Mawatho meegiî mîthiîtio
30
1 Musa aaneenkanîra mawatho mama kîrî atongoria ba mîîrîga ya Isiraeri: 2 “Rîra muntû athiîtia kûnenkera Mwathani gîntû kana aanyua muuma auga akaarekana na ûntû bûna, atibatîîrue arega kûûyûria mûthiîtio wake. Abatîîrue arûtha ûntû bunthe bûra athiîtîîtie akaarûtha.”3 Rîra mwarî arî kwa îthe mûciî akathiîtia kûnenkera Mwathani gîntû kana auge atiirûtha ûntû bûna, 4 n'abatîîrue arûtha bûra bunthe athiîtîîtie kûrûtha kana bûra bunthe tatiga îthe amûkararîîtie eegua bûra augîîte. 5 Îndî îthe akaaya gûkararia akauga mwarî wake atikaarûthe ûgu athiîtîîtie, mwarî atirî na ûbatu bwa kûûyûria wîrane bwake. Mwathani akamûrekera n'ûntû n'îthe ûmûrigîîrie kûbuûyûria.
6 Mûka atarî mûgûre na akaaya kûthiîtia, akiindîîrîîtie kana atathûganîîtie bwega, kana akauga akaarekana na ûntû bûna, akagûrwa, 7 nwa mwanka aûyûrie mantû mara athiîtîîtie kûrûtha kana augîîte akaarûtha nwa kana mûrûme wake agakararia eegua mûthiîtio ûyu. 8 Îndî mûrûme wake akamûkaania kûûyûria mûthiîtio ûyu eegua mantû mamu, atiîgua arî na ûbatu bwa gûcuûyûria. Mwathani akamûrekera.
9 Mûk'wantigwa kana ncooki nabatîîrue aûyûria mîthiîtio yake yonthe na arekana na gîntû kîonthe augîîte akaarekana nakîo.
10 “Mûka ûmûgûre akathiîtia kana akauga akaarekana na gîntû kîna, 11 nwa mwanka aûyûrie bûra bunthe athiîtîîtie kana augîîte tatiga mûkûrû wake akararîîtie eegua mûthiîtio ûyu. 12 Îndî mûkûrû wake akaaya kûmûkararia akauga atikaûyûrie mûthiîtio ûyu rîra agaacuîgua, atirî na ûbatu bwa kûûyûria mûthiîtio ûyu. Mwathani akamûrekera n'ûntû mûkûrû wake n'we amûrigîîria aûyûria mûthiîtio wake. 13 Mûkûrû wake arî na watho bwa gwîtîgîîria kana gûkararia mûthiîtio kana wîrane bwa mwekûrû wake. 14 Îndî ûkeegua ntugû îra eegiirue mûthiîtio ataukararia, mwekûrû n'abatîîrue aûyûria mûthiîtio kana wîrane bwake. Rîra mûkûrû aarega gûkararia, ntugû wa înu eegua mûthiîtio, i ka eetîgîîria mûthiîtio ûyu. 15 Îndî mûkûrû ûyu akaaya gûkararia mûthiîtio ûyu agu nyumaani, we n'we akaagwata îkaanûkia n'ûntû bwa kûrega kûûyûria mûthiîtio. 16 Mama i mo mawatho mara Mwathani aaneenkeere Musa meegiî mîthiîtio ya mwarî atarî mûgûre arî mûciî kwa îthe na ya aka bara baagûre.”