrî;
39 mang'ooi ngiri mîrongo îthatû na magana mataano na ûgooti bwa Mwathani i mang'ooi mîrongo îthanthatû na rîmwe;
40 aarî ngiri îkûmi na ithanthatû na ûgooti bwa Mwathani n'antû mîrongo îthatû na baîrî.
41 Kwoogu Musa aanenkera Eriasari ûgooti bûbu marî maruta ma mwanya kîrî Mwathani, wa ta bûra Mwathani aathîîte Musa.
42 Rûgai rwa antû babu bangî ba Isiraeri rwaganeene na rwa acikaarî, naru rwarî: 43 Ng'ondu ngiri magana mathatû ma mîrongo îthatû na mûgwanja cia magana mataano. 44 Ng'ombe ngiri mîrongo îthatû na ithanthatû 45 mang'ooi ngiri mîrongo îthatû cia magana mataano. 46 Aarî ngiri îkûmi na ithanthatû. 47 Kuuma kîrî rûgai rûrû rwa antû ba Isiraeri Musa naathûkîîrie muntû kuuma kîrî wa bara antû mîrongo îtaano na nyamû îmwe kuuma kîrî wa kîra nyamû mîrongo îtaano, wa ta bûra Mwathani aamwîrîîte, na acineenkanîra kîrî Arawi bara baamenyagîîra Îrema rîa Kûrîîkanaga.
48 Rîru atongoria bara baarûngamîrîîte njûûrî baathi kîrî Musa 49 bamwîra, “Mûnene twatara acikaarî baba tûrarûgamîrîîte twona gûtirî nwa ûmwe wao mûûru. 50 Kwoogu itûreeteete into bia kwîgemia bia thaabu, mbangiri, mbete, mbucuru na mîkathî îra wora ûmwe wacietû arathûkîîtie. Itûkûreeta into bibu tûbirute kîrî Mwathani ta îrîi rîa ûtûûro bwetû, kaingo agaatûrigîîria.”
51 Kwoogu Musa na Eriasari baathagaana thaabu înu îrî ya mûthemba wa into bia kwîgemia. 52 Thaabu yonthe îra atongoria baarutîîre Mwathani yarî na ûrito ta bwa kiro magana maîrî. 53 Acikaarî ibaarî bakwîthûkîria into. Bara bataarî atongoria bo i baakarire na into biao. 54 Kwoogu Musa na Eriasari Mûthînjîri wa Ngai beetîgîîria baathûkia thaabu înu bamiira Îremaani rîa Kûrîîkanaga kaingo Mwathani akaarigîîria antû ba Isiraeri.