11
1 Manjari sengorinbi aku buwat eꞌku anengoran Al-Masi.
Pasal Pagturung Buꞌun Bang Angarap ni Tuhan
2 Sanglitanta kam ma sabab pangentombi ma aku sakahabaꞌ waktu, maka ma sabab pameyaꞌbi ma pamanduꞌ ya bay pangꞌbbaku ma kaꞌam.
3 Na aniyaꞌ giꞌ pamanduꞌku. Taꞌuhunbi itu: si Isa Al-Masi ya pagmakōkan kalꞌllahan, ati lꞌlla ya pagmakōkan kahꞌndaꞌan sigām, maka Tuhan ya pagmakōkan Al-Masi. 4 Bang kam magtipun dajamaꞌahan magsambahayang, boꞌ aniyaꞌ lꞌlla angamuꞌ-ngamuꞌ atawa amaluwas lapal min Tuhan, bang iya gantaꞌ aturung, pahinaꞌna Al-Masi ya pagmakōkanna. 5 Sagōꞌ bang dꞌnda ya angamuꞌ-ngamuꞌ atawa amaluwas lapal min Tuhan ma deyom katipunanbi ma halam magtinurung, pahinaꞌna hꞌllana ya pagmakōkanna. Mbal magbiddaꞌ dꞌnda inān maka dꞌnda bay binagongan kōkna, bang takdil isab ni kaiyaꞌan. 6 Bang dꞌnda mbal tuꞌud anurungan kōkna ma deyom katipunanbi, subay iya magpagunting apuꞌut. Sagōꞌ, pagka makaiyaꞌ-iyaꞌ bang dꞌnda binagongan atawa pinapuꞌut buꞌunna, subay iya magtinurung. 7 Mbal patut bang lꞌlla magtinurung sabab lꞌlla ya pinapanjari pamandogahan kajarihan maka kamahaldikaꞌan Tuhan. Sagōꞌ dꞌnda ya pamandogahan kamahaldikaꞌan lꞌlla 8 sabab lꞌlla ya bay pinapanjari dahū eꞌ Tuhan. Nggaꞌi ka lꞌlla ya pinapanjari min baran dꞌnda, sagōꞌ dꞌnda ya pinapanjari min baran lꞌlla. 9 Maka nggaꞌi ka lꞌlla ya pinapanjari pamalimbang ma dꞌnda, sagōꞌ dꞌnda ya pinapanjari pamalimbang lꞌlla. 10 Angkan subay magtinurung dꞌnda, tandaꞌ saksiꞌ ma saga malaꞌikat in iya kapagbayaꞌan eꞌ hꞌllana.
11 Malaingkan in kitam ma deyom okoman Panghūꞌ Isa subay magtabang-tiyabangi dꞌnda maka lꞌlla. Mbal manjari bang hal lꞌlla atawa hal dꞌnda. 12 Bay pinapanjari dꞌnda luwas min baran lꞌlla, saguwāꞌ dꞌnda ya anganakan lꞌlla. Maka min Tuhan asal ai-ai kamemon. 13 Na, angandongdong kam di-bi: patut bahāꞌ bang dꞌnda anabbut ni Tuhan ma deyom katipunanbi ma mbal magtinurung? 14 Kataꞌuwanbi, sangay min katagnaꞌ makaiyaꞌ-iyaꞌ asal bang lꞌlla atahaꞌ buꞌunna, 15 sagōꞌ bang dꞌnda atahaꞌ buꞌunna, ya heꞌ makamanis iya. Kaniyaꞌan iya buꞌun atahaꞌ paturung kōkna. 16 Na, bang aniyaꞌ mailu bilahi anganjawab pasal inaꞌan-i, ya itu panambungku ma iya: halam aniyaꞌ kalꞌngnganan saddī ma kami maka ma saga jamaꞌa Tuhan maingga-maingga lahat.
Pangentoman ma Kamatay Panghūꞌ Isa
17 Aniyaꞌ giꞌ panohoꞌanku ma kaꞌam, sagōꞌ mbal kam sanglitanku. Sababna, bang kam magtipun angarap ni Tuhan, nggaꞌi ka kahāpan ya kaluwasanna sagōꞌ kalaꞌatan. 18 Muna-muna itu: makakale aku hunub-hunub in kaꞌam konoꞌ mbal magdauyunan bang magtipun. Bꞌnnalna hunub-hunub inān, bang ma aku. 19 Patut isab bang aniyaꞌ pagbiddaꞌan ma kaꞌam, supaya atampal bang sai min kaꞌam ya makasulut atay Tuhan. 20 Ma waktu kapagtipunbi amangan pangentoman kamatay Panghūꞌ Isa, saliꞌ nggaꞌi ka Panghūꞌ Isa ya taentombi. 21 Sabab aniyaꞌ kam pasaꞌut amangan kinakan bay bowabi ati mbal kapinanbi seheꞌbi. Jari aniyaꞌ kam lingantu, maka aniyaꞌ maglangohan sabab makalanduꞌ heꞌna anginum. 22 Angay bahāꞌ! Halam aniyaꞌ lumaꞌbi pamangananbi dahū? Atawa kabayaꞌanbi tuꞌud subay amarikiꞌ-dikiꞌ saga pagkahibi jamaꞌa Tuhan, maka amahinaꞌ saga seheꞌbi kamiskinan? Daka ai pamissalaku ma kaꞌam ma pasal hinangbi buwattilu! Bilahi kam bahāꞌ sanglitanku? Tantu mbal.
23 Bay pamanduꞌku ma kaꞌam ya bay pangꞌbba aku eꞌ Panghūꞌ. Ma sangom kapanukbal Panghūꞌ Isa ni saga bantana, bay iya angāꞌ tinapay. 24 Aubus paꞌin pagsukulanna ni Tuhan, pinagpōng eꞌna. Yukna ni saga mulidna, “Baranku koꞌ itu, ya pamalillaꞌku ni kamatay ma sababbi. Amangan kam tinapay itu pangentomanbi aku.” 25 Damikiyanna isab inuman. Aubus paꞌin eꞌ sigām amangan, ningāꞌ sawan eꞌ si Isa. Yukna, “Inuman itu paltandaꞌan ma kapagsulutan bahaꞌu ya panganjanjiꞌ Tuhan ma kaꞌam, tatuman eꞌ lahaꞌku. Isbatunbi, pangentomanbi aku sakahabaꞌ kam anginum.” 26 Hatulanna, sakahabaꞌ kam amangan tinapay itu sampay anginum min sawan itu, tapasaplag eꞌbi kamatay si Isa sampay taꞌabut waktu kabalikna piꞌitu.
27 Angkan koꞌ, sai-sai amangan tinapay maka anginum min sawan Panghūꞌ itu ma halam abontol pangatayanna, aꞌa inān katōngan dusa sabab halam pagaddatanna baran Panghūꞌ Isa sampay lahaꞌna. 28 Subay kam angaliling di-bi dahū boꞌ yampa kam amangan tinapay maka anginum min sawan. 29 Sabab sai-sai amangan atawa anginum ma halam tasilangna baran Panghūꞌ Isa bang ai hatina, amatꞌkkahan iya di-na hukuman Tuhan pagka buwattēꞌ pamanganna maka panginumna. 30 Ya heꞌ poꞌonna angkan aheka ma deyomanbi ilu magkalammahan, maka aniyaꞌ isab amatay. 31 Bang kita gantaꞌ angaliling di-ta dahū, mbal kita taluwaꞌ hukuman. 32 Bang kita nihukum maka bininasa eꞌ Panghūꞌ Isa, hatina biniꞌat kitam boꞌ supaya mbal pinatꞌkkahan hukuman nalkaꞌ sambeyaꞌ maka saga aꞌa ya mbal angisbat Tuhan.
33 Manjari itu, saga dauranakanku, bang kam magtipun amangan pangentoman kamatay Panghūꞌ Isa, lagad-lagarinbi saga kaseheꞌanbi. 34 Bang aniyaꞌ kam lingantu, subay iya amangan dahū ma lumaꞌna, boꞌ kam mbal tꞌkkahan hukuman Tuhan ma waktu kapagtipunbi. Na, in pasal saga palkalaꞌ kaseheꞌ, subay na aku mailu boꞌ yampa salassayku.