2
1 Musa aathi na mbere kuuga, “Rîru twagarûka twerekera rwanda tûtarîîte Îria Rîtuune, wa ta bûra Mwathani ambîîrîîte, na twakara tûkîthiûrûûkaga kîrîma gîa Seiri kagiita kaaraaya. 2 Rîru Mwathani ambîîra, 3 ‘I bûthiûrûûkîîte kîrîma gîkî îgiita rîîraaya mûno; garûkaani na bwerekere bwegûrû. 4 Na wîre antû ûûgû, “Bûthiîte gûkûrûkîîra nthîgûrû ya aruanyûkwe, nciarwa cia Esaû bara batûûraga Seiri na bakeegua bamakîîte i biigû. Kwoogu bûmenyeere 5 bûtikaaye kûrûa nabo, n'ûntû ntibûnenkera kagucî nwa kaniini ka nthîgûrû yao, n'ûntû i ka ndaaneenkeere Esaû kîrîma gîa Seiri kîrî rûgai rwake. 6 Bagûrîreeni irio na mbia cienu, kaingo bûrîa; na bûbagûrîre rûûyî rwa kûnyua kinya ru. 7 Mwathani Ngai wenu n'athaarimîîte ngûgî cia njara cienu, na naiyî bûra bûkûrûkaangîîrîîte rwanda rûrû rûnene. Mîanka îno mîrongo îna Mwathani neegîîtue arî amwe naabi, na gûtirî kîo bwaga.” ’ 8 Kwoogu twakûrûka aruayia, nciarwa cia Esaû bara batûûraga Seiri. Twatiga barabara ya Araba îra yuumîîte Erathi na Esioni-Ngeberi, twathi na barabara ya rwanda rwa Moabu, 9 Rîru Mwathani ambîîra, ‘Bûtigaaturanie mbaara kana bûcwîra antû ba Moabu ûgîti, n'ûntû ntibûnenkera kagucî nwa kaniini ka nthîgûrû yao gatuîka keenu n'ûntû indaaneenkeere nthaka cia Rooti nthîgûrû ya Ara yatuîka rûgai rwao.’ 10 (Agu mbereeni kûrî mûgongo wa antû baanene mûno beetagwa Emimu baatûûraga gûntû gûku. Nabo baarî na inya, baingî na baaraaya ta antû ba Anaki. 11 Antû ba Emimu na ba Anaki beetagwa n'antû Arefaimu, îndî antû ba Moabu baabeetaga Emimu. 12 Aori wana bo baatûûraga Seiri agu mbereeni îndî nciarwa cia Esaû babeengatia, na babathiria rîru baathûkia nthîgûrû înu yatuîka yao, wa ta bûra antû ba Isiraeri baarûthire nthîgûrû îra yarî rûgai rwao îra Mwathani aabaneenkeere.)13 “Mwathani aathi na mbere kuuga, ‘Îîndî gwataani njîra bûriinganîrie kîbonde gia Serendi.’ Naati twaringanîria kîbonde gîa Serendi. 14 Na îgiita rîra twatûmîrîîte kuuma rîra twaumire Kandesi-Barinea mwanka rîra twariinganîîrie kîbonde gîa Serendi rîarî mîanka mîrongo îthatû na înaana. Na îgiita rîru antû bonthe bara baarî njûûrîîni ya ndûa ya Kandesi-Barinea baarî bagûkua wa ta bûra Mwathani augîîte. 15 Na mma Mwathani nabaûkîîrîîte abathiria kuuma kambîîni mwanka bathirîkîra kûrû.
16 “Kwoogu rîra antû bonthe bara baarî njûûrîîni baakuire baathira kuuma kîrî antû ba Isiraeri, 17 Mwathani ambîîra, 18 ‘Îmunthî bûgaakûrûkîîra Ara nthîgûrû ya antû ba Moabu. 19 Bwathûngîra nthîgûrû ya Amoni, nciarwa cia Rooti, bûtigaaturanie mbaara nabo kana bûbacwîra ûgîti, n'ûntû ntibûnenkera kagucî nwa kaniini ka nthîgûrû yao, n'ûntû indaaneenkeere nciarwa cia Rooti yoo îtuîka rûgai rwao.’ 20 (Nthîgûrû îno yaiyîkeene ta nthîgûrû ya Arefaimu. Arapimu atûûraga ku agu mbereeni, îndi Aamoni baabeetaga Samusumi. 21 Baarî antû barî na inya, baingî, na baaraaya wa ta Anaki, îndî Mwathani n'abathirîîrie mbere ya Aamoni, kaingo Aamoni bathûkia nthîgûrû înu yao na batûûra ku, 22 wa ta bûra aarûthîîre nciarwa cia Esaû, ira itwîre Seiri, rîra aathiriirie Aori mbere yao. Nciarwa cia Esaû ciathûkia nthîgûrû înu ciatûûra ku mwanka îmunthî tûrî. 23 Wa ûgu, nwa ta bu gwakarîkire kîrî antû beetagwa Abimu bara baatûûraga akubî na Gasa. Antû ba kuuma Kabutori baathiire babathiria na baatûûra nthîgûrû îra baatûûraga.)
24 “Na Mwathani atwîra, ‘Ûkîîraani bûthi mbere na rûgendo rwenu bûgiitanîîrie kîbondeeni kîa Arinoni. I neenkanîrîîte Sioni wa Amori mûnene wa Esiboni, na nthîgûrû yake njaraani cienu. Anjîîriani kwîgwatîra nthîgûrû yake na bûrûe n'we. 25 Kuuma îmunthî ngeekîra antû bonthe ba nthîgûrû kîmamu n'ûntû bwenu. Antû bara bakeegagua mantû meenu i bakainainaga n'îtema bakîbûkuthûka.’
Isiraeri yacinda Sioni mûnene wa Esiboni
26 “Kwoogu ndaatûma ntûmwa ya ûkiri kuuma rwanda rwa Kendemothi kîrî Sioni mûnene wa Esiboni na biugo bia ûkiri, nkîmwîraga, 27 ‘Twîtîgîîrie tûkûrûkîîre nthîgûrû yenu. Tûgaakûrûka na barabara na tûtiathûkîra na njara ya ûrîo kana njara ya ûmotho. 28 Tûgakûrea irio bionthe biaku bira tûkaarîa na rûûyî rwaku rûra tûkaanyua tûgakûrea, bunka ûtwîtîgîîrie tûkûrûkîîre nthîgûrû yenu na magûrû, 29 wa ta bûra nciarwa cia Esaû bara batwîre kîrîmaani gîa Seiri na Amoabu bara batûûraga Ara baatwîtîgîîrie twakûrûkîîra nthîgûrû yao. Twîtîgîîrieni tûkûrûkîîre nthîgûrû yenu mwanka tûriinge muuro wa Njorondani tûkinye nthîgûrû ira Mwathani atûneenkereete.’ 30 Îndî Sioni mûnene wa Esiboni ataatwîtîgîîria tûkûrûkîîra nthîgûrû yake n'ûntû Mwathani Ngai wenu n'amûûmîîtie kîongo na amwîkîra kabûthia nkoro kaingo tûrûa n'we na Mwathani atûteethia kûmûcinda, wa ta bûra gûkari îmunthî.
31 “Mwathani ambîîra, ‘Raitha, nkwanjîîria kûneenkanîra mûnene Sioni na nthîgûrû yake njaraani ciaku. Îîndî anjîîriani kwîgwatîra yoo na kûmîtuîkithia yenu.’
32 “Rîra mûnene Sioni aumagarûkire na njûûrî yake yonthe, aaya Njaasi kûrûa naati, 33 Mwathani n'amûneenkanîîre njaraani cietû twamûcinda, na twacinda nthaka ciake na njûûrî yake. 34 Twagwata taûni cionthe twaciînyaangia na twaûraga antû arûme, aka na aana bara baarî taûni inu bonthe. Gûtirî matigari maatigwa ku. 35 Îndî itwathûkiirie nyamû cia ndîîthia amwe na into bingî bira biarî na baita biatuîka bietû. 36 Mwathani Ngai wetû n'atûteethiirie gûtuunyana Aroeri îra îrî katheng'eng'aani ga kîbonde kîa Arinoni, taûni îra îrî kîbondeeni na nthîgûrû înu îthiûrûkîîrîîtie gûntû gûku mwanka Ngiriandi. Gûtirî taûni yegagua îrî na rûthiingo rûûkamu bûra tûtaûmba kûruomora. 37 Îndî amwe na ûgu, tûtaathi akubî na Amoni bara baatûûraga îkumbo rîa muuro ûra wetagwa Njaboku, na taûni cia nthîgûrû ya irîma, na gûntû kûngî kunthe kûra Mwathani Ngai wetû aatwîrîîte tûtigacerie ntheto nabo.”