KÛRIRIKANANIA MAATHANA
Rwaria rwa Musa rwa mûthia
1
1 Îbuku rîrî rîandîkîîtwe mantû mara Musa eerire antû bonthe ba Isiraeri barî rwanda rûteere rwa uumîîro bwa riûa rwa muuro wa Njorondani. Baarî rwanda rwa Araba baraitheene na taûni ya Subu, gatîgatî ga taûni ya Parani îrî mbarî îmwe na taûni cia Toferi, Rabani, Aserothi na Ndisaabu irî mbarî îra îîngî. 2 Rûgendo rwa kuuma kîrîma kîa Orebu kûthi Kandesi-Barinea, ûkûrûkîîrîîte kîrîma gîa Seiri, i rwa ntugû îkûmi na îmwe.3 Ntugû ya mbere ya mweri wa îkûmi na ûmwe wa mwanka wa mîrongo îna kuuma antû ba Isiraeri bakuuma Miisiri, Musa neerire antû ba Isiraeri mantû monthe mara Mwathani aamwathîîte abeere. 4 Musa aabeerire ûgu nyuma ya Mwathani agûcinda Sioni mûnene wa Amori ûra aathaga taûni ya Esiboni, na Ogu mûnene wa Mbasani, ûra aathaga Asitarothi na Endirei.
5 Kwoogu wa barî nthîgûrû ya Moabu mbarî ya uumîîro bwa riûa ya Njorondani, Musa aatarîîria antû ba Isiraeri mawatho ma Mwathani, abeera, 6 “Mwathani Ngai wetû aatwîrire, rîra twarî kîrîmaani kîra gîîtagwa Orebu, ‘I bûkarîîte aaga kîrîmaani gîkî îgiita rîîraaya bwa kûgana. 7 I kagiita ga kwoya nthaama na kûthi mbere na rûgendo. Îthiini nthîgûrû ya irîma ya Amori na nthîgûrû inu iingî ithiûrûûkîrîîtie kîbonde kîa Njorondani, nthîgûrû inu cia irîma na nkona cia tûrîma ira irî mbarî ya ûthwîro bwa riûa, rwanda rwa Negebu na mîaraanthî îra îrî îkumbo. Nthîgûrû înu yonthe n'ya Akanaani. Na bûthi nthîgûrû ya Rebanoni, îra îthiîte mwanka muuro ûra mûnene wa Yufîrîti. 8 Raithaani bwone, nkûbûnenkera nthîgûrû îno yonthe. Îthiini bwîgwatîre yoo n'ûntû i nthîgûrû îra ndaathiîtiirie kûnenkera Îburaîmu, Isaka na Njakubu; biûyûûyû bienu amwe na nciarwa ciao.’
Atongoria baathuurwa
9 “Îgiita rîru ndaabwîrire, ‘Biû bûrî mûrigo ûmûrito na ntiûmba kûbûkamata ninka. 10 Mwathani Ngai wenu nabûthagayîîtie bwaingîa ta nthata cia îgûrû. 11 Mwathani Ngai wa biûyûûyû bienu aroobûthagayia maita ngiri na abûthaarime wa ta bûra aabwîrire. 12 Îndî n'ata mbûûmba gûkamata mathîîna meenu na kûgiitaga magamba meenu ndî ninka? 13 Îîthuurîreeni antû arûme bara barî na ûûgî na ba gîtîîyo kuuma mîîrîgaani yenu na nkabatuîkithia atongoria beenu.’
14 “Na bwetîgîîria bwauga, ‘Mûbango ûyu n'ûmwega.’ 15 Kwoogu ndaathûkia antû babu barî na ûûgî na bara bwathuurîîte kuuma mîîrîgaani yenu ndabatuîkithia atongoria na agiiti magamba beenu. Bamwe baarî ba kûrûngamîîra gîkundi gîa antû ngiri, bangî antû îgana, bangî mîrongo îtaano na bangî antû îkûmi. 16 Ndeerire agiiti magamba ata rî, ‘Nwa mwanka bûgiitage magamba gûtarî na kwendanîîra, wîgue n'antû ba Isiraeri bûkûgambithia kana wîgue i Mûisiraeri na ûmwe wa ageni bara batwîre gatîgatî keenu. 17 Bûtibatîîrue bwendanîîra rîra bûkûgiitîra antû magamba. Bagiitagîreeni bûmwe, wîgue arî muntû ûrî îgweta kana eegue atarî îgweta. Bûtigaakuthûke muntû nwa ûrîkû n'ûntû Ngai n'we Mûgiiti wa Magamba monthe. Îgamba rîkaaya kwîgua rîrî rîûmo mûno, bûûndetere rîo na nkarîthikîîria.’ 18 Na kagiita gaku i ndaabwîrire mantû monthe mara bwabatîîrue bûrûtha.
Athigaani kuuma Kandesi-Barinea
19 “Rîru, wa ta bûra Mwathani aatwathire, twaumire kîrîmaani kîa Orebu twakûrûkîîra rwanda rûûnene na rwakûmakania, rûra biû bwonire, njîraani ya gûkûrûkîîra nthîgûrû ya irîma ya Amori, wa ta bûra Mwathani aatwathîîte. Twathi mwanka Kandesi-Barinea. 20 Ndabwîra, ‘Bûgûkinya nthîgûrû ya irîma ya Amori îra Mwathani agûtûnenkera. 21 Na wabu Mwathani Ngai wenu akûbûnenkera nthîgûrû înu. Îthiini bûmîthûkie, wa ta bûra Mwathani Ngai wa biûyûûyû bienu aabwîrire. Bûtikaaguaye kana bûkua nkoro.’
22 “Naabi bwinthe i bwayire kîrî niû bwambîîra ata rî, ‘Ga tûtûme antû bathi barî mbere yetû bagatûthigaanîre nthîgûrû înu. Rîru baaye batwîre njîra îra mbega ya kûthi n'yo na taûni ira tûbatîîrue kwîgwatîra.’ 23 Indoonire mûbango ûyu ûrî ûmwega, na ndaathuura antû arûme îkûmi na baîrî kuuma gatîgatîîni keenu, muntû ûmwe kuuma wa kîra mwîrîga. 24 I baumagarûkire baathi nthîgûrû înu ya irîma, baathi mwanka kîbondeeni gîa Kîgaro,a baathigaana gûntû gûku. 25 I baatwire matunda ma nthîgûrû înu batûreetera batwîra, ‘Wabu nthîgûrû îra Mwathani Ngai wetû agûtûneenkera n'îmbega.’
26 “Îndî biû i bwaregire kûthi nthîgûrû înu, bwakararia watho bwa Mwathani Ngai wenu. 27 Bwanung'una bûrî maremaani meenu bûkiugaga, ‘N'ûntû Mwathani n'atûmeneete i kîo gîatûma atûruta Miisiri, kaingo atûneenkanîra njaraani cia Amori batûthiria. 28 I kû tûthiîte îîndî? Athigaani beetû i baratwîkîîre ûguaya batwîra antû ba nthîgûrû înu tûthiîte i baanene na baaraaya kûrî tiû, taûni inene mûno na ciirigîrîîtwe na nthingo indaaya ciîtîîtie mwanka ciakinya matuuni. Na kûthûûkia mantû, bauga i baroonire nciarwa cia Anaki noogo!’b 29 Rîru ndabwîra ata rî, ‘Bûtikaaguaye kana bûkuthûka antû babu. 30 Mwathani Ngai wenu ûra athiiyaga arî mbere yenu akabûrwîrîîra wa ta bûra aarûthire Miisiri bûkîonaga na meetho meenu, 31 na rwanda naara bwoneete Mwathani akîbûkamata, ta bûra muntû akamataga kaana gaake, rûgendooni rwenu runthe mwanka bwakinya aaga bûrî.’
32 “Îndî wana arûthîîte mamu monthe, bûteetîgia Mwathani Ngai wenu, 33 ûra aathiiyaga arî mbere yenu, kûbûcereria ara bûkeenjîra marema, akîbûtongoragia na mwanki ûtugû na agatûmîra îtu mûthenya.
Mwathani aakaanûkia Isiraeri
34 “Rîra Mwathani eegiirue îtheto rîenu naathûûrire na aathiîtia auga, 35 ‘Gûtirî nwa ûmwe wa baba, antû baba ba nthuke îno ndemu akoona nthîgûrû înu mbega ndaathiîtiirie kûnenkera ba abaagu, 36 tatiga Karebu mwana wa Njebune. We akamîona na nkaamûnenkera amwe na nciarwa ciake nthîgûrû îra aakinyire na magûrû maake, n'ûntû bwa wathîki bwake kîrî Mwathani.’
37 “Wana kinya niû Mwathani n'anthûûrîîre n'ûntû bwenu, na ambîîra, ‘Wana woû ûtiithûûngîra nthîgûrû înu. 38 Îndî Njosua mwana wa Nuni, mûniini waku, n'we akaathûûngîra. Mwîkîre inya n'ûntû n'we agaatongoreeria antû ba Isiraeri bakîîgwatîra nthîgûrû înu. 39 Na aana beenu bara bwathûgaanagia bakaagwatwa mîgwate, bara îmunthî batakwathûrana wega na ûthûûku, bakaathûûngîra nthîgûrû înu na bakeegwatîra yo. 40 Îndî woû, garûka werekere bwa rwanda, ûtarîîte Îria Rîtuune.’ 41 Rîru bwacookia ata rî, ‘Musa, tûkûbîtîria Mwathani. Îîndî tûgwîtîîgîîria kûthi na kûrûa wa ta bûra Mwathani atwathîîte.’ Na wa kîra ûmwe wenu aathûkia mathaga ma ndûa, bûgîîciiragia n'ûntû bûbûûthû kûthûngîra nthîgûrû înu ya irîma. 42 Mwathani ambîîra, ‘Beere batikaathi kûrûa n'ûntû ntiîgua ndî amwe nabo. Wona baathi bagaacindwa n'anthû baao.’ 43 Wana kinya nkûbwîra ûgu bûtanthikîîria. I bwaregire kwathîkîra watho bwa Mwathani bûtakûmaka, bwathûûngîra nthîgûrû înu ya irîma. 44 Rîru Amori bara baatwîre nthîgûrû înu ya irîma babwomokera ta ntundu ya njûkî babwîngatîria naagu Seiri mwanka Orima na babûcinda. 45 Bwacooka na bwarîrîra Mwathani. Îndî Mwathani ataabûthikîîria nwa aniini. 46 Kwoogu bwakara Kandesi kagiita kaaraaya, kagiita konthe kara bwakarire oogo.”