2 KURINTU
Pahati pasal sulat itu
Ya itu sulat si Paul ni saga Almasihin maglahat ma daꞌira Kurintu, waktu katꞌnnaꞌna ma lahat Makidunya. Sulat karuwana koꞌ itu, aniyaꞌ saga dantahun palabay min bay kapanulatna ni sigām tagnaꞌ.
Aheya kasusahan si Paul ma pasal saga bagayna jamaꞌa si Isa Al-Masi ya dapalhimpunan ma Kurintu, sabab mbal kataꞌuwanna bang sulatna tagnaꞌ bay tasambut eꞌ sigām magatay poteꞌ atawa halam. Angkan pinapehēꞌ ni Kurintu dakayuꞌ seheꞌ si Paul pangandolan, ōnna si Titus. Sinōꞌ iya anganyataꞌ bang buwattingga kahālan saga bebeyaꞌan si Isa mahēꞌ, maka bang buwattingga panaimaꞌ sigām ma sulatna tagnaꞌ. Jari pabīng si Titus ni si Paul ma Makidunya amowa haka min saga aꞌa Kurintu. Ahāp konoꞌ panaimaꞌ kahekaꞌan sigām ma sulat si Paul, maka bineyaꞌ eꞌ sigām pamanduꞌna. Sagōꞌ aniyaꞌ kaseheꞌan mbal toꞌongan kasulutan ma kagaraꞌan maka kapamiꞌatan ya bay pangahūgan sigām eꞌ si Paul.
Pinareyoꞌ-deyoꞌ na paꞌin si Paul eꞌ aꞌa kaseheꞌan itu, in iya konoꞌ halam bay kawakilan eꞌ si Isa Al-Masi. Jari tasulat eꞌ si Paul sulat damuli itu pamahatina ma sigām bang ai sababna angkan bay atalom bissalana ma sulatna tagnaꞌ. Nihaka isab eꞌna pasal kakōganna, pagka tataꞌuna in sigām angꞌbba na min bay kasāꞌan sigām, maka ahāp na atay sigām tudju ni iya. Nihaka eꞌna kamemon bay kalabayanna, bainat in iya bꞌnnal-bꞌnnal bay kawakilan eꞌ si Isa Al-Masi. Pagubus, pinabowa eꞌ si Paul ma si Titus maka seheꞌna ni saga jamaꞌa ma palhimpunan Kurintu.
Taꞌndaꞌbi du maitu kaheya lasa si Paul ma saga dauranakanna Almasihin.