9
Kapatut Aꞌa Kawakilan
1 Limaya aku magbayaꞌan di-ku. Bay aku kawakilan eꞌ Panghūꞌ Isa, sinōꞌ magnasihat lapalna. Bay iya taꞌndaꞌ mataku. Maka kaꞌam ya kamaujuran hinangku ma Panghūꞌ, pagka kam angandol na ma iya. 2 Minsan aku mbal kinahagad eꞌ saga kaseheꞌan in aku bay kawakilan eꞌ si Isa Al-Masi, tantu du kahagadbi sabab kaꞌam baranbi ya tandaꞌ saksiꞌ in aku kawakilan eꞌna. Sabab aku ya poꞌonan angkan kam ameyaꞌ ma iya.
3 Bang aku pinariksaꞌ eꞌ sai-sai ma pasal kahinanganku, buwattitu ya panambungku: 4 halam bahāꞌ aniyaꞌ kapatutku binalanjaꞌan eꞌ saga aꞌa panduꞌanku? 5 Halam bahāꞌ aniyaꞌ kapatutku maghꞌnda ma dꞌnda angandol ma si Isa, supaya aniyaꞌ seheꞌku ma lꞌngngananku? Taga-hꞌnda saga danakan si Panghūꞌ Isa lꞌlla maka saga aꞌa kawakilan kaseheꞌan buwat si Petros. 6 Atawa hal kami bahaꞌ maka si Barnabas ya subay magusaha supaya aniyaꞌ napaka kami?
7 Bang saupama sundalu, aniyaꞌ bahāꞌ mbal binalanjaꞌan eꞌ parinta? Atawa aꞌa maghuma, aniyaꞌ bahāꞌ mbal amangan min buwaꞌ kayu ya tanomna? Atawa aꞌa magipat sapiꞌ atawa kambing, aniyaꞌ bahāꞌ mbal patut angāꞌ gatas min saga hayop ya ipatna heꞌ? 8 Nggaꞌi ka isab hal kahālan manusiyaꞌ ya pangāꞌanta taꞌu pasal kapatut ma saga aꞌa maghinang, anguyun isab Kitab Tawrat. 9 Tasulat asal ma panohoꞌan-saraꞌ si Musa, yuk-i, “Daꞌa sampongunbi sapiꞌ sabuna anganggiꞌikan pai”. Pangannalbi bahāꞌ sapiꞌ sadja ya pinagkaꞌinagonan eꞌ Tuhan ma ayat Kitab eꞌ? 10 Tuꞌud manusiyaꞌ ya pinagkaꞌinagonan eꞌna angkan pinasulat saraꞌ inān. Paralilanta aꞌa magararu maka aꞌa magani. Ya angkan sigām maghinang ma deyom huma sabab aniyaꞌ holat sigām kabuwanan palsukuꞌan min buwaꞌna. Kami itu saliꞌ dalil aꞌa maghuma inān. 11 Bay kami anganasihatan kaꞌam lapal Tuhan, saliꞌ dalil binhiꞌ ma deyom pikilanbi. Angkan kam subay mbal takuddat bang kami binuwanan bahagiꞌ min kaniyaꞌbi. 12 Bang gurubi kaseheꞌ taga-kapatut binalanjaꞌan eꞌbi, lubaꞌ-lagiꞌna kami itu.
Saguwāꞌ halam kami bay mikibalanjaꞌ ma kaꞌam minsan aniyaꞌ kapatut kami. Gom paꞌin kami anandalan kasigpitan boꞌ supaya halam aniyaꞌ makaꞌagpangan lapal ahāp pasal Al-Masi. 13 Kataꞌuwanbi asal, minsan saga aꞌa maghinang ma deyom langgal pagkulbanan, langgal ya pangāꞌan sigām kinakan. Maka saga imam ya anukbalan susumbaliꞌan pagkulban, binahagiꞌan du sigām isi hayop pagkulban. 14 Damikiyanna isab saga aꞌa magnasihat lapal ahāp, aniyaꞌ panohoꞌan Panghūꞌ Isa subay sigām binalanjaꞌan eꞌ sasuku magkahagad ma lapal inān.
15 Sagōꞌ halam bay gunaku kapatutku. Maka nggaꞌi ka balanjaꞌ ya mohotku angkan anulat ni kaꞌam. Padpad aku mikibalanjaꞌ ma kaꞌam, bilahi giꞌ aku amatay, sabab ya pagbantugku in aku halam bay angamuꞌ binalanjaꞌan. 16 Mbal aku makajari magbantug pasal pagnasihatku lapal ahāp, sabab hinangku asal bay panohoꞌan aku eꞌ si Isa Al-Masi. Aheya kasusahanku bang mbal pagnasihatku. 17 Bang aku bay makapeneꞌan di-ku maghinang buwattitu, patut du aku ginadjihan. Sagōꞌ nggaꞌi ka min bayaꞌku hal, tuꞌud hinang bay pangandol eꞌ Tuhan ma aku angkan wajib hinangku. 18 Manjari ai panambahan aku? Katambahan aku bang paꞌin tapagnasihatku lapal ahāp ma halam aniyaꞌ bayadna, minsan aniyaꞌ kapatutku binalanjaꞌan.
19 Luhaya aku magbayaꞌan di-ku, nggaꞌi ka aku banyagaꞌ. Sagōꞌ minsan buwattēꞌ, magpabanyagaꞌ aku di-ku maghinang ni aꞌa kamemon supaya aheka tabowaku angandol ma si Isa. 20 Angkanna, bang aku palamud ma saga bangsa Yahudi, beyaꞌku addat sigām Yahudi boꞌ supaya sigām tabowaku angandol ma si Isa. Minsan aku apuwas min saraꞌ si Musa ya niusul na paꞌin eꞌ bangsa Yahudi, beyaꞌku sadja satꞌggolku ma deyoman sigām, boꞌ sigām tabowa angandol ma si Isa Al-Masi. 21 Boꞌ arapun bang aku magbeyaꞌ maka saga aꞌa nggaꞌi ka Yahudi, mbal beyaꞌku saraꞌ agama Yahudi. Beyaꞌku addat saga bangsa liyu boꞌ supaya sigām isab tabowaku angandol ma si Isa. Sagōꞌ minsan mbal beyaꞌku saraꞌ agama Yahudi, masi du aku ameyaꞌ ma saraꞌ Tuhan sabab beyaꞌku du panohoꞌan Al-Masi. 22 Bang aku gantaꞌ magbeyaꞌ maka saga aꞌa ya halam giꞌ ahogot pangandol sigām tudju ni si Isa, amasaliꞌ aku di-ku ni sigām boꞌ supaya tabowaku angandol toꞌongan. Manjari minsan ai bangsa, pasaliꞌ aku ni sigām supaya aniyaꞌ min sigām lappasan min hukuman dusa. 23 Angkan buwattēꞌ hinangku, supaya pasaplag lapal ahāp pasal si Isa Al-Masi ni saga aꞌa kamemon, boꞌ aku isab palamud ni kahāpan ya tumabeyaꞌ ma lapal ahāp.
24 Biyaksa kam ma hatulan paglomba, aheka aꞌa pasōd maglomba sagōꞌ dangan du angandaꞌug boꞌ anambut kahāpan ya panungbas ma aꞌa angandaꞌug. Paralilan koꞌ itu ma kaꞌam ya bebeyaꞌan Al-Masi, angkan kam sohoꞌku maglomba toꞌongan boꞌ kam makasambut kahāpan ma sinosōng. 25 Taliꞌ-taliꞌunbi isab ya addat saga aꞌa bilahi maglomba. Magmahil sigām maka amaggat napsu sigām supaya makaraꞌug sampay minahaldikaꞌ maka korona dahun kayu, ya alꞌkkas alanos. Sagōꞌ kitam bebeyaꞌan si Isa angangut pinaniyaꞌan kamahaldikaꞌan ya anatas ni kasaumulan. 26 Angkan sengoranku aꞌa maglomba, ya mbal paragan mꞌssaꞌ-biddaꞌ sabab aniyaꞌ tudjuna tantu. Sengoranku isab aꞌa magsuntuk, ya mbal anuntuk pehēꞌ-piꞌitu sabab aniyaꞌ tigiꞌna. 27 Paggatku napsuku sabab mbal aku bilahi sinulak eꞌ Tuhan minsan bay makapagnasihat lapalna ma aꞌa kaseheꞌan.