10
Bandaꞌan Pasal saga Taꞌu-taꞌu
1 Na, saga dauranakanku, taꞌuhunbi pasal bay kalabayan saga pangkattam Yahudi waktu kapameyaꞌ sigām ma si Musa ma masa awal eꞌ. Bay kalandungan gabun sigām kamemon, maka bay amaklay kamemon labay min tahik. 2 Ya dalilna, tapandi sigām ma deyom gabun maka ma deyom tahik, tandaꞌ in sigām beyaꞌ ma si Musa. 3 Kamemon sigām bay magkakanan kinakan ya pamuwan eꞌ Tuhan. 4 Kamemon sigām bay maginuman boheꞌ ya pamuwan eꞌ Tuhan, sabab magbeyaꞌ sigām anginum boheꞌ paluwas min batu lakit ya bay seheꞌ sigām, ya dalilna Al-Masi. 5 Sagōꞌ halam kasulutan atay Tuhan ma kahekaꞌan sigām eꞌ, angkan aheka alaglag ma lahat paslangan.
6 Na, subay kitam amintāng min pakaradjaꞌan ya bay tumꞌkka ni kamattoꞌahantam inān, supaya kitam mbal anꞌppu sigām anganapsuhan laꞌat, 7 atawa anumba ni taꞌu-taꞌu buwat sigām kaseheꞌ ma masa heꞌ. Tasulat asal ma deyom Kitab pasal bay kahinangan sigām, yuk-i, “Saga aꞌa inān bay magtingkōꞌan magjamu pagduwaꞌahan taꞌu-taꞌu ya pagtuhanan sigām. Puwas eꞌ, magtꞌnggehan sigām magpangigal maka maghinang kasabulan.” 8 Wajib kitam daꞌa maghinang kalaꞌatan dꞌnda maka lꞌlla, buwat bay tahinang eꞌ kaseheꞌan sigām. Angkan aniyaꞌ sigām labi duwampūꞌ maka tꞌllungibu puhuꞌ alaglag ma deyom dangꞌllaw du. 9 Daꞌa na kitam angandusa pangandustaꞌtam kahandak Panghūꞌ. Aniyaꞌ isab min kaꞌmboꞌ-mboꞌantam bay makahinang buwattēꞌ ma masa awal, ati aheka sigām bay amatay eꞌ sowa. 10 Daꞌa isab pagmusmurinbi Tuhan ma sabab ai-ai pamatꞌnnaꞌna ma kaꞌam, buwat bay kapagmusmud sigām kaseheꞌ ma masa awal eꞌ, angkan sigām bay pinapatay eꞌ malaꞌikat pagmumulkaꞌ.
11 Na, tumꞌkka saga pakaradjaꞌan inān ni sigām boꞌ aniyaꞌ pamintāngan saga aꞌa ma patahunan katapusan itu. Tasulat isab ma Kitab supaya kitam mbal angahinang buwattēꞌ. 12 Angkan koꞌ, bang aniyaꞌ aꞌa ma deyomanbi ilu amikilan di-na in imanna ahogot, aꞌa inān subay kamayaꞌ-mayaꞌ toꞌongan boꞌ mbal tabowa maghinang dusa. 13 Kamemon sasat-manasat ya kalabayanbi mbal magbiddaꞌ maka sasat ya maumu kalabayan eꞌ bangsa manusiyaꞌ. Maka kapangandolan Tuhan, angkan kam mbal pasagaranna sinasat labi min kosogbi. Sabab bang kam pinatꞌkkahan sasat sumiyan-sumiyan, tantu kam binuwanan eꞌna kosog ma waktu kasasat boꞌ kam makasandal, ati minnēꞌ aniyaꞌ kapuwasanbi.
14 Angkan koꞌ, saga bagay kalasahanku, daꞌa kam palamud anumba ni taꞌu-taꞌu. 15 Ahāp asal kōkbi, angkan yukku ma kaꞌam, dongdonginbi bissalaku itu bang bꞌnnal atawa mbal. 16 Bang kitam magtipun angentom kamatay Panghūꞌ Isa, anginum kitam min deyom sawan ya pagsukulantam ni Tuhan. Tandaꞌ saksiꞌ koꞌ inān in kitam magdakayuꞌ maka Al-Masi ma sabab lahaꞌna. Damikiyanna isab tinapay ya pagbahagiꞌantam, tandaꞌ koꞌ inān in kitam taga-lamud ma baran Al-Masi. 17 Sabab dakayuꞌ du tinapay ya pagbahagiꞌantam kamemon, angkan kitam saliꞌ dalil ginhawa-baran dakayuꞌ du, minsan aheka.
18 Kira-kirahunbi addat bangsa Israꞌil eꞌ: sasuku sigām amangan min bay panukbal ni Tuhan aniyaꞌ lamud sigām ma pagtaꞌat ni Tuhan. 19 Na, mbal yukku aniyaꞌ pūs ma ai-ai pangalamas ni taꞌu-taꞌu, atawa aniyaꞌ kallum ma taꞌu-taꞌu ya pangalamasan eꞌ. 20 Tantu mbal, sagōꞌ in susumbaliꞌan pangalamas taꞌu-taꞌu, tinukbalan asal ni saga saitan, nggaꞌi ka ni Tuhan. Maka kabayaꞌanku subay halam aniyaꞌ lamudbi ma binangsa saitan. 21 Bang kam gantaꞌ magtipun amangan maka anginum pangentomanbi Panghūꞌ Isa, mbal kam makajari palamud amangan maka anginum min bay pangalamas saga saitan. 22 Luwal bahāꞌ bang kita bilahi anunggud Panghūꞌ. Palabi bahāꞌ gaꞌosanta min gaꞌosanna?
23 Aniyaꞌ saga aꞌa ahꞌlling, yuk sigām, “Makajari kita angahinang ai-ai kabayaꞌanta.” Bꞌnnal koꞌ inān, sagōꞌ aniyaꞌ mbal makahāp. Makajari kita angahinang ai-ai, sagōꞌ aniyaꞌ hinang mbal makasōng pangandolta ni Tuhan. 24 Mbal ahāp bang baranta sadja ya kinannal, sagōꞌ subay pagkaꞌinagonanta pagkahita.
25 Makajari kam amangan sumbaliꞌan ai-ai pinagdagangan ma tabuꞌ minsan halam tilawbi bang bay paglamas ni taꞌu-taꞌu. Halam aniyaꞌ dusabi amangan, 26 sabab tasulat asal ma deyom Kitab, yuk-i, “Tuhan ya tag-dapu dunya itu maka kakayaꞌ-kayaꞌanna.”
27 Bang saupama aniyaꞌ aꞌa mbal magkahagad ma si Isa amowa kam amangan ma lumaꞌna, boꞌ kam bilahi pehēꞌ, makajari kam amangan ai-ai pangalabot kaꞌam minsan mbal tilawbi bang bay paglamas atawa halam. Halam aniyaꞌ dusabi bang kam amangan. 28-29 Sagōꞌ bang aniyaꞌ gantaꞌ angahakaꞌan kaꞌam in kinakan inān bay paglamas ni taꞌu-taꞌu, na, daꞌa kakanunbi. Kaissana, ma sabab seheꞌbi ya bay angahakaꞌan kaꞌam, karuwana, ma sabab kasasaw pikilanna bang kam taꞌndaꞌ eꞌna amangan lalamasan. Nggaꞌi ka itikadbi ya asasaw, sagōꞌ itikadna. Kalu aniyaꞌ atilaw bang angay iya pinaggat amangan ai-ai kabayaꞌanku ma saukat aniyaꞌ aꞌa dangan asasaw pikilanna? 30 Angay iya sinoway ma ai-ai pagkakanna, bang bay pagsukulanna ni Tuhan?
31 Buwattitu panambungku: ai-ai kakanbi atawa inumbi, ai-ai hinang, subay nihinang pagmahaldikaꞌbi ma Tuhan. 32 Daꞌa pasasawunbi pikilan pagkahibi minsan sai-na, bangsa Yahudi ka atawa bangsa nggaꞌi ka Yahudi, atawa pagkahibi jamaꞌa Tuhan. 33 Beyaꞌinbi aku itu sabab tuyuꞌanku anulut saga aꞌa kamemon ma ai-ai hinangku. Nggaꞌi ka kahāpan baranku ya kannalku, sagōꞌ kahāpan saga aꞌa kaseheꞌan, bang paꞌin sigām lappasan boꞌ makasōd ni sulgaꞌ.